Jiso le muh wu lɛme wù Nyo le wu cha
15Jiso kɛɛ kune ntaŋ wu ba chu, wu mo wu ja fo. Bamii ba duude bi wu le. Wu fɛ bo bachii ba gɛ̀ kɛme binchɛŋ, 16wu chiisɛ bo le lɛ keefɛ bo gê bamii kɛɛ wu gɛ. 17Fi gɛ̀ bee noo ki fi gê fi kojɛ no muh wu ntuŋ wu Nyo wù Yosaya gɛ̀ jɛme lɛ,
18“Bɛŋ jîŋɛ bɛŋ yɛ̂ŋ, wunɛ le mwa yaŋ wu lɛme wù nle ncha.
Ŋkoŋe wu, fitele fiaŋ yuge njoŋ bɛ wu.
Nlé ŋgê nnyâ Kiyo kaŋ wu le,
wu fêeji bamii ba le gɛ Bajuu le gɛ kune je yì chaaŋ yì wu suune bansa yu.
19Gɛ wu nyu wu wâade bɛ bamii gɛ, kɛnɛ wu kune jwe gɛ.
Gɛ muh nyu wu yu jɛ ye yi bifiaŋ bi jé le gɛ.
20Gɛ wu nyu wu mɛ̂sɛ wu ŋgode gane chì ŋgvuusɛ wa gɛ.
Gɛ wu nyu wu jîŋsɛ kin'yesɛ kì bɛde jibejibe gɛ.
Fi lé fi nyû noo gɛɛŋ bu no wu lé wu fɛ̂ je yì chaaŋ,
yì wu suume bansa yu lé yi sô.
21Bamii ba le gɛ Bajuu gɛ bachii lé bo gê bo jîiŋe fwe bo gɛɛ bvufee yi wu le.”
