ዳዊታነ ዮናታና
1ዳዊቲ ሳኦላራ ሃሳያ ዉርስዳፐ ጉየ፥ ሳኦላ ናአይ ዮናታን ዳዊታራ ዳሮ ማታ ዳቦተ መስ፤ ዮናታን ዳዊታ ባ ሸምፑዋዳ ዶስስ። 2ሄ ጋላሳፐ ዶምድ፥ ሳኦል ዳዊታ ባራ ዎስ፤ ባ አዋ ሶ ጉየ ስሞና መላ ድግስ። 3ዮናታን ዳዊታ ባ ሁጰዳ ዶስያ ግሾ እያራ ጫቅስ። 4ዮናታን ባ ማእዳ ካባ፥ ባ ኦላ ማኡዋ፥ ባ ማሻ፥ ባ ዶንግያነ ባ ሳቅያ ከስድ ዳዊታስ እሚስ።
5ሳኦል ኪትዳ ኡባ ዳዊቲ ናገትድ ኦያ ግሾ፥ ሳኦል ዳዊታ ባ ኦላንቾታ ግዶን ሀላቃ ኦድ ሹምስ። ሄስ አሳ ኡባነ እያ ሞርናታ ኡፋይስስ።
6ዳዉተ ፍልስፄመ አድያ ጎልያዳ ዎን፥ አሳይ ሶ ስምያ ዎደ ማጫሳይ ኡፋይሳ የ የፅሸነ ዱርሸ፥ ካራቦ ባቅሸነ ዲ ዲፅሸ፥ ካዋ ሳኦላ ሞካናዉ እስራኤለ ካታማታ ኡባፈ ከይዶሶና። 7ማጫሳት ዱርሸ፥
“ሳኦል ሙኩላታ ዎስ፤
ዳዊቲ ታሙ ሙኩላታ ዎስ”
ያግድ የፅዶሶና። 8ሳኦላ ሀ የይ ሻትን፥ ዳሮ ሀንቀትስ። ሳኦል ባ ቆፋን፥ “ዳዊቲ፥ ‘ታሙ ሙኩላታ ዎዳሳ ግድ፥ ታና ሙኩላታ ዎዳሳ’ ግዶሶና። ያትን፥ ካዎተፈ አትሽን ሀር አይብ አትዴ?” ያግስ። 9ሄ ዎደፐ ዶምድ ሳኦል ዳዊታ ቃናተ አይፈን ፄሌስ።
10ዎንተ ጋላስ ኢታ አያን ፆሳፈ ኪተትድ ሳኦላ ኦይክን፥ ሳኦል ባ ሶን ኤልሞቴስ። ዳዊቲ ካሰይሳዳ ዲ ዲፅሽን ሳኦል ቶራ ባ ኩሸን ኦይክድ ኡትስ። 11እ፥ “ዳዊታ ጎዳራ ጋዳ ስካና” ያግ ቆፕድ ቶራ ፆንግስ። ሽን ዳዊቲ ናምኡ ቶሆ እያፐ አትስ።
12ጎዳይ ሳኦላ አግድ ዳዊታራ ደእያ ግሾ ሳኦል ዳዊታ ያይስ። 13ሳኦል ዳዊታ ባ ስንፈ ሃሳናዉ ኮይድ ሙኩሉ ኦላንቾታስ ሀላቃ ኦስ። ያትን፥ ዳዊቲ ባ ጩጋ ኦላስ ካለስ። 14ጎዳይ ዳዊታራ ደእያ ግሾ እ ኦያባይ ኡባይ እያዉ እንጀቴስ። 15ዳዊቲ ኦያባ ኡባይ እንጀተይሳ ሳኦል በእድ እያዉ ዳሮ ያይስ። 16ሽን ዳዊቲ ኤንታ ኦላን ካለያ ግሾ እስራኤለ አሳይነ ይሁዳ አሳ ኡባይ እያ ዶሶሶና።
