አራመ ኦላንቾታ
8አራመ ካዎይ እስራኤለታራ ኦለትሸ ደኤስ። እ ባ ቶራ ሞጮናታራ፥ “ታኒ ዱማ ዱማ በሳን ሚፃ መና” ያግስ።
9ኤልስ፥ “አራመ አሳይ ሄ በሳን ቆሰትዳ ግሾ፥ ሄ በሳራ ያ ቦፓ” ያግድ እስራኤለ ካዋስ ኪታ የድስ። 10ሄሳ ግሾ፥ እስራኤለ ካዎይ ፆሳ አስ ማልዳ በሳ አሰ ኪትድ፥ ያን ደእያ አሳይ ናገታና መላ ኦድስ። ካዎይ ናገታና መላ ኤልስ ዎደን ዎደን ኦዴስ።
11ሀ ሀኖታይ አራመ ካዋ ዳሮ ሀንቀን፥ ባ ቶራ ሞጮናታ ፄግድ፥ “ኑ ግዶን እስራኤለ ካዋ ባጋ ግድድ ደኤይ ኦነኮ አነ ታዉ ኦድተ” ያግድ ኦይችስ።
12እያ ቶራ ሞጮናታፐ እሶይ፥ “ታ ጎዳዉ፥ ካዋዉ፥ ኑ ግዶን ሄሳ ኦያ ኦንካ ባዋ። ሽን ኔኒ ነ ቆልአን ኦደትያባ ኡባ እስራኤለን ደእያ ናበይ ኤልስ እስራኤለ ካዋስ ኦዴስ” ያግስ።
13ካዎይ፥ “ታኒ አሰ ኪታዳ እያ ድአና መላ ብድ አዉን ደእያኮ ኮይተ” ያግስ። ኤንቲ፥ “ሄኮ፥ እ፥ ዶታነን ደኤስ” ያግድ ኦድዶሶና።
14ካዎይ ዳሮ ኦላንቾታ ፓራታራነ ፓራ ጋረታራ ያ የድስ። እ የድዳ አሳት ቃማ ይድ፥ ካታማ ተቅዶሶና። 15ኤልሳ አይለይ ዎንተ ጋላስ ጉራ ደንድድ፥ ካረ ከይያ ዎደ፥ ኦላንቾት ፓራታራነ ፓራ ጋረታራ ካታማ ተቅዶሶና። ሄ አይለይ፥ “ሄኮ፥ ኑኒ ይዳ! ታ ጎዳዉ፥ ኑ ዋንኖ?” ያግድ ኦይችስ።
16ኤልስ፥ “ያዮፋ! ኑራ ደኤይሳት ኤንታራ ደኤይሳታፐ አሶና” ያግድ ዛርስ።
17ሄሳፈ ጉየ፥ ኤልስ፥ “አቤት ጎዳዉ፥ እ በአና መላ እያ አይፍያ ዶያ” ያግድ ዎስስ። ጎዳይ ኤልሳ አይልያ አይፍያ ዶይን፥ ሄኮ፥ ኤልሳ ዩሾ ኡባን ደእያ ታማ ፓራትነ ፓራ ጋረት ዙማ ማእስ።
18ሶረት እያ ተቅዳ ዎደ ኤልስ፥ “ሀ አሳታ አይፍያ ቆቅሳርክ” ያግድ ጎዳ ዎስስ። ኤልስ ዎስዳይሳዳ ጎዳይ ኤንታ አይፍያ ቆቅስስ። 19ሄሳፈ ጉየ፥ ኤልስ፥ “ኦገይ ሀይሳራ ዴና፤ ካታማይ ሀይሳ ግደና። ህንተ ኮይያ ኡራ ታ ህንተና በሳና፤ ታና ካልተ” ያግድ፥ ኤንታ ካለድ፥ ሳማረ ካታማ ኤፍስ።
