प्राणा केरे प्रायश्चितेरे रुपेइये
11ते तैखन यहोवाए मूसे सेइं ज़ोवं, 12“ज़ैखन तू इस्राएली केरे गिनती केरने लग्गस, तैखन तैना गन्नेरे मौके ज़ैन केरि गिनती भोवरी भोए अपने-अपने प्राणा केरे लेई यहोवारे लेई प्रायश्चित देन, ज़ैस सेइं ज़ैखन तू तैन केरि गिनती केरि राहोरो भोस, तैस मौके कोई आफत तैन पुड़ न लोड़े एवरी। 13ज़ेत्रे लोक गने गान तैना पवित्र ठारारे शेकेलेरे मुताबिक अध्धो शेकेल देन, (ई शेकेल 20 गेरा केरो भोते), यहोवारी च़ढ़तल अध्धो शेकेल भोए। 14बीह सालां केरे या तैस करां जादे उमरारे ज़ेत्रे गने गान तैन मरां सब यहोवारी च़ढ़तल देन। 15तैखन तुश्शे प्राणा केरे प्रायश्चितेरे लेई यहोवारी च़ढ़तल च़ाढ़ी गाए, तैखन न धनी लोक अध्धे शेकेले करां जादे देन, ते न कंगाल लोक तैस करां घट देन। 16ते तू इस्राएली लोकन सेइं प्रायश्चितेरो रुपेइयो नेइतां मिलापे बाले तेम्बेरे कम्मे मां लेइयां, ज़ैस सेइं तै यहोवारे सामने इस्राएली केरे याद करानेरे लेई निशान राए, ते तैन केरे प्राणा केरो प्रायश्चित भी भोए।”
