ጌሻ ዱንካነን ጎኤትያ ብራታ ሚሸታ
21ታሙ ኪታታ ኦይክዳ ናምኡ ሎቸ ሹቻት ደእያ በሳን፥ ጌሻ ዱንካንያን፥ ጎኤትያ ሚሸታ ማዝጋበይ ሀይሳ። ሄ ሚሸታ ማዝጋባና መላ ካህንያ አሮና ናአ እታማራ አዋተ ጋርሳን ደእያ ሌወታ ሙሰይ ኪትስ።
22ይሁዳ ሼሻፐ ግድዳ ሁራ ናኣ ናኣ፥ ኡረ ናኣ፥ ባስልኤል፥ ጎዳይ ኪትዳይሳዳ ኡባባ ኦስ። 23ዳነ ሼሻፐ ግድዳ አህሳማካ ናኣ ኤልያብ፥ ኩሸ ሂላንቾይ፥ ኦያባስ ኮይሮ ሀልቾ ከስያ አስ፤ እ፥ ካሎሰ፥ ኦቻ ቴራ ዳነይሳነ ዞኦ ቃጭናን አልኦ ሊኖ ዳድድ አሌቅስያ አስ። 24ጌሻ ዱንካንያ ኦሱዋስ ሀናና መላ ጎዳስ እመትዳ ዎርቃይ ጌሻ ዱንካነን ኤረትዳ ምዛነን እስ ሙኩሉ ክሎ ግራመ ግድስ። 25ታይቦን ደእያ አሳፐ ኤከትዳ ብራይ ጌሻ ዱንካነን ኤረትዳ ምዛነን፥ ሄ ሙኩሉነ ኦይዱ ፄታነ ሀስታሙ ክሎ ግራመ ግድስ። 26ሄስካ፥ ታይቦን ገልዳ አደ አሳይ፥ እሶይ እሶይ ጌሻ ዱንካነን ኤረትዳ ምዛንያ ልከን ኮየትያ ኡባ እምዶሶና። ላታሙ ላይነ እያፐ ቦላ ግድዳ፥ ማዝጋበን ገልዳ፥ አደ አሳ ታይቦይ ኡሱፑን ፄታነ ሄ ሙኩሉነ እቻሹ ፄታነ እሻታማ። 27ጌሻ ዱንካንያነ ማጋራጆታ ኤሳናዉ ማድያ ፄቱ ቶሆታ ኦናዉ 3,400 ክሎ ግራመ ብራ ብራታ ኤክዶሶና። ሄስካ፥ እስ እስ ቶሆይ ሀስታማነ ኦይዱ ክሎ ግራመ ብራ ብራታ ኤክስ። 28ባስልኤል፥ አትዳ ሀስታሙ ክሎ ግራመ ብራ ብራታን ፃምአታ፥ ካጨታነ ቱሳታስ ፄራ ጎሳታ ኦስ። 29አሳይ ጎዳስ እምዳ ናሰ ብራታይ 2,425 ክሎ ግራመ። 30ሄ ናሰ ብራታን ጌሻ ዱንካንያ ፐንግያ ኤስያ ቶሆታ፥ ግተ ዳንያባራ ናሰ ብራታ ያርሾ በሳነ እያ ግዶን ጎኤትያ ዱማ ዱማ ሚሸታ መስ። 31ቃስ ዳባባ ዩሹዋን ደእያ ድርሳ ቶሆትነ ፐንግያ ቦላ ኤቅዳ ቶሆት፥ ጌሻ ዱንካነይነ እያ ዩሹዋን ደእያ ዳባባ ድርሳ ሸት ኡባይ ሄ ናሰ ብራታፐ ኦሰትዶሶና።
