አማኖነ ኦሶ
14ታ እሻቶ፥ ህንተፈ እስ አስ ታዉ አማኖይ ደኤስ ግድ፥ ባ አማኑዋ ኦሶን በሶና እፅኮ እያ አይ ማዳኔ? እያ አማኖይ እያ አሻናዉ ዳንዳኢ? 15ሌምሶስ እስ እሻይ ዎይኮ እስ ምችያ ካሎትኮነ ኤንታዉ ምያባይ ይኮ፥ 16ህንተፈ እስ አስ ኤንታኮ፥ “ሳሮ ቢተ! ታማ ካይተ! ካልድ ሚተ!” ግድ፥ ኮሽያባ ኤንታዉ እሞና እፅኮ ኤንታ አይ ማዲ? 17ሄሳ ግሾ፥ ኦሶይ ባይና አማኖይ ባርካ ሀይቅዳይሳ።
18ሽን እስ አስ፥ “ነዉ አማኖይ ደኤስ፤ ቃስ ታዉ ኦሶይ ደኤስ። ኔኒ ነ አማኑዋ ነ ኦሱዋፐ ሻካዳ ታና በሳ፤ ታካ ታ አማኑዋ ታ ኦሱዋን ነና በሳና” ጋና። 19ኔኒ፥ እስ ፆሳይ ደኤይሳ አማናሳ፤ ሄስ ሎኦ። ቱና አያናትካ አማኖሶና፤ ያሻን ኮኮሮሶና። 20ነኖ ኤያዉ! አማኖይ ኦሶፐ ሻከትድ ማዶናይሳ ኤራናዉ ኮያይ? 21ኑ አዋ አብራሃመይ፥ ባ ናኣ ይሳቃ ያርሾ በሳ ቦላ ዎዳ ዎደ ባ ኦሱዋን ፅልቤኔ? 22እያ አማኖይነ እያ ኦሶይ እስፈ ኦዳይሳ በእኪ? እያ አማኖይ እያ ኦሱዋን ፖለትስ። 23ጌሻ ማፃፋይ፥ “አብራሃመይ ፆሳ አማንስ። ፆሳይ ሄሳ እያዉ ፅሎተ ኦድ ታይብስ” ግዳይስ ፖለትስ። ቃስ እ ፆሳ ዳቦ ጌተትድ ፄገትስ። 24አስ አማኖ ፃላላን ግዶናሽን፥ ኦሶን ፅለይሳ በኣሳ።
25ሄሳዳካ፥ ላይምያ ራኣባ እስራኤለፐ ኪተትዳይሳታ ሞካዳ ሀራ ኦገራ ኤንታ ሞይዝዳ ዎደ ባ ኦሱዋን ፅላቤኬ?
26ሸምፖይ ሻከትዳ አሳተይ ሀይቆ ግደይሳዳ፥ ኦሶይ ሻከትዳ አማኖይካ ሀይቅዳይሳ።
