ኤልሁ ሃሳያ

1እዮብ፥ “ታኒ ፅሎ አስ” ግዳ ግሾ፥ ሀ ሄ አሳት እያዉ ዛሮ እሞ አጋግዶሶና። 2እዮብ ፆሳፈ አድ ባና ፅሎ ኦዳ ግሾ፥ ራማ ያራፐ ግድዳ ቡዛ ቢታፈ ይዳ ባርከላ ናአይ ኤልሁይ እዮባ ቦላ ሀንቀትስ። 3ኤንቲ እያ ጮ ባላ ግድ ፕርድድ፥ እያዉ በሲያ ዛሮ እማናዉ ዳንዳእቦና ግሾ ኤልሁይ ሀ ሄ ላገታ ቦላካ ሀንቀትስ። 4ኤልሁይ ኤንታፈ ካሎትያ ግሾ ኤንቲ ኡባይ ሃሳያ ዉርሳና ጋካናዉ ናግስ። 5ሀ ሄ አሳት እዮባስ በሲያ ዛሮ እማናዉ ዳንዳእቦናይሳ በእድ እ ዳሮ ይሎትስ።

6ቡዛ ቢታፈ ይዳ ባርከላ ናአይ ኤልሁይ ሀይሳዳ ያግድ ሃሳያ ዶምስ።

“ታኒ ህንተፈ ናአታይስ፤

ህንተ ታፐ ባይራተታ፤

ሄሳ ግሾ፥ ታኒ ታ ቆፋ ህንተዉ ኦዳናዉ ያያስ።

7ታኒ፥ ‘ጭማት ኦደቶ፤

ባንታ ዳሮ ላይን ደምዳ ጭንጫተ ታማርሶና’ ” ጋዳ ቆፓስ።

8ሽን አሳ ግዶን አቅድ ጭንጫተ እመይ፥

ኡባ ዳንዳእያ ፆሳ አያና።

9አሰ ጭንጫ ኦይ ጭማተ ግደና፥

ዎይኮ አሳስ አኬካ እመይ ላይ ዳሮተ ግደና።

10ሄሳ ግሾ፥ ስእተ፤

ታካ ታ ቆፋ ህንተዉ ኦዳና።

11ህንተ ሃሳያ ዎደ፥

ታኒ ስእ ጋዳ ሀይዛስ፤

ህንተ ኦዳና ቃላ ኮይሽን ናጋስ።

12ህንተ ገይሳ ኡባ ዉርሳዳ ስአስ፤

ሽን ህንተፈ ኦንካ እዮባ ባላ ግድ አማንበና፤

ህንተፈ ኦንካ እያ ፓላማስ በሲያ ዛሮ እምቤና።

13እዮባ ኦዳስ ካልስያ ዛሮ እማናዉ ዳንዳኤይ፥

ፆሰፈ አትሽን፥ አሰ ግዶና ግሾ፥

ህንተ፥ “ኑስ ጭንጫተ ደኤስ” ጎፕተ።

14እዮብ ፓላምዳይ ታራ ግዶናሽን ህንተራ፤

ታኒ ህንተ ኦዳዳ እያዉ ዛሮ እምከ።

15ኤንቲ ዳጋምድ፥

ጋናባ ይዳ ግሾ፥

ዛሮ እማናዉ ዳንዳእቦኮና።

16ያትን ኤንቲ ኦደትያባ ይድ ስእ ግድ ኤቅኮ፥

ታኒ ናጋናዉ ኮሺ?

