ዳነልነ እያ ላገት ባብሎነን
1ይሁዳ ካዎይ እዮአቄም ካዎትዳ ሄን ላይን ባብሎነ ካዎይ ናቡካዳናፆር የሩሳላመ ካታማ ቦላ ደንድ ካታማ ተቅስ። 2ጎዳይ ይሁዳ ካዋ እዮአከመነ ፆሳ ኬን ደእያ ሚሸታፐ ባጋ፥ እያ ኩሸን አድ እሚስ። እ ሄ ሚሸታ ሳናኦራ ቢታን ደእያ ባ ኤቃ ፆሳታ ኬ ኤፍድ፥ ሚሸ ምንጅያ ኬን ዎስ።
3ካዎይ፥ አስፋናዛ ጌተትያ ባ ኦሳንቾታ ሀላቃ ሀይሳዳ ያግድ ኪትስ፦ “እስራኤለ አሳ ግዶፈ ካዎ ኮቸ ግድዳይሳታነ ግታ አሳታ ኮቸ ግድዳይሳታ ዶራ። 4ዶረታና ናአተት፥ ቦረይ ባይናይሳታ፥ ማላ ሎኦታ፥ ትምርተ ኤለስድ ኤካናዉ ዳንዳኤይሳታ፥ አኬካንቾታ፥ ኤራተ ኩምዳይሳታነ ካዎ ጋን ኦናዉ ዳንዳኤይሳታ ግዳናዉ በሴስ። ኤንታ ባብሎነ ዶናነ ፃፎ ታማርሳ” ያግስ። 5ኤንቲ ማና ካነ ኡያና ዎይነ ኡሻ ካዋ ካፈነ ኡሻፈ ጋላስ ጋላስ እማና መላ ካዎይ ኪትስ። ሄ ላይ ሎህዳፐ ጉየ ካዋ ስን ሺቅድ ኦሶ ዶማና መላ ቆፋ ኩይስ።
6ዶረትዳይሳታ ግዶፈ ይሁዳ ኮቸ ግድዳ ዳነላ፥ አናና፥ ምሳኤላነ አዛራ ጌተተይሳት ደኦሶና። 7ካዋ ኦሳንቾታ ሀላቃይ ኤንታ ሱን ላምድ፥ ዳነላ ብልፃሶራ፥ አናና ስድራቃ፥ ምሳኤላ ምሳቃ፥ አዛራ አብዳናጎ ግድ ሱንስ።
8ዳነል ካዋ ካ ምድነ ዎይነ ኡሻ ኡይድ፥ ባና ቱንሶና መላ ባ ዎዛናን ቆፋ ቃችድ፥ ሄ ቆፋ ኤካናዳ፥ ካዋ ኦሳንቾታ ሀላቃ ዎስስ። 9ፆሳይ፥ ኦሳንቾታ ሀላቃ ስንን ዳነላስ ሳባነ ቃ እሚስ። 10ግዶሽን፥ ኦሳንቾታ ሀላቃይ ዳነላኮ፥ “ህንተዉ ሀ ካነ ኡሻ ኪትዳ ታ ጎዳ፥ ካዋ ያያይስ። ህንተ ላገ ግድዳ ናአተታ ሶምኡዋፈ ህንተ ሶምኦይ ግልቅድ በንትኮ፥ ህንተ ጋሶን ካዎይ ታና ዎና” ያግስ።
11ኦሳንቾታ ሀላቃይ ሹምን ዳነላ፥ አናና፥ ምሳኤላነ አዛራ ናግያ አድያኮ፥ ዳነል ሀይሳዳ ያግስ፦ 12“ማናዉ ኑስ አታክልተ፥ ኡያናዉ ሃ ፃላላ እማዳ፥ ኑና ነ አይለታ ታሙ ጋላስ ፓጫ። 13ያታዳ፥ ኑ ሶምኡዋነ ካዎ ካ ምያ ናአተታ ሶምኡዋ ፄላዳ፥ ኑና ነ አይለታ ነዉ በንትዳይሳዳ ኦ” ያግስ።
14እ፥ ሄሳ ኤክድ ታሙ ጋላስ ኤንታ ፓጭስ። 15ታሙ ጋላሳፐ ጉየ፥ ካዋ ካ ምዳ ናአተታ ኡባፈ ኤንታ ሶምኦይ ጪይን፥ ሞድ በንትዶሶና። 16እ፥ ኤንታዉ ጊግዳ ካነ ዎይነ ኡሻ ድግድ አታክልተ እሚስ።
17ሀ ኦይዱ ናአተታስ ፆሳይ ኤራነ ኡባ ቆሞ ፁፈነ ትምርተ ኤክያ አኬካ እሚስ። ዳነል ቆንጨነ አሙሆ ብርሸ ኤሬስ።
18ካዎይ፥ ናአተት ባኮ ገላናዳ ኪትዳ ዎደይ ጋክን፥ ኦሳንቾታ ሀላቃይ ኤንታ ናቡካዳናፆራ ስን ኤህስ። 19ካዎይ፥ ኤንታ ኦድስያ ዎደ ዳነላ፥ አናና፥ ምሳኤላነ አዛራ መላ አስ ኤንታ ግዶን በንትቤና። ያትን፥ ኤንቲ ካዋስ ኦናዉ ገልዶሶና። 20ካዎይ ኤንታ ኦይችዳ አይ ጭንጫተነ አኬካ ኦይሻን፥ እያ ካዎተን ደእያ ማሮታፐነ ብታንቾታፐ ኤንቲ ታሙ ኩሸ አድ በንትዶሶና። 21ዳነል፥ ካዎይ ቅሮስ ካዎትዳ ኮይሮ ላይ ጋካናዉ ጋምእስ።
