ኑኒ ክርስቶሳን እስኖ
1ህዛ፥ ጎዳ ግሾ ቃሸትዳ ታኒ፥ ህንተ ፄገትዳ ፄሳስ በሲያ ደኦ ዳና መላ ህንተና ዎሳይስ። 2ህንተ ኡባ ዎደ አዳታነ ሀዮ ግድተ፤ እሶይ እሱዋ ዳንዳእተነ ሲቆን ደእተ። 3ሳሮተን ቃሸትድ አያናይ እምያ እስፈተ ናጋናዉ ምንተ። 4ፆሳይ ህንተና ፄግዳ ዎደ እስ ኡፋይሳስ ፄግዳይሳዳ እስ አሳተነ እስ አያን ደኤስ። 5እስ ጎዳይ፥ እስ አማኖይነ እስ ፅንቃተይ ደኤስ። 6ኡባፈ ቦላ ግድዳ፥ ኡባ ባጋራ ኦያነ ኡባ ግዶን ደእያ እስ ፆሳይ፥ ኡባ አዋይ ደኤስ።
7ሽን ክርስቶስ እማናዉ ኮይዳይሳዳ ኑ እሶይ እሶይ ዱማ ዱማ እሞታ ኤክዳ። 8ሄሳ ግሾ፥ ፆሳ ቃላይ፥
“እ ፑደ ከይዳ ዎደ
ድኤትዳ ዳሮታ ባራ ኤክድ ብስ፤
አሳስካ እሞታ እሚስ”
ያጌስ። 9ያትን፥ “ፑደ ከይስ” ጉሳይ ዎይ ጉሴ? እ ኮይሮ ዱገ፥ ሳኣ ዝቃ በሳ ዎስ ጉሱ ግዶና እፅኮ አይ ጉሴ? 10ሀ ዱገ ዎዳይስ፥ ኡባ በሳን በንታናዉ ኡባፈ ቃ ሳሉዋ ከይዳይስ እያ።
11እ እሶታ እሶታ ሀዋረታ፥ እሶታ እሶታ ናበታ፥ እሶታ እሶታ ዎንገላ ሳባከታ፥ እሶታ እሶታ ዎሳ ኬ ሄመይሳታ፥ እሶታ እሶታ አስታማረታ ኦድ እሚስ። 12እ ሄሳ ኦዳይ ክርስቶሳ አሳተ ግድዳ ዎሳ ኬ ድቻናዉነ አማንያ አሳ ፆሳ ኦሶስ ጊግሳናሳ። 13ሄሳዳካ፥ ኑ ኡባይ ፆሳ ናኣ ኤርድ አማኖን በንትያ እስፈተኮ ጋክድ፥ ክርስቶሳ አያና ደኡዋ ኩመ ጋክድ ድጫና መላሳ።
14ህዛፐ ጉየ፥ አሳ ገነ ጭሞን ጊግዳ ባለያ ዎርዶ ትምርተ ጫርኮንነ ሆበን ገደነ ሃ ኩሎ ካእያ ናይታ መላ ግዳናዉ በሰና። 15ሽን ኑኒ ቱማ ሲቆን ኦድሸ፥ አሳተስ ሁጰ ግድያ ክርስቶሳራ ደእያ እስፈተ ጉጅ ጉጅ ድቾስ። 16ኩመ አሳተይ ክርስቶሳ ቦላ ዘምፔስ ቃስ ዱማ ዱማ አሳተ ብልተት እሶይ እሱዋራ ኦይከትድ ኡትስ። እስ እስ አሳተ ክፍለይ ባ ኦሱዋ ኦያ ዎደ ኩመ አሳተይ ሲቆን ድጬስ።