17ግደና፥ ታኒ ኦድያባይ ደኤስ፤

ታካ ታ ቆፋ ቆንጭሳና።

18ታ ኦዳናባይ ዳሮይ ደእያ ግሾ፥

ታ ግዶን ደእያ አያናይ ታና ኦዳ ግድ ሱጌስ።

19ታ ጋይ ጎዘትዳ ማናጨዳ፥

ዎይኮ ማልአንቶ ዎይነ ኡሽ ኩምዳ ኦጎሮዳ

ቃና ሀኔስ።

20ታ ኦዳዳ ከሳናዉ በሴስ፤

ታ ዶና ዶያዳ ዛሮ እማናዉ ኮሼስ።

21ሀ ኦዳን ታኒ ኦናካ ማድከ፥

ዎይኮ ኦናካ ጮ ሳቢከ።

22አሰ ጮ ሳቢያባይ ታዉ ኤረተና፤

ታ ሄሳ ኦያኮ ታና መዳይስ ፕርዳናሽን።

1እዮባ፥ ሀእ ታ ኦዳ ስአ፤

ታ ግያባ ኡባ ሀይዛ።

2ታኒ ታ ዶና ዶያስ፤

ታ ቃላት ታ እንፃርሳ ፄራን ደኦሶና።

3ታ ቃላት ታ ዎዛና ሱረተ ቆንጭሶሶና፤

ታ ኤረይሳ ታ እንፃርሳይ ቱማተን ኦዴስ።

4ታና መዳይ ፆሳ አያና፤

ኡባ ዳንዳእያ ፆሳ ሸምፖይ ታዉ ደኦ እሚስ።

5ነ ዳንዳእኮ ታዉ ዛሮ እማ፤

ነና ጊግሳዳ ታራ ፓላማ።

6ታኒ ፆሳ ስንን ነ መላ፤

ታንካ ኡርቃፈ መታስ።

7ኔኒ ታዉ ያይያ ጋሶይ ባዋ፤

ታኒ ነና ናቅከ።

8“ነ ሃሳያ ኡባ ታኒ ስአሸ ጋምአስ፤

ኔ ዶናፐ ከይዳ ቃላታ ሀይዛስ።

9ታኒ ጌሽነ ቦረይ ባይና አስ፤

ታኒ ፅሎነ ናጋራ ኦቦና አስ።

10ሽን ፆሳይ ታና ሴራናዉ ጋሶ ኮዬስ፤

እ ታና ባ ሞርከዳ ታይቤስ።

11ታ ቶሁዋ ዱፅስ፤

ታ ታንጎ ኡባ እ ዎቼስ” ያጋዳሳ።

12“እዮባ፥ ነ ኦዳይ ልከ ግደና፤

ታ ነዉ ኦዳይስ፥ ፆሳይ አሳፐ አስ።

13‘ፆሳይ አሳ ኦዳስ ዛሮ እመና’ ጋዳ፥

አይስ እያራ ፓላማይ?