20ኤንቲ ሳማረ ካታማ ገልዳ ዎደ ኤልስ፥ “አቤት ጎዳዉ፥ ሀ አሳት ፄላና መላ ኤንታ አይፍያ ዶያ” ያግስ። ጎዳይ ኤንታ አይፍያ ዶይን፥ ሄኮ፥ ኤንቲ ሳማረ ግዶን ደኤይሳ በእዶሶና። 21እስራኤለ ካዎይ ኤንታ በእዳ ዎደ፥ “ታ አዋዉ፥ ታኒ ኤንታ ዎ? ታኒ ኤንታ ዎ?” ያግድ ኦይችስ።
22ኤልስ፥ “አካይ፥ ዎፓ! ሀር አቶሽን፥ ኔኒ ነ ማሻንነ ነ ዶንግያን ድእዳይሳታካ ዎናዉ በሰና። ኤንቲ ምድ ኡይድ ባንታ ጎዳኮ ባና መላ ካ ኤንታ ሙዛ” ያግስ። 23ሄሳ ግሾ፥ እስራኤለ ካዎይ ኤንታዉ ግብራ ጊግስን፥ ኤንቲ ምዳፐነ ኡይዳፐ ጉየ፥ ኤንታ የድን፥ ባንታ ጎዳኮ ስምዶሶና። ሄ ዎደፐ ዶምን፥ አራመት እስራኤለታ ቦላ ደንደይሳ አጋግዶሶና።
24ሄሳፈ ጉየ፥ አራመ ካዎይ ዎልደ-አዳር ባ ኦላንቾታ ኡባ ሺሽድ፥ ሳማረ ካታማ ተቅስ። 25ሄሳ ጋሶን ሳማረ ካታማን ግታ ኮሽ ገልን፥ እስ ሀረ ሁጰይ ሆስፑን ታሙ ብራ ሳንትመን፥ ናምኡ ፄቱ ግራመ ግድያ ሆለ ሽእ እቻሹ ብራ ሳንትመን ባይዘትስ።
26እስራኤለ ካዎይ ካታማ ድርሳ ግምብያ ቦላራ አሽን፥ እስ ማጫስያ፥ “ታ ጎዳዉ፥ ካዋዉ፥ ታና ማዳርክ” ያጋዳ ዋሳሱ።
27ካዎይ፥ “ነና ጎዳይ ማዶና እፅኮ፥ ታኒ ነዉ ማዶ አዉፐ ኤሀኔ? ካ ቡክያ ዉዱማፈየ፥ ዎይነ አይፍያ ጉምእያ በሳፌ?” ያግስ። 28ካዎይ፥ “ነ መቶይ አይቤ?” ያግድ ኦይችስ።
ማጫስያ ዛራዳ፥ “ሀ ማጫስያ፥ ‘ሀች ማናዉ ነ ናአ ኤካዳ ያ፤ ቃስ ዎንቶ ታ ናኣ ማና’ ያጋሱ። 29ያትን፥ ታ ናኣ ካድ ምዳ፤ ዎንተ ጋላስ ታኒ፥ ‘ኑኒ ማናዉ ነ ናኣ ኤካዳ ያ’ ያጋስ። ሽን እያ ባ ናኣ ቆሳሱ” ያጋሱ።
30ካዎይ ማጫስያ ኦድዳይሳ ስእድ፥ ባ ማኡዋ ዳክስ። እ ግምብያ ቦላራ አሽን፥ አሳይ ጋርሳ ባጋራ እ ማእዳ ካዮ ማኡዋ በእዶሶና። 31ካዎይ፥ “ሳፋፃ ናኣ ኤልሳ ጉገይ እያ ቦላ ሀች ፔእኮ፥ ፆሲ ታና ፕርዶ!” ያግስ።
