ಯೇಸು ಮಹಾನ್ ಪ್ರಧಾನ ಯಾಜಕ
14ಆಬ್ಮಾಕರಿ ಗಯೋತೆ ದೇವ್ನೊ ಛಿಯ್ಯೊಹುಯಿರೊತೆ ಯೇಸುಸ್ ಅಪ್ಣುನ ಏಕ್ ಮಹಾಯಾಜಕ್ ಹುಯಿರ್ಹೊಸ್. ಇನಖ್ಹಾಜೆ ಅಪ್ಣೆ ಛಾ಼ತೆ ವಿಶ್ವಾಸ್ ಘಟ್ ಧರಿಲಿಯೆ. 15ಶನಕತೊ ಅಪ್ಣುನ ಛಾ಼ತೆ ಮಹಾಯಾಜಕ್ ಅಪ್ಣಿ ಕಮ್ಜೋ಼ರಿಮ ಅಪ್ಣುನ ಗೋರ್ ವತಳಾಕೊಂತೆ ರ್ಹೆಯಿಕೊಯ್ನಿ. ಯೊ ಹರೇಕ್ ವಾತೆನಿ ಬಾರೇಮ ಅಪ್ಣಿನಿತರಸ್ ಶೋದನೆ ಪಡ್ಯೊಹುಯೊ. ಕತೋಬಿ ಇನೆ ಪಾಪ್ ಕರ್ಯೊಸ್ ಕೊಯ್ನಿ. 16ಇನಖ್ಹಾಜೆ ಅಪ್ಣೆ ಬರಾಬರ್ನಿ ವೇಳ್ಮ ಗೋರ್ನ ಲಿಲ್ಯಾವನಖ್ಹಾಜೆ ಇನಿ ವಾರ್ಖ್ಹೇಥಿ ಅಪ್ಣುನ ಬರಾಬರ್ನಿ ವೇಳ್ಮ ಮದತ್ನಖ್ಹಾಜೆ ಹಿಮ್ಮಥ್ಥಿ ಇನಿ ಕೃಪಾಸನ್ನ ಖ್ಹಾಮ್ಣೆ ಅಯ್ಯೆ.
1ಅದಮ್ಜ಼ಮಾನ ಮಾಥು ಹರೇಕ್ಜ಼ಣೊ ಮಹಾಯಾಜಕ್ ಚೂ಼ಣೈನ್ ಅದ್ಮಿವೋನಖ್ಹಾಜೆ ದೇವ್ನು ಕಾಮ್ಕರಾನ ನೇಮಕ್ಹುಯೊ, ಯೋ ಪಾಪ್ನ ಪರಿಹಾರ್ನಖ್ಹಾಜೆ ಕಾಣ್ಕೆಬಿ ಅಜು಼ ಬಲಿ ದೆವ್ಣು. 2ಯೋಬಿಜಿನು ತಾಖತ್ಕೊಂತೆ ಇನಖ್ಹಾಜೆ ಯೋ ಖ್ಹಯಿಲನಾಬಿ, ಅಜು಼ ವಾಟ್ ಛು಼ಕವಾಳನಾಬಿ ದಯಾ ಕರಾನ ಶಕತ್ವಾಳೊ ಹುಯಿರ್ಹೊಸ್. 3ಆ ಕಮ್ಜೋ಼ರಿನ ಖ್ಹಾಜೇಥಿ ಯೋ ಅದ್ಮಿನಖ್ಹಾಜೆ ಕಿಮ್ಕಿ ತಿಮ್ಮಸ್ ಇವ್ಣ ಇವ್ಣ ಪಾಪ್ನಖ್ಹಾಜೆ ಬಲಿ ದೆವ್ಣು. 4ಕೋಣ್ಬಿ ಇನೇಥಿ ಯೋಸ್ ಆ ಇಜ಼್ಜತ್ನಿ ಪದವಿನ ಲೀಲ್ಯಾವನ ಕೊಹುವ್ವಾನಿ, ಕತೊ ಆರೋನನಿ ಘೋಣಿಸ್ ದೇವ್ಥಿ ಬುಲಾವವಾಳೊ ಹುಯಿನ್ ಇನಾಭಣಿ ಕರಿರಾಖ್ಯೋಸ್. 5ಇಮ್ನಿಸ್ ಪರಕ್ಮ ಕ್ರಿಸ್ತಬಿ, ಮಹಾಯಾಜಕ ಕರಿ ಇನುಯೋಸ್ ಮಹಿಮೆ ಕರೀನ್ ಪಸಂದ್ ಕರ್ಯೊಕೊಯ್ನಿ. ಕತೋಬಿ “ತೂ ಮಾರೊ ಛಿಯ್ಯೊ, ಆವಖ್ಹತ್ ಮೇ ತುನ ಬಾ ಹುಯಿರ್ಹೊಸ್. 6ಇನೆ ಬಿಜೇಕ್ ಬಾಜೂ಼ಮ, “ತೂ ಹರ್ಹಗಾಮ್ಬಿ, ಮೆಲ್ಕಿಜೆದೇಕ್ನೊ ಘೋಣಿನೊ ಯಾಜಕ” ಕರಿ ಬೋಲಿರಾಖ್ಯೊಸ್.
7ಕ್ರಿಸ್ತ ಯೋಸ್ ಜಗತ್ಮ ಅದ್ಮಿಹುಯಿನ್ ಜಿವ್ಣು ಕರ್ಯೊತೆ ಹಗಾಮ್ಮ ಮರಣ್ಥಿ ಛು಼ಕೈನ್ ಬಚಾ಼ಡನು ಶಕತ್ವಾಳನ ಘಟ್ಥಿ ಪ್ರಾರ್ಥನೆ ಕರ್ತೊಹುಯಿನ್ ಡೋಳಾನ ಆಂಝೇ಼ಥಿ ಪ್ರಾಥರ್ನೆನಿ ಬಿಂತಿ ಕರ್ಯೊ. ಇನಖ್ಹಾಜೆ ದೇವ್ನ ಉಪ್ಪರ್ಥೀತೆ ಡರ್-ಭಕ್ತಿನಖ್ಹಾಜೆ ಇನಿ ಪ್ರಾರ್ಥನೆನ ದೇವ್ನೆ ಖ್ಹಮ್ಜ್ಯೊ. 8ಕತೋಬಿ ಯೋ ಛಿಯ್ಯೊ ಹುಯಿರ್ಹೊತೋಬಿ ಇನೆ ಲಿದೋತೆ ವದೇಖ್ಹ್ಥೀಸ್ ಹೇಟು ಹುವಾನು ಶಿಕಿಗಯೊ. 9ಆ ನಾಹುಯಿನ್ ಇನೆ ಭರ್ಪೂರ್ ಕರೀನ್, ಇನ ವಿಧೇಯಹುವಾಳ ಅಖ್ಖನಾಬಿ ಹಮೇಶ ರಕ್ಷಣೆನಖ್ಹಾಜೆ ಬಣ್ಯೊ. 10ಕಾಹೆತೆ ಯೊ “ಮೆಲ್ಕಿಜೆದೇಕ್ನೊ ಘೋಣಿನೊ” ಮಹಾಯಾಜಕ್ ಹುಯಿನ್ ದೇವ್ಥಿ ನೇಮಕ್ ಹುಯೊ.