14አስ አኬከናፈ አትሽን፥

ፆሳይ ዱማ ዱማ ኦገራ ኦዴስ።

15አስ ቃማ ሂፃን ዝንእድ፥

ስኮ ኤይድ ደእያ ዎደ፥

ፆሲ አሙሆንነ ቆንጨን ኦዴስ።

16ሄ ዎደ አሳይ ስአናዳ ሀይ ዶዬስ፤

ባ ሴራን ኤንታ ዳጋንስ።

17ያትድ አስ ናጋራ ኦና መላ ተቄስ፤

ኦቶሮ አሳፐ ድጌስ።

18ፆሲ አሰ ዮፐ አሼስ፤

ሀይቆፐካ ናጌስ።

19አስ ሀርገትድ ሂፃን ደእሽን፥

እያ መቀ ጋርሳን ቃንፆና ሳሆ የድድ ሴሬስ።

20ሄሳዳ ሀንድ ሀርግዳ ኡራይ ካ እፄስ፤

ዳሮ ማልኦ ካ እያ ሻቴስ።

21እያ አሾይ ግልቅድ ዉሬስ፤

እያ አሳተይ መልን መቀ ታይበቴስ።

22እያ ሸምፖይ ዱፎኮ፥

እያ ደኦይ ሀይቆ ኪታንቾታኮ ማቴስ።

23“አሳስ ሱረ ኦግያ በሲያ

ሙኩሉን ታይበትያ ኪታንቾታፐ

እሶይ እያ ማዳናዉ ዳንዳኤስ።

24እያዉ ቃትድ፥ ‘እ ዱፎ ገሎና መላ እያ አሻ፤

ታኒ እያ ዎዝያባ ደማስ፤

እያ አጋጋ’ ያግድ ሀይቆስ ኦዴስ።

25ሄሳ ግሾ፥ እያ አሳተይ ናአ አሳተ ግዳና፤

እያ ያላጋተ ዎልቃይ እያዉ ስማና።

26ሄ ዎደ እ ፆሳ ዎሳና፤

ፆሳይ እያ ዎሳ ስአና፤

ፆሳይ እያዉ እያ ፅሎተ ዛርያ ግሾ፥ እ ኡፋይሳን ፆሳ ጎይናና።

27ሄ ዎደ አሳ ስንን እ ሀይሳዳ ያግድ የፃና፤

‘ታኒ ናጋራ ኦስ፤ ሱረባ ጌላያስ፤

ሽን ፆሳይ ታ ሀኑዋ ታዉ ቃንፅቤና።

28ታ ዱፎን ገሎና መላ ታና አሽስ፤

ሀእ ፓፃ ደአዳ ፖኦ በአይስ’ ያጋና።

29“ሄኮ፥ ፆሲ አሳስ ሄሳ ኡባ

ዛር ዛር ኦስ።

30እ ደኦ ፖኦ በአና መላ፥

እያ ሸምፑዋ ዱፎፐ አሼስ።

31“እዮባ፥ ታኒ ኦደይሳ ሀይዛዳ ስአ፤

አነ ነ ስእ ጋ፤ ታኒ ኦደታና።

32ነ ኦዳናዉ ኮያባይ ደእኮ ኦዳ፤

ታኒ ነ ፅሎ ግደይሳ በአናዉ ኮያይስ።

33አቶ ጊኮ ስእ ጋዳ፥ ታ ሃሳያ ስአ፤

ታ ነና ጭንጫተ ታማርሳና” ያግስ።

1ቃስካ ኤልሁይ ሀይሳዳ ያግስ፤

2“ህንተኖ፥ ጭንጫቶ ታ ሃሳያ ስእተ፤

ህንተኖ፥ ኤራንቾቶ ታና ሀይዝተ።

3እንፃርስ ማልኦ ካ ሻክ ኤረይሳዳ፥

ሀይ ኦዳ ሻክድ ኤሬስ።

4አነ ኑኒ ሱረባ ሻክድ፥

ሎኦባ ታማርድ ኤሮስ።

5“እዮብ፥ ‘ታኒ ፅሎ፤

ሽን ፆሲ ታና ሱረ ፕርዳ ድግስ።

6ታኒ ቱማ ሽን ዎርዳንቾ ግዳስ፤

ታናን ባል ባዋ ሽን፥

ፓፆና ማዱን ማዱንፅስስ’ ያግስ።

7እዮባዳ ፆሳ ቦላ፥

ቀልቅስያ አስ ደኢ?

8እ ኢታ ኦይሳታራ ላገቴስ፤

ናጋራንቾታራ ሄመቴስ።

9እ፥ ‘አስ ፆሰ ኡፋይሳና ግድ ኦያባይ

አይኮካ ማደና’ ያጌስ።

10“ሄሳ ግሾ፥ ህንተኖ፥ አኬካንቾ አሳቶ ስእተ፥

ኢታ ኦሶይ ፆሳፈ፥

ኡባ ዳንዳእያ ፆሳፈ ባላ ኦሶይ ሃኮ።

11ፆሳይ አሳስ እያ ኦሱዋዳ እሜስ፤

እያ ኦግያዳ እያዉ ቃንፄስ።

12ፆሳይ ቱማ ኢታ ኦና፤

ኡባ ዳንዳእያ ፆሳይ ሱረ ፕርዳ ጌላየና።

13ሳአ ቦላ እያዉ ማታ እምዳይ ኦኔ?

ቢታ ኡባ ቦላ እያ ሹምዳይ ኦኔ?

14ፆሳይ ባ አያናነ ባ ደኦ ሸምፑዋ

ዛሪድ ባኮ ኤክያኮ፥

15አሾ ማእዳ ኡባይ እስፈ ያና፤

አስ ቢታ ስማናሽን።

16“ነዉ አኬክ ደእኮ ሀይሳ ስአ፤

ታ ሃሳያ ሀይዛ።

17ሱረ ፕርዳ እፀይ ሃራናዉ ዳንዳኢ?

ኔኒ ፅሎነ ዎልቃማ ፆሳ ፕርዳይ?