32ሄ ዎደ ኤልስ ባ ሶን ኡትስ፤ ጭማትካ እያራ እስፈ ደኦሶና። ካዎይ ባፐ ስን አሰ ኪትስ፤ ሽን ሄ አደይ ጋካናፐ ስን፥ ኤልስ ጭማታኮ፥ “ሀ ሸምፖ ዎይስ ታ ቆያ ሙጭሳናዉ አሰ ኪትዳይሳ ህንተ በኤቲ? ሄ ኪተትዳይስ ይዳ ዎደ እብ ጎርድድ ገልሶፍተ፤ እያ ጎዳይካ እያ ካልድ ይሸ ደኤስ” ያግስ። 33እ ጭማታራ ኦደትሽን፥ ሄኮ፥ ኪተትዳይስ ጋክ ዎስ፤ እ፥ “ሀ መቶይ ጎዳፐ ይስ። ያትን፥ ታኒ ጎዳ አይስ ናግያና?” ያግስ።
1ኤልስ፥ “ጎዳ ቃላ ስአ! ጎዳይ ሀይሳዳ ያጌስ። ዎንቶ ሀኖደ ሄ ክሎ ግራመ ግስተ ለይ ዎይኮ ኡሱፑን ክሎ ግራመ ባንግ ሳማረ ካታማ ፐንገን እስ ብራ ሳንትመን ባይዘታና” ያግስ። 2ካዋስ ማታትያ ሀላቃይ ፆሳ አድያኮ፥ “ጎዳይ ሳሎ ማስኮተታ ዶያኮካ ሄስ ሀነና” ያግስ። ሽን ኤልስ ዛሪድ፥ “ኔኒ ሄሳ ነ አይፍያን በአና፤ ሽን እያፐ ማካ” ያግስ።
3ካታማ ገልያ ፐንግያን ግታ ጎጋ ሀርገይ ኦይክዳ ኦይዱ አሳት ደኦሶና። ኤንቲ እሶይ እሱዋኮ፥ “ኑኒ ሀይቃና ጋካናዉ፥ ሀይሳን አይስ ጋምአኔ? 4ኑኒ ካታማ ገልኮ፥ ኮሽ ደእያ ግሾ፥ ኑኒ ያን ሀይቃና። ቃስ ሀይሳን ጋምእኮካ ሀይቃና። ሄሳ ግሾ፥ አራመታ ሚፃ አነ ቦስ። ኤንቲ ኑና አሽኮ አታና፤ ኤንቲ ዎኮ ሀይቃና” ያግዶሶና። 5ሳእ ምያ ዎደ ደንድድ፥ አራመታ ሚፃ ብዶሶና። ኤንቲ ብድ ሚፃ ጋክያ ዎደ፥ ሄኮ፥ እስ አስካ ያን ባዋ። 6ሄስ ሀንዳይ፥ ጎዳይ ፓራ ጋረታ፥ ፓራታነ ዳሮ ኦላንቾታ ቃላ አራመ አሳ ስስስ። ያትን ኤንቲ እሶይ እሱዋኮ፥ “ሄኮ፥ እስራኤለ ካዎይ ኑና ኦልሳናዉ፥ ህተነ ግብፀ ካዎታ ኡነይድ ኤህስ” ያግዶሶና። 7ሄሳ ግሾ፥ ኤንቲ ደንድድ፥ ባንታ ሚፃ፥ ባንታ ዱንካንያ፥ ባንታ ፓራታነ ባንታ ሀረታ ኩመ የግ አግድ፥ ሳእ ማ ደእሽን፥ ባንታ ሸምፑዋ አሻናዉ ባቃትዶሶና።
8ሄ ግታ ጎጋ ሀርገይ ኦይክዳ አሳት አራመታ ሚፃ ጋክድ፥ ኤንታ ዱንካነታፐ እሱዋ ገልድ፥ ምዶሶናነ ኡይዶሶና፤ ብራ፥ ዎርቃነ ማኦ ኤክድ ቆትዶሶና። ናምአን ስሚድ፥ ሀራ ዱንካንያ፥ ገልድ እያፐ ኤክዳይሳ ቆትዶሶና።
