Raraŋ Aetaniacna Nuoca mbaiŋna aiŋa morena ŋerŋgaurmo tamuŋmbai ŋgoin
4Na Aetta ma ndona Nuocmo an i neaŋrinan, an ia anna ma laŋ ŋgoin, na ma mbaiŋna aiŋa morena ŋerŋgaurta irembmo kunda tamuŋ ŋgoin ndeacrena. Ainda moca ma an Nuocmo, Kacoot ŋgacatna, na mina mana kaŋgauk ndeacrena. 5Na atua Raraŋ Aetaniaca ma ndona Nuocmo gaindopatna,
“U aukna Nuoc.
Na mandeaca aku una Aet ndarurina.”
Ri, ma gaind mac mambopat, “Na aku mana Aet ndeacraŋnandet, na ma aukna Nuoc ndeacraŋnandet.” Ainda moca Raraŋ Aetaniaca titocna mbaiŋna aiŋa morena ŋeroŋ ianmo aintocna kam ndopatna? Wanaiŋ ŋgoin. 6Na an mɨnna ma ndona guina Nuocmo gan tiacarpaik naaŋgɨa kɨprinanna, Raraŋ Aetaniaca ma gaindopatna, “Raraŋ Aetaniacna mbaiŋna aiŋa morena ŋerŋgaura muruŋcamiŋa manmo tutpemb rɨmbɨtca mana imo aŋgɨ ŋgep.” 7Na Raraŋ Aetaniaca ma an mbaiŋna aiŋa morena ŋerŋgaurta moca ma minmo gaind malamŋiat, na ma kammo gaind mambopat,
“Ma ndona mbaiŋna aiŋa morena ŋerŋgaurmo
watna kirar toca moca
mina aintan toco ndarurina.
Na ma ndona aiŋa morena ramtaɨrmo
tacna mimna kirar toca moca larurenan.”
8Na ma Nuocmo gaindopatna,
“Raraŋ Aetaniac,
u gagrirta ramoot,
u memetmbaca iarwara eacraŋnandet.
Na u ndona meikramtaɨrmo
tɨpemb kirarir wandoik
laiŋ tiŋgik mbuŋa bubuocrenan.
9Na u tɨpemb kirarir wandoik laiŋ tiŋgikca toŋgorenan,
na tɨpemb kirarir ŋgorikmo,
u mba toŋgorenan ŋgoin.
Aintik una Raraŋ Aetaniaca
ma ndo una paŋanmo tabaɨrmo ruŋkirinan,
na unmo ma larapacatna,
moca u irembapna ramootna kirar toc ndaruatna.
Na anna ndo unmo moca
u toŋtoŋ ŋgoin.
Na una aikora
mina un toŋgorena mɨnna mba toŋgoitndai.”
10Na ma Nuocmo gaind mac mambopat,
“Kacoot, atu ŋgoinna
u gan tiacarpaikca moca
ma eacrenan.
Na una par mbuŋ ŋgoinna,
u tamuŋna auŋna reikapa riacmo u moatnan.
11Na gan tiacarpaikapa riaca
mainandet,
na u memetmbaca eacraŋnandet.
Na maniŋa
raraŋit bagarna kirar toc ndaruca
mumutacarinande.
12Na u maniŋmo
racaep toco rukumnandet.
Na u maniŋmo ramootta
tik ŋgapaoc toc ŋgetrikirena kirar toc.
Na u aind niŋgik ndeacraŋnandet,
u mba ŋgetrikirenan.
Na u mba menacitndait.”
13Na atua Raraŋ Aetaniaca mana Nuocmo gaindopatna,
“U aukna par umbaia mbirac te,
aku una puŋnaŋgepmo
una kaŋgaukca tɨknande.”
Na Raraŋ Aetaniaca titocna mbaiŋna aiŋa morena ŋerŋgaurta ianmo an kam ndoprinan? Wanaiŋ ŋgoin. 14Na mbaiŋna aiŋa morena ŋerŋgaura, mina ŋerŋgaur tiŋgik, na mina Raraŋ Aetaniacna aiŋa morenan. Na ma minmo mandaca mina taŋga an meikramtaɨra, ma minmo nda aŋgɨnanmo otacrenan.