18ፆሳይ ካዎታኮ፥ ‘ህንተ ፓናይሳታ’፤

ቃስ ቢታ ሃረይሳታኮ፥ ‘ህንተ ኢታ’ ያጌስ።

19ኤንቲ ኡባይ እያ ኩሸ ኦሶታ ግድያ ግሾ፥

ሀላቃታ ሶምኦ ፄልድ ማደና፤

ዱረታ ማንቆታፐ አድ ፄለና።

20ኤንቲ ግድ ብላሄ አኬኮና ሀይቃና፤

ኡባይ ኮኮርሸ ያና፤

ዎልቃማት አሳ ኩሸይ ቦቾና ክቻና።

21“ፆሳይ አሳ ሄመ ፄሌስ፤

እያ ታንጎ ኡባ ዎቼስ።

22ኢታ ኦይሳታ፥

ገንናዉ ዳንዳእያ ሳካና ም ባዋ።

23አሳይ እያ ስን ፕርዳስ ሺቃና መላ፥

ፆሳይ ቃፃሮ እመና።

24ኦይሽ ባይና ዎልቃማታ መንረስ፤

ኤንታ በሳን ሀራታ ሹሜስ።

25እ ኤንታ ኦሱዋ ኤርያ ግሾ፥

ኤንታ እስ ቃማን ማታፐ ዎድ ይሴስ።

26ኤንታ ኢታተ ግሾ፥

ናጋራንቾታ አሳ ስንን ሴሬስ።

27ሄሳ እ ኦይ፥

ኤንቲ እያ ካሎና እፅዳ ግሾነ

እያ ኪታ አግዳ ግሾሳ።

28ኤንቲ ማንቆታ ኡንኤድ ፆሳኮ ዋሳና መላ ኦዶሶና፤

ፆሳይ ማንቆታ ዋሱዋ ስእስ።

29ፆሳይ ስእ ጊኮ እያ ኦነ ሞታናይ?

እ ባ ሶምኡዋ ቆስኮ እያ በአናይ ኦኔ?

እ አሳፐነ ካዎተፈ ቦላ።

30ሄስ ሀንዳይ ጌላይ ደርያ ሃሮና መላነ

ኤንታ ስንን ፅሄ ዎና መላሳ።

31“አስ ፆሳኮ ያግያኮ ሎኦ፤

ካሰ ታ ናጋራ ኦዳባ ግድኮ ዛራዳ ኦከ።

32ታ በኦናይሳ ታና ታማርሳ፤

ናጋራ ኦዳባ ግድኮ ዛራዳ ኦከ።

33ያትን ኔኒ ፓፅከ ጋሸ፥

ነ ዶሰይሳ መላ ፆሳይ ነዉ ዎይታነዬ?

ህዛ ቆፋ ቃቻናይ ነናፐ አትሽን፥ ታና ግድከ፤

ሄሳ ግሾ፥ ነ ኤረይሳ ታዉ ኦዳ።

34አኬካ አሳይ ሀይሳዳ ያጎሶና፤

ጭንጫት ያጎሶና፤

35‘እዮብ ኤር ባይና ኦደቴስ፤

ኢያ ኦዳን አይፈይ ባዋ።’

36እዮብ ኢታ አሳዳ ዛሮ እምዳ ግሾ፥

ዉርሰ ጋካናዉ ፓጨትዳ ግዴረነ!

37እ ባ ናጋራ ቦላ ጌላተ ጉጅስ፤

ኑ ስንን ፆሳ ቦላ ቀልቅስስ፤

ፆሳ ቦላ ዳሮ ኦደትስ” ያግስ።

1ኤልሁይ ቃስ ሀይሳዳ ያግስ፤

2“እዮባ፥ ኔኒ፥ ‘ታኒ ፆሳ ስንን ፅሎ’

ገይስ ልኬ?

3‘ታኒ ናጋራ ኦና አጋዳ አይ ጎኤትያና?

አይ ዎ ደማኔ?’

ያጋዳ ነ ፆሳ ኦይቻናዉ ዳንዳኣሳ።

4ታኒ ነዉነ

ነ ላገታስ ዛሮ እማና።

5ቁ ጋዳ ሳሎታ ፄላ፤

ኔፐ ቦላራ ደእያ ሻራ አኬካዳ በአ።

6ነ ናጋራ ኦኮ ፆሳ አይብን ቆሀኔ?

ነ ባላይ ዳርኮ ሄስ እያዉ አይ ኦ?

7ነ ፅሎ ግድኮ እያዉ አይ እማኔ?

