ክርስቶሳራ ደእያ እስፈተ
11ሄሳ ግሾ፥ ህንተኖ የለታን አይሁደ ግዶናይሳቶ፥ አይሁደት ባንታዉ አሳ ኩሸን ቃፃረትድ፥ ህንተና ቃስ ቃፃረትቦናይሳታ ግድ ፄገይሳ አኬክተ። 12ሄ ዎደ ህንተ ክርስቶሳፐ ሻከት ደእዳይሳ፥ እስራኤለ አሳስ አላጋ ግድድ ደእዳይሳ፥ ፆሳ ኡፋይሳ ቃላፐ ሃክድ ደእዳይሳነ ሀ አላምያን ኡፋይስነ ፆሲ ባይና ደእዳይሳ አኬክተ። 13ሽን ህንተ ካሰ ሃክድ ደእዳይሳት፥ ሀእ ክርስቶስ የሱሳን ደእድ ክርስቶሳ ሱን ማታ ሺቅደታ።
14ክርስቶስ ኑ ሳሮተ፤ እ አይሁደነ አይሁደ ግዶና አሳ ትምድ፥ ናምኣ ሻክ ዎዳ ሞርከተ ጎዳ ላልስ። 15እ ባናን ሀ ናምኡ ኮቻታፐ እስ ኦራ አሰ መድ፥ ህግያ እያ ኪታራነ ዎጋታራ እስፈ ባ አሳተን ይስድ ሳሮተ እሚስ። 16ክርስቶስ ማስቃልያ ቦላ ሀይቅድ ሞርከተ ይስስ፤ ቃስ ናምኡ ኮቻታ እስ አሳተ ኦድ ፆሳራ ስገስ። 17ክርስቶስ ይድ፥ ፆሳፈ ሃክድ ደእያ ህንተዉ፥ ቃስ ማትድ ደእያ ኤንታዉ ሳሮተ ዎንገላ ኦድስ። 18ኑ ኡባይ እያ ባጋራ እስ አያናን አዋ ስን ሺቃናዉ ዳንዳኦስ።
19ህዛፐ ህንተ አላጋ ዎይኮ እማ ግደከታ፥ ሽን ህንተ ሀእ ጌሻታ ቢታ አስነ ፆሳ ሶ አስ። 20ህንተ ሀዋረትነ ናበት ባስዳ ባሱዋ ቦላ ኬፀትደታ። ጎዳ ፃጱዋ ምንያ ሹቻይ ክርስቶስ የሱሳ። 21እያን ኬ ኡባይ እስፈ ኦይከትድ ጎዳን ጌሻ ፆሳ ኬ ግዳናዉ ድጬስ። 22ህንተ ቃስ ፆሳይ ባ አያናን ደእያ ኬ ግዳናዉ ክርስቶሳን እስፈ ኬፀተታ።