17ሳኦል ዳዊታኮ፥ “ታ ናአ ባይርያ መራባ ሀናሹ፤ ታኒ እዮ ነዉ ማቾ እማና፤ ኔኒ ምኖ አስ ግዳ፤ ጎዳ ኦላ ኦለታ” ያግስ። ሳኦል ባ ዎዛናን፥ “ታኒ እያ ቦችከ፤ ፍልስፄመት እያ ዎ” ያግድ ቆፕስ። 18ሽን ዳዊቲ፥ “ካዎራ ቦሎታናዉ ታኒ ኦኔ? ታ ሶ አሳይ አይቤ? ዎይኮ ታ አዋ ያራይ እስራኤለ አሳ ግዶን አይቤ?” ያግስ። 19ሽን ሳኦላ ናእያ መራባ ዳዊታስ እመትያ ዎደይ ጋክን፥ ማሆላ አድያ አድርኤላስ እመታሱ።
20ግዶሽን፥ ሳኦላ ናእያ መልኮላ ዳዊታ ዶሳሱ፤ ሳኦል ሄሳ ስእድ ኡፋይትስ። 21እ ባ ዎዛናን፥ “እያዉ ፅሄ ግዳና መላነ ፍልስፄመት እያ ዎና መላ ታኒ ምልኮሎ ዳዊታስ እማና” ያግድ ቆፕስ። ሄሳ ግሾ፥ ሳኦል ዳዊታ፥ “ኔኒ ታራ ቦሎታናዉ ናምአን ቃዳ ነዉ እማስ” ያግስ።
22ሳኦል ባ ኦሳንቾታ ፄግድ፥ “ ‘ካዎይ ነናን ኡፋይትስ፤ እያ አይለት ኡባይ ነና ዶሶሶና፤ ሀእ ኔኒ ካዉዋራ ቦሎታ’ ያግድ ዱማ ዳዊታስ ኦድተ” ያግድ ኪትስ።
23ሳኦል ግዳይሳዳ ኤንቲ ዳዊታስ ኦድዶሶና። ሽን ዳዊቲ፥ “ካዎራ ቦሎታናይስ ህንተዉ ላፋባ ዳንዬ? ታኒ ማንቆነ ኤረቶና አስ” ያግድ ዛርስ።
24ሳኦላ ሞርናት ዳዊቲ ግዳባ ሳኦላስ ኦድዶሶና። 25ሳኦል ባ አይለታኮ፥ “ዳዊታስ ሀይሳዳ ያግድ ኦድተ፤ ‘ካዎይ ባ ሞርከታ ሀሎ ከያናዉ ፄቱ ፍልስፄመ አሳታ ቃራትድ ኤሀና መላፐ አትሽን፥ ኔፐ ሀራ ኮይታ ኮየና’ ያግተ” ያግስ። ሳኦል ሄሳ ግዳይ ዳዊቲ ፍልስፄመታ ኩሸን ሀይቃና መላ ቆፕዳ ግሾሳ።
26ሳኦላ አይለት ሳኦል ግዳባ ዳዊታስ ኦድዶሶና፤ ካዋራ ቦሎታናይስ ዳዊታ ኡፋይስስ። ዎደይ አናፐ ስን፥ 27ዳዊቲነ እያ አሳይ ደንድ ብድ ፍልስፄመታፐ ናምኡ ፄቱ አሳ ዎዶሶና። ዳዊቲ ካዋራ ቦሎታናዉ ሄ አሳታ ቃራት ኤህድ፥ ካዋስ ኩመ ታይብድ ሼስ። ሳኦል ባ ናእዉ መልኮሎ ዳዊታስ እሚስ።
28ሳኦል ጎዳይ ዳዊታራ ደኤይሳነ እያ ናእያ ምልኮላ ዳዊታ ዶሰይሳ ኤርስ። 29ሳኦል ዳዊታስ ካሰይሳፈ አድ ያይስ። ሳኦል ባ ደኦ ላይ ኡባን ዳዊታስ ሞርከ ግድስ።
30ፍልስፄመ ኦላንቾት ኦላስ ከስ አግቦኮና። ሽን ኦላስ ከይዳ ዎደ ኡባን ሳኦላ ቶራ ሞጮናታፐ አድ ፆኖይ ሀነይ ዳዊታሳ፤ ሄሳ ግሾ እ ኤረትዳ አስ ግድስ።