ዎይኮ ነ ኩሸፐ እ አይ ኤካኔ?

8ነ ናጋራ ኦኮ ነ መላ አሰ ቆሃሳ፤

ቃስ ፅልኮካ አሰ ጎኣሳ።

9“ኡንእ ዳርያ ዎደ አሳይ ዋሴስ፤

ዎልቃማታ ኩሸፐ ከስ ኤክያ አስ ኮይድ ዎባቶሶና።

10ሽን ኦንካ፥ ‘ቃማ ማዝሙረ እምያ፥

ታና መዳ ፆሳይ አዉን ደኢ? 11ዶአታፐ አድ ታማርሰይስ፥

ካፎታፐ አድ ጭንጫ ኦይስ አዉን ደእ’ ያገና።

12ኤንቲ ዋሶሶና፤

ሽን ፆሳይ ኤንታ ኦቶሩዋ ጋሶን፥

ኤንታዉ ዛሮ እመና። 13ጮ ዋሱዋ ፆሲ ቱማ ስኤና፤

ኡባ ዳንዳእያ ፆሳይ ሄሳ ሀይዘና።

14ኔኒ ታ ፆሳ በአናዉ ዳንዳእከ ያግኮካ፥

ነ ሞቶይ እያ ስንን ደእያ ግሾ፥

ነ እያ ዳንዳአን ናጋናዉ በሴስ።

15ፆሳይ አሰ ፕርዶናባነ

ናጋራ አግድ አና ጋዳ ቆፓይ?

16ሄሳ ግሾ፥ ኔኒ ነ ዶና ጮ ዶያሳ፤

ኤር ባይና ሃሳያ ዳርሳሳ” ያግስ።

1ኤልሁይ ጉጅድ ሀይሳዳ ያግስ፤

2“ፆሳ ዶና ግዳዳ ታ ነዉ ኦድያባይ ደእያ ግሾ፥

ጉ ዳንዳአዳ ስአ።

3ታኒ ታ ኤራ ሃሆ ሶፐ ኤሀና፤

ታና መዳይስ ፅሎ ግደይሳ ቆንጭሳና።

4ታኒ ዎርዶ ሃሳይከ፤

ኩመ ኤር ደእያ አስ ኔራ ደኤይሳ አማና።

5“ፆሳይ ቱማ ዎልቃማ፤

ሽን እ ኦናካ ካና።

እ ባ አኬካን ምኖ።

6እ ኢታት ደኦን ዳና መላ ኦና፤

ሽን ኡንኤትዳይሳታስ ሱረ ፕርዴስ።

7ፆሳይ ባ አይፍያ ፅሎታ ቦላፈ ደንና፤

ኤንታ ካዎታራ ኡትስድ፥

መርናዉ ቁ ቁ ኦስ።

8ሽን አሳይ ሳንላታን ቃሸትኮ፥

ዎይኮ መቶ ዎዶሮን ኦይከትኮ፥

9እ ኤንታ ኦሱዋነ

ኦቶሮን ኦዳ ናጋራ ኤንታ ቦላ ቆንጭሴስ።

10ሴራ ስአናዳ ኤንታ ሀይ ዶዬስ፤

ናጋራፐ ስማና መላ ኤንታ ኪቴስ።

11ኤንቲ ስእድ እያዉ ኪተትኮ፥

ባንታ ላይ ሳሮንነ ኡፋይሳን ዉርሳና።

12ሽን ኤንቲ ስኦና እፅኮ ማሻን ዉራና፤

ኤንቲ ኤራ ይዳ ግሾ ሀይቃና።

13“ፆሳ አማኖና አሳት

ባንታ ዎዛናን ይሎትዳ መላ ደኦሶና፤

እ ኤንታ ፕርድያ ዎደ ማደ ኮይድ ዎሶኮና።

14ኤንቲ ኦያ ቱና ኦሱዋን ያና፤

ባንታ ናአተን ሀይቃና።

15ሽን ዋየተይሳታ ኤንታ ዋያፐ አሼስ፤

ኤንታ መቱዋ ባጋራ ኤንታዉ ኦዴስ።

16“ፆሳይ ነና መቶ ዎዶሮፐ፥

ኡንእ ባይና ዳልጋ በሲ፥

ዶረትዳ ካ ኩምዳ