ዳዊቲ አሞነታ ፆኑዋ
(2 ሳሜ 10:1-19)
1ሄሳፈ ጉየ፥ አሞነ ካዎይ ናኦስ ሀይቅን እያ ናአይ እያ በሳን ካዎትስ። 2ዳዊቲ፥ “እያ አዋይ ናኦስ ታዉ ኬህዳ ግሾ ታኒ እያ ናኣ ሀኑናስ ኬሀና” ያግስ። ሀኑና አዋይ ሀይቅዳ ግሾ ዳዊቲ እያ ምንናዉ አሰ ኪትስ።
ዳዊቲ ኪትዳ አሳት ሀኑና ምንናዉ አሞነ ጋክዳ ዎደ፥ 3አሞነ ሞርናት ሀኑናኮ፥ “ዳዊቲ ነ አዋ ቦንችድ ነና ምንናዉ ሀ አሳታ ኪትስ ጋዳ ኔ ቆፓይ? እ ሀ አሳ ኪትዳይ ሀ ካታማ ዎችድ፥ ኦላናሳ” ያግዶሶና።
4ሀኑኒ ዳዊቲ ኪትዳ አሳታ ኦይክድ፥ ኤንታ ቡቻ ሜድስ፤ ኤንታ ማኡዋ ጋርሳፈ ዱለ ጋካናዉ ቃንፅድ ኤንታ የድስ። 5ሄሳ ግሾ፥ አሳት ዳሮ ዬላትዶሶና። ዳዊቲ ሄሳ ስእድ፥ ኤንታኮራ አስ ኪትድ፥ “ህንተ ቡቻይ ድጫና ጋካናዉ እያርኮ ካታማን ደእተ፤ ሄሳፈ ጉየ ሃ ዪተ” ያግስ።
6አሞነት ባንታ ኩሸን ዳዊቲ ኤንታ ሞርካና መላ ኦዳይሳ ኤርዳ ዎደ ማሰጰፆመንነ ሶረን ደእያ ማእካነ ሱባ ካታማታፐ ፓራ ጋረታነ ፓራታ ጋርፃናዉ 34,000 ክሎ ግራመ ብራ ሳንትመ የድዶሶና። 732,000 ፓራ ጋረታ፥ ፓራታ፥ ማእካ ካዋነ እያ ኦላንቾታ ሚሸን ጋርፅን ይድ መዳባን ዱንካንዶሶና። ቃስ አሞነት ባንታ ካታማፐ ከይድ ኦላስ ጊገትዶሶና።
8ዳዊቲ ሄሳ ስእዳ ዎደ እዮኣባነ ኦላንቾታ የድስ። 9አሞነት ከይድ ካታማ ፐንገን ኦላስ ሳልፕዶሶና። ኤንታ ማዳናዉ ይዳ ካዎት ባንታ በሳ ኦይክድ ደንባን ሺቅዶሶና።
10እዮኣብ ኦል ስንራነ ጉየራ ተቅዳይሳ በእዳ ዎደ እስራኤለታ ግዶፈ ምኖ ኦላንቾታ ዶርድ፥ ሶረ ኦላንቾታ ስንን ሳልፕስስ። 11አትዳ አሳ ባ እሻ አብሳ አዋተ ጋርሳን ዎስ፤ ኤንቲ አሞነታ ስንን ሳልፕዶሶና። 12እዮኣብ ባ እሻ አብሳኮ፥ “ሶረ አሳት ታ ቦላ ዎልቃምኮ፥ ኔኒ ያዳ ታና ማዳ። አሞነ አሳት ነ ቦላ ዎልቃምኮ፥ ታኒ ያዳ ነና ማዳና። 13ህዛ ምና! ኑ አሳ ግሾነ ኑ ፆሳ ካታማታ ግሾ አነ ምንድ ኦለቶስ። ጎዳይ ባና ሎእያባ ኦ” ያግስ።
14ሄሳፈ ጉየ፥ እዮኣብነ እያራ ደእያ አሳይ ሶረ ኦላንቾታራ ኦለታናዉ ከይዶሶና። ያትን፥ ሶረ አሳይ እያ ስንፈ ባቃትዶሶና። 15ሶረ አሳይ ባቃትዳይሳ አሞነ አሳይ በእዳ ዎደ ኤንትካ እያ እሻ አብሳያ ስንፈ ባቃትድ ካታማ ገልዶሶና። ሄሳፈ ጉየ፥ እዮኣብ የሩሳላመ ስምስ።
16ሶረ አሳይ እስራኤለ አሳይ ኤንታ ፆንዳይሳ ኤርዳ ዎደ አሰ ኪትድ ኤፍራፂሳ ሻፋፐ ሄፍንራ ደእያ ሶረ አሳ ኤህዶሶና። ቶራ ሞጮናይ አድራዛር፥ ሾፋክ ኤንታ ካለስ።
17ዳዊቲ ሄሳ ስእዳ ዎደ እስራኤለ ኦላንቾታ ሺሽድ፥ ዮርዳኖሰ ሻፋ ፕንድ ሶረ አሳራ ኦለታናዉ ኤንታ ስንን ሳልፕዶሶና። ዳዊቲ ኤንታራ ኦለታናዉ ሳልፕን ኤንትካ እያራ ኦለትዶሶና። 18ሶረ አሳይ እስራኤለታ ስንፈ ባቃትዶሶና፤ ዳዊቲ ሶረ አሳፐ ፓራ ጋረ ላግያ 7,000 አሳነ 40,000 ቶሆ አሳነ ኤንታ ቶራ ሞጮና ሾፋካ ዎስ። 19አድራዛራ ኦላንቾት እስራኤለታን ፆነትዳይሳ ኤርዳ ዎደ ዳዊታራ ስገትድ፥ እያዉ ሃረትዶሶና። ሄሳፈ ጉየ፥ ሶረ አሳይ አሞነ አሳ ማዳናዉ ዶስቦኮና።
