የሩሳላመን ደእያ አሳ

1እስራኤለ አሳ ኡባይ ባ የለታን የለታን፥ እስራኤለ ካዎታ ማፃፋን ፃፈትድ ደኤስ።

ይሁዳ አሳይ ጎዳስ አማነትቦና ግሾ ባብሎነ ቢታ ድኤትድ ብዶሶና። 2ኮይሮ ስሚድ ባንታ ቢታንነ ባንታ ካታማታን ኡትዳይ ጉ እስራኤለ አሳታ፥ ካህነታ፥ ሌወታነ ፆሳ ኬ ኦሳንቾታ። 3ይሁዳፐ፥ ብንያመፐ፥ ኤፍሬማፐነ ምናሰፐ ጉ አሳት ይድ የሩሳላመን ደእዶሶና።

4ይሁዳ ናኣ ፓረሳ ያራፐ ኡታይ የሩሳላመን ደኤይሳታስ ሀላቃ። ኡታይ አምሁዳ ናአ፤ አምሁድ ኦምራ ናአ፤ ኦምር እምራ ናአ፤ እምር ባና ናአ።

5ይሁዳ ናኣ ሴላ ያራፐ አሳይነ እያ ናይት የሩሳላመን ደኤይሳታስ ሀላቃ።

6ይሁዳ ናኣ ዛራ ያራፐ ይኡኤል የሩሳላመን ደኤይሳታስ ሀላቃ።

ይሁዳ ኮቻ ታይቦይ ኡሱፑን ፄታነ ኡዱፉን ታማ።

7ብንያመ ያራ ሀላቃት ሀይሳፈ ካልድ ፃፈትዳይሳታ።

ማሱላማ ናኣ ሳሉ፥ ሆዳዋ ናኣ ማሱላማ፥ ሀሰናኡ ናኣ ሆዳዋ፥ 8ይሮሃማ ናኣ ይብናያ፥ ኦዛ ናኣ ኤላ፥ ምክራ ናኣ ኦዛ፥ ሳፋፃ ማሱላማ፥ ራኡላ ናኣ ሳፋፃ፥ ይብና ናኣ ራጉኤላ። 9ብንያመ ኮቻ ታይቦይ ኡዱፉን ፄታነ እሻታማነ ኡሱፑና። ሀይሳቲ ኡባይ ባንታ ሶ አሳ ሀላቃታ።

10የሩሳላመን ደእዳ ካህነት ሀይሳፈ ካልድ ፃፈትዳይሳታ።

ኤንቲ ዮዳሀ፥ ዮራባ፥ ያክናነ 11ፆሳ ኬን አዋትያ አዛርያሳ። አዛርያስ ካልቀ ናአ፤ ካልቀይ ማሱላማ ናአ፤ ማሱላም ሳዶቃ ናአ፤ ሳዶቅ ማርዮታ ናአ፤ ማርዮት አክፆባ ናአ።

12ሀራት ቃስ ይሮሃማ ናኣ አዳያነ አድኤላ ናኣ ማእሰያ። ይሮሃም ፓስኮራ ናአ፤ ፓስኮር ማልክያ ናአ። አድኤል ያህዜራ ናአ፤ ያህዜር ማሱላማ ናአ፤ ማሱላም ማሽልሞታ ናአ፤ ማሽልሞት እመራ ናአ።

13ባንታ ሶ አሳስ ሀላቃ ግድዳ ካህነታ ታይቦይ 1,760. ሀይሳቲ ፆሳ ኬን ኦናዉ ዳንዳእያ አሳታ።

14የሩሳላመን ደእያ ሌወት ሀይሳፈ ካልድ ፃፈትዳይሳታ።

ሀሹባ ናአይ ሻማየይ ማራራ ያራ። ሀሹብ አዝርቃማ ናአ፤ አዝርቃም ሀሳባያ ናአ።

15ሀራት ቃስ ባቅባቃራ፥ ሄሬሳ፥ ጋላላነ ማታና። ማታን ምካ ናአ፤ ምክ ዝክራ ናአ፤ ዝክር አሳፋ ናአ።

16ሀራት ቃስ ናፆፋታ ጉታን ኡትዳይ አብድዩነ ባራካ። አብድዩይ ሻማእያ ናአ፤ ሻማኤይ ጋላላ ናአ፤ ጋላል የዱቱና ናአ፤ ባራክ አሳ ናአ፤ አስ ኤልቃና ናአ።

