शिमशोनेरी पलिश्ती कौन्श
1एक्सां शिमशोन पलिश्ती केरे तिम्नाह नगरे जो जेव, ते तैड़ी तैस अक पलिश्ती कुई पसंद अई। 2तैट्ठां वापस एजनेरे बाद तैनी अपने अम्मा बाजी सेइं ज़ोवं, “तिम्नाह नगरे मां मीं अक पलिश्ती कुई पसंद एवरीए, ते हुनी तुस तैस सेइं मेरो ड्लाह बनाथ।” 3तैसेरे अम्मा बाजी तैस मनाह केरतां ज़ोवं, “कुन तेरे रिश्तेदारां केरि कुइयन मां, या इश्शे सारे लोकन मां कोई कुई नईं, कि तू खतनो न कियोरे पलिश्ती लोकां केरि कुइये सेइं ड्लाह बनानो चातस?” शिमशोने अपने बाजी सेइं ज़ोवं, “तैस्से सेइं मेरो ड्लाह बनाथ; किजोकि मीं तैए पसंद एवरीए।” 4तैसेरे अम्मा बाजी ज़ानते न थिये कि ई गल यहोवारे तरफांए, कि तै पलिश्ती लोकां केरे खलाफ मौको तोपते। तैस मौके त पलिश्ती इस्राएली लोकन पुड़ हुकूमत केरते थिये।
5तैखन शिमशोन अपने अम्मा बाजी साथी नेइतां तिम्नाह नगरे जो च़ेलतां तिम्नाह नगरेरे दाछ़री बागरे नेड़े पुज़्ज़ो, तैड़ी तैसेरे सामने अक जुवान शेर गरज़ने लगो। 6तैखन यहोवारो आत्मा तैस पुड़ बड़े ज़ोरे सेइं अव, ते चाहे तैसेरे हथ्थे मां किछ न थियूं, फिरी भी तैनी तै एरहो छ़िन्दतां छ़डो ज़ेन्च़रे छ़ेड़ू। ज़ैन तैनी कियूं तैन तैनी अपने अम्मा बाजी सेइं न ज़ोवं।
7तैखन तैनी गेइतां तैस कुइये सेइं गल-बात की; ते तै शिमशोने बड़ी रोड़ी लगी। ते तैसेरे बाजे तैसेरे ड्लाहेरी तियारी की। 8किछ दिहाड़े बीतने पुड़ तै तैस कुइये सेइं ड्लाह बनानेरे लेई तिम्नाह नगरे जो च़लो; ते तैस मरोरे शेरे हेरनेरे लेई तैस बत्तां जेव, ते कुन हेरू कि शेरेरे लाशी मां गण ते कने माछ़ी भी आहे। 9तैखन तै तैस मरां किछ हथ्थे मां नेइतां खातो-खातो अपने अम्मा बाजी कां जेव ते तैन्न भी दित्तू, पन इन न ज़ोवं, कि मीं एन तैस शेरेरे लाशी मरां केढतां आनू, ते तैनेईं भी तैन खावं।
10तैखन तैसेरो बाजी तैस कुइये कां तिम्नाह नगरे मां जेव, ते शिमशोने जुवाना केरे रुवाज़ेरे मुताबिक तैड़ी धाम दित्ती। 11तैस हेरतां तैनेईं तैस सेइं साथी रानेरे लेई 30 ज़ने साथी आने। 12शिमशोने तैन सेइं ज़ोवं, “अवं तुसन अक पुनानी पुछ़ताई; अगर तुस इस धांमरे सत्ते दिहाड़ां केरे अन्तर तैसेरो मतलब सेमझ़तां ज़ोथ, त अवं तुसन 30 कुरते ते 30 जोड़ी लिगड़ां देइलो; 13ते अगर तुस तैसेरो मतलब न ज़ोई सकथ, त तुसेईं मींजो 30 कुरते ते 30 जोड़ी लिगड़ां देनां पेन्न।” तैनेईं तैन सेइं ज़ोवं, “अपनि पुनानी ज़ो, कि अस तैस शुनम।” 14तैनी तैन सेइं ज़ोवं, “खानेबाले मरां खानेरे लेई, ते ताकतबरे मरां मिट्ठी चीज़ निस्सी।” एस पुनैनरो मतलब तैना ट्लेइ दिहाड़े तगर न ज़ोई सखे।
15जशन मनानेरे च़ेवरोवं दिहाड़े तैनेईं शिमशोनेरी लैड़ी सेइं ज़ोवं, “अपने मुन्शे करां भेद कढ कि तै असन पुनैनरो मतलब ज़ोए, नईं त अस तीं तेरे बाजेरे घरे समेत अग्गी मां फुकेले। कुन तुसेईं लोकेईं इश्शू धन नेनेरे लेई असन धाम ज़ोवरीए? कुन ईए गल नईं?” 16तैखन शिमशोनेरी कौन्श एन ज़ोइतां तैसेरे सामने लेरां देने लगी, “तीं त मीं सेइं प्यार नईं, तू मीं सेइं बैरे रखतस; कि तीं अक पुनानी मेरे कौमरे लोकन सेइं त ज़ोवरीए, पन मीं सेइं तैसेरो मतलब भी नईं ज़ोवरो।” तैनी ज़ोवं, “मीं तैन अपने अम्मा या बाजी सेइं भी नईं ज़ोवरू, फिरी कुन अवं तीं सेइं ज़ोईं?” 17धांमरे सत्ते दिहाड़न मां शिमशोनेरी कौन्श तैसेरे सामने लेरां देती राई; ते सत्तोवं दिहाड़े ज़ैखन तैसा तै बड़ो तंग कियो; तैखन तैनी तैस पुनैनरो मतलब ज़ोव। तैखन तैसां अपने कौमरे लोकन सेइं ज़ोवं। 18सत्तोवं दिहाड़े हेजू दिहाड़ो डुबोरो न थियो कि तैस नगरेरे मैन्हेइं शिमशोने सेइं ज़ोवं, “मैछ़ी करां जादे कुन मिट्ठू आहे? ते शेरे करां जादे कौन ज़ोरे बालोए?” तैनी तैन सेइं ज़ोवं, “अगर तुस मेरी बछ़ड़ी हल्ली मां न जोट्लेथे, ते मेरी पुनानी कधी न समझ़ेथे।”
19तैखन यहोवारो आत्मा शिमशोने पुड़ बड़े ज़ोरे सेइं अव, ते तैनी अश्कलोन नगरे जो गेइतां तैड़ी 30 मैन्हु मारे, ते तैन केरि धन-दौलत लुटतां 30 जोड़े पुनैनरो जुवाब देनेबालां केरे लेई दित्ते। तैखन तैस बड़ी सरक अई, ते तै अपने बाजी केरे घरे जो जेव। 20शिमशोनेरे कौन्शरो ड्लाह तैसेरे शेहरे शिमशोनेरे एक्की दोस्ते सेइं कियो, ज़ैना धामी मां 30 मैन्हु एवरे थिये तै तैन मरां अक थियो।