9ሄሳፈ ጉየ፥ ኤንቲ እሶይ እሱዋ፥ “ኑኒ ሎኦባ ኦቦኮ። ሀች ምሽራቾ ጋላስ፤ ሽን ኑኒ ስእ ግዳ። ሳእ ዎንታና ጋካናዉ፥ ስእ ግድ ኡትኮ፥ ኑኒ ሴረታና። አነ፥ ሀእ ብድ፥ ካዎ ጋን ደእያ አሳስ ኦዳና” ያግዶሶና። 10ሄሳ ግሾ፥ ኤንቲ ብድ፥ ካታማ ፐንግያ ናገይሳታ ፄግድ፥ “ኑኒ አራመ ሚፃ ብዳ፤ ሽን፥ ሄኮ፥ እስ አስ ዎይኮ አሳ ግርስ ሄ በሳን ባዋ። ቃሸትዳ ፓራታ ፃላልነ ሀረት ደኦሶና፤ ቃስ ኤንቲ አግድ ብዳ ዱንካነት ደኦሶና” ያግዶሶና። 11ፐንግያ ናገይሳት ፄግድ፥ ካዎ ጋን ደእያ አሳስ ኦድዶሶና። 12ካዎይ ቃማ ደንድድ፥ “አራመት ኑና ኦዳባ ታኒ ህንተዉ ኦዳና። ኑኒ ኮሻትዳይሳ ኤንቲ ኤሮሶና። ሄሳ ግሾ፥ ባንታ ሄራፐ ከይድ፥ ጋፃርያን ቆሰትድ፥ ኤንቲ ካታማፐ ካረ ከይን፥ ኑኒ ኤንታ ፓፃ ኦይክድ፥ ካታማ ገላና ያግድ ቆፕዶሶና” ያግድ ባ ሹማታስ ኦድስ።
13ካዋ ሀላቃታፐ እሶይ፥ “ሀ ካታማን አትዳ አሳይ ካሰ ሀይቅዳ አሳ መላ ሀይቆፐ አተና። ሄሳ ግሾ፥ ሀንዳባ ኤራናዉ አነ አሳ ዶሮስ። አትዳ እቻሹ ፓራታራ አነ ኤንታ ሶረታ ሚፃ የዶስ” ያግስ። 14ጉ አሳታነ ናምኡ ፓራ ጋረታ ዶርዶሶና። ካዎይ ኤንታ ሶረ ኦላንቾታ ጌዶ የድድ፥ “ብድ ሀንያባ በእተ” ያግድ ኪትስ። 15አሳት ኤንታ ጌዶ ካልድ፥ ዮርዳኖሰ ሻፋ ጋካናዉ ብዶሶና። አራመ አሳት ባቃትሸ የግዳ ማኦይነ ኦላ ሚሸይ ኦግያን ኩምስ። ኪተትዳ አሳት ጉየ ስሚድ፥ ካዋስ ኦድዶሶና።
16አሳይ ብድ፥ አራመታ ሚፃ ቦንቅዶሶና። ጎዳይ ግዳይሳዳ ሄ ክሎ ግራመ ግስተ ለይ ዎይኮ ኡሱፑን ክሎ ግራመ ባንግ እስ ብራ ሳንትመን ባይዘትስ። 17ካዎይ ባዉ ማትያ ሀላቃ ፐንገ ናገይሳታ ሀላቃ ኦድ ሹምስ፤ ሽን አሳይ እያ ፐንገን የስ። ካዎይ ኤልሳኮ ብዳ ዎደ፥ ኤልስ ሀ ሀላቃ ቦላ ኦድዳይሳዳ አደይ ሀይቅስ። 18ፆሳ አስ ግድዳ ኤልስ ካሰ ካዋስ፥ “ዎንቶ ሀኖደ ሄ ክሎ ግራመ ግስተ ለይ ዎይኮ ኡሱፑን ክሎ ግራመ ባንግ ሳማረ ካታማን እስ ብራ ሳንትመን ባይዘታና” ያግስ።
19ሄ ዎደ ሀላቃይ ኤልሳኮ፥ “ጎዳይ ሳሎ ማስኮተታ ዶያኮካ ሄስ ሀነና” ያግስ። ኤልስ፥ “ሄኮ፥ ኔኒ ሄሳ ነ አይፈን በአና፤ ሽን እያፐ ማካ” ያግድ ዛርስ። 20ኤልስ ኦድዳይሳዳ፥ ሄ አደይ፥ አሳይ ፐንገን የን ሀይቅስ።
