ሳኦል ዳዊታ ዎናዉ ኮይስ
1ዳዊታ ዎና መላ ሳኦል ባ ናኣ ዮናታናስነ ባ ኦሳንቾታስ ኦድስ። ሽን ሳኦላ ናአይ ዮናታን ዳዊታ ዳሮ ዶሴስ። 2ሄሳ ግሾ፥ ዮናታን ዳዊታኮ፥ “ታ አዋይ ሳኦል ነና ዎናዉ ኮይያ ግሾ ዎንቶ ዎንታ ነና ናጋ፤ እስ በሳን ቆሰታዳ ደኣሻ። 3ታኒ ታ አዋራ ባዳ፥ ኔኒ ቆሰትዳ ጋድያን ኤቃና፤ ታኒ ነባ እያዉ ኦዳዳ፥ እያፐ ስእያባ ነዉ ኦዳና” ያግድ ኪትስ።
4ዮናታን ዳዊታ ናሽድ፥ ባ አዋ ሳኦላኮ ሀይሳዳ ያግስ፤ “ካዎይ ባ አይልያ ዳዊታ ቆህድ ናጋራ ኦፎ፤ እ ነና ቆህቤና፤ እ ኦዳባይ ነና ዳሮ ጎእስ። 5እ ፍልስፄመ አድያ ዎዳ ዎደ ባ ሸምፑዋስ ቃትቤና። ጎዳይ እስራኤለ ኡባስ ግታ ፆኖ እሚስ፤ ሄሳ በአዳ ነካ ኡፋይታዳሳ። ያትን፥ ኔኒ ጌሻ አስ ቆሀናዉ አይስ ቆፓይ? ጋሶይ ባይና ዳዊታ ዎናዉ አይስ ኮያይ?” ያግስ።
6ሳኦል ዮናታን ኦድዳባ ስእድ፥ “ደኦ ፆሲ ኤርያ መላ፥ ታኒ ዳዊታ ዎከ” ያግድ ጫቅስ።
7ዮናታን ዳዊታ ፄግድ ኤንቲ ኦደትዳባ ኡባ እያዉ ኦድስ። ያትድ ዳዊታ ሳኦላኮ ኤህን ዳዊቲ ካሰይሳዳ ሳኦላራ ደእስ።
8ፍልስፄመታራ ዛሪድ ሀራ ኦል ደንድስ፤ ዳዊቲ ከይድ ፍልስፄመታራ ኦለትድ፥ ኤንታ ግታ ሾቹ ሾጭን፥ ኤንቲ እያ ስንፈ ባቃትዶሶና።
9ሄሳፈ ስምን፥ ሳኦል ቶራ ኦይክድ ባ ሶን ኡትዳሽን፥ ኢታ አያን ጎዳፐ ኪተትድ እያ ኦይክስ። ያትን፥ ዳዊቲ ዲ ዲፅሽን፥ 10ሳኦል ዳዊታ ጎዳራ ጋድ ስካናዉ ቶራ ፆንግስ፤ ሽን ዳዊቲ እያፐ ደሽ ግድ አትን፥ ቶራይ ጎዳን ቶከትስ። ሄ ቃማ ዳዊቲ ከስ ኤክድ ባቃትስ።
11ዳዊታ ኬን ናግድ ዎንታ ዎና መላ ሳኦል አሰ ኪትስ።
ዳዊታ ማችያ መልኮላ፥ “ሀች ቃማ ኔኒ ነ ሸምፑዋ አሾና እፅኮ፥ ዎንቶ ሀይቃሳ” ያጋዳ ዳዊታስ ኦዳሱ። 12ምልኮላ ዳዊታ ማስኮተራ ከስን፥ ዳዊቲ ከስ ኤክድ ባቃትስ። 13ሄሳፈ ጉየ መልኮላ ኤቃ ምስለ ኤካዳ አርሳን ዝንእሳሱ፤ ሁጰሶን ዴሻ እክሰ ዎዳ አፍላ ማይዛሱ።
14ዳዊታ ኦይክድ ኤሀና መላ ሳኦል አሰ ኪትን ምልኮላ፥ “ዳዊቲ ሳከትስ” ያጋሱ።
15ዳዊታ በአና መላ ሳኦል ሄ አሳታ ጉየ ኪትድ፥ “ታኒ ዳዊታ ዎና መላ እያ አልጋራ ቶክድ ኤክ ዪተ” ያግስ። 16ሽን አሳት ሶ ገልያ ዎደ ኤቃ ምስለይ አርሳን ዝንእዳይሳነ እያ ሁጰሶን ዴሻ እክሰይ ደኤይሳ ደምዶሶና።
17ሳኦል መልኮሎ፥ “ኔኒ አይስ ሀይሳዳ ኦዳ ታና ጭማዲ? ታ ሞርከይ ከስ ኤካና መላ አይስ ኦዲ?” ያግስ።
ምልኮላ ዛራዳ፥ “እ ታኮ፥ ‘ታና ከሳዳ የዳ፤ እፅኮ ታ ነና ዎና’ ያግስ” ያጋሱ።
18ዳዊቲ ከስ ኤክድ ራማን ደእያ ሳሜላኮ ብድ ሳኦል ባና ኦዳ ኡባ እያዉ ኦድስ። ዳዊትነ ሳሜል ናዮታ ብድ ያን ኡትዶሶና። 19ሳኦል ዳዊቲ ራማን ደእያ ናዮታን ደኤይሳ ስእስ። 20ዳዊታ ኦይክድ ኤሀና መላ አሰ ያ ኪትስ። ሽን ናበ ጩጋይ ሳሜላ ካለዋን ትንብተ ኦድሽን በእዳ ዎደ ሳኦል የድዳ አሳታ ቦላ ፆሳ አያናይ ዎን፥ ኤንትካ ትንብተ ኦድዶሶና። 21ሳኦል ሄሳ ስእዳ ዎደ ሀራ አስ የድስ፤ ኤንትካ ቃስ ትንብተ ኦድዶሶና። ሳኦል ሄን አሰ የድን ኤንትካ ትንብተ ኦድዶሶና። 22ዉርሰን፥ ሳኦል ባ ሁጰን ራማ ብድ፥ ሴኩን ደእያ ግታ ኦላ ጋክድ፥ “ሳሜልነ ዳዊቲ አዉን ደኦና?” ያግድ ኦይችስ።
ኤንቲ፥ “ህንን ራማን ደእያ ናዮታን ደኦሶና” ያግድ ዛርዶሶና።
23ሄሳ ግሾ፥ ሳኦል ራማን ደእያ ናዮታ ብስ፤ ቃስ ፆሳ አያናይ እያ ቦላካ ዎን፥ ራማን ደእያ ናዮታ ጋካናዉ ትንብተ ኦድሸ ብስ። 24እ ባ ማኡዋ ቃርድ፥ ሳሜላ ስንን ትንብተ ኦድስ፤ ጋላስነ ቃማ ኩመ ካሎ ዝንእስ። አሳይ፥ “ሳኦልካ ናበታፐ እሱዋ ግድደየ” ገይስ ሄሳሳ።
