ክርስቶሳን ደእያ አያና አንጁዋ
3ሳሎን ደእያ አያና አንጆ ኡባን ክርስቶሳ ባጋራ ኑና አንጅዳ፥ ኑ ጎዳ የሱስ ክርስቶሳ አዋይ፥ ፆሳይ ጋላተቶ። 4ኑኒ እያ ስንን ጌሻታነ ቦረይ ባይናይሳታ ግዳና መላ ፆሳይ አላመይ መታናፐ ካሰ ክርስቶሳ ባጋራ ባ ሲቁዋን ኑና ዶርስ። 5ፆሳይ ባ ሸንያን ባ ዶስዳይሳዳ የሱስ ክርስቶሳ ባጋራ ኑና ባ ናይታ ኦናዉ ካሰትድ ቆፕ ዎስ። 6ፆሳይ ባ ሲቅያ ናኣ ባጋራ ኑስ ጮ እምዳ አ ኬሀተይ ቦንቸታና መላ ሄሳ ኦስ።
7ፆሳ አ ኬሀተ ዱረተዳ ክርስቶሳ ሱን ዎዘትድ ናጋራ አቶተ ደምዳ። 8ባ አ ኬሀተ ጭንጫተንነ ኤራተን ኩንድ ኑስ እሚስ። 9ፆሳይ ባ ዶስዳይሳዳ ክርስቶሳ ባጋራ እያ ሸንያ ፁራ ኑ ኤራና መላ ኦስ። 10ዎደይ ጋክያ ዎደ ፆሳይ ፖላናዉ ቆፕዳ ቆፋይ፥ ሳሎንነ ሳአን ደእያ መተ ኡባይ ክርስቶሳፐ ጋርሳን ግዳና መላሳ።
11ኡባባ ባ ሸንያዳ ኦያ ፆሳይ፥ ካሰትድ ሀልችዳይሳ ክርስቶሳ ባጋራ ኑኒ እያባ ግዳና መላ ኑና ዶርስ። 12ሄሳ እ ኦዳይ፥ ክርስቶሳን ኡፋይስ ዎድ ናጎን ኮይሮ ግድዳ ኑኒ ፆሳ ቦንቹዋ ጋላታን ቆንጭሳና መላሳ። 13ህንተካ ህንተ አቶተ ዎንገላ፥ ሄስካ ቱማ ቃላ ስእዳ ዎደ ክርስቶሳ አማንደታ። ፆሳይ ህንተዉ እማና ግዳ ጌሻ አያናን ህንተ አታመትደታ። 14ፆሳ ቦንቾይ ጋላተታና መላ ፆሳይ ባ አሳ ዎዛና ጋካናዉ ጌሻ አያና ኑስ ኦይ ኦድ እሚስ።