17ካዎ ፐንግያ ናገይሳት፥ ሳሉማ፥ አቁባ፥ ታልሞና፥ አህማናነ ኤንታ እሻታ፤ ሳሉም ኤንታ ሀላቃ። 18ኤንቲ ዉሎሀ ባጋራ ደእያ፥ ካዎ ፐንግያ ናግዶሶና። ሀይሳፈ ካሰ ኤንቲ ሌወት ዱንካንዳ ጉታ ናጎሶና።

19አብሳፋ ናኣ ናአይ ቆረ ናአይ ሳሉም ቆረ ያራ። ቆረ ያራይ ካሰ ጎዳ ዱንካንያ ናግዳይሳዳ ሳሉምነ ቆረ ኮቸ ግድዳ እያ ዳቦት ፆሳ ኬ ፐንግያ ናጎሶና።

20አላዛራ ናአይ ፕንሃስ ካሰ ቆረ ያራ ሀላቃ፤ ጎዳይ እያራ ደኤስ።

21ማሱላማ ናአይ ዛካርያስ ዱንካንያ ግዶ ገልያ ፐንግያ ናጌስ።

22ፐንግያ ናጋናዉ ዶረትዳይሳት ኩመ ናምኡ ፄታነ ታማነ ናምአ፤ ሄሳት ባንታ ጉታን ጉታን ታይበትድ ፃፈትዶሶና። ኤንታ ያራስ ሀ አዋተ እምዳይ ካዋ ዳዊታነ ናብያ ሳሜላ። 23ሄሳ ግሾ፥ ኤንትነ ኤንታ ናይት ፆሳ ኬ ፐንግያ ናጎሶና። 24ኦይዱ ባጋራ ዶሎሀን፥ ዉሎሀን፥ ፑደሀን ዱገሀን እስ እስ ፐንገይ ደኤስ፤ ሄ ፐንገታ ናገይሳት ደኦሶና። 25ሄ ጉታን ደእያ ኤንታ ዳቦት ላፑን ጋላሳን ጋላሳን ላመትድ፥ ናግድ ኤንታ ማዶሶና።

26ፐንግያ ናግያ ኦይዱ ሌወት ሀላቃ፤ ኤንቲ ፆሳ ኬ ክፍለታነ ክፍለታ ግዶን ደእያ ሚሸታ አዋተን አይሶሶና። 27ፆሳ ኬ ናገይነ ዎንታ ጉራ ካርያ ዶየይ ኤንታ ግድያ ግሾ ያን አቆሶና።

28ሌወታፐ ጉት ጎይኖ ዎደ ጎኤትያ ሚሸታ ናጎሶና፤ ሄ ሚሸታ ካረ ከሰይነ ሶ ገልሰይ ኤንታ። 29ኤንታፈ እሶት እሶት ፆሳ ኬን ጎኤትያ ሀራ ሚሸታ፥ ለ፥ ዎይነ ኡሹ፥ ዛይተ፥ እፃነነ ሳዎታ አዋተን አይሶሶና። 30ሽን ካህነታ ናይታፐ ባጋት ሳዉዋ ዋላኮሶና።

31ቆረ ኮቻፈ ሳሉማ ባይራ ናአይ ማታታስ ያርሾ ኡይ ኡክስያ አዋተ ደኤስ። 32ቃሃታ ያራ ግድያ ኤንታ ዳቦታፐ ባጋት ሳምባታን ሳምባታን ፃርጴዛ ቦላ ዎያ ኡይ ጊግስያ አዋተ ኤክዶሶና።

33ሌወ ኮቻፈ ጉ ሀላቃት ፆሳ ኬን የፀይሳታ። ቃማነ ጋላስ ኤንቲ ኦያ ግሾ ሀራ ኦሶ ኦና ፆሳ ኬ ድርሳ ግዶን ደእያ ኬታን ደኦሶና።

34ሀይሳቲ ኡባይ ሌወ ሶ አሳ ሀላቃታ፤ ኤንቲ የሩሳላመን ደእዶሶና።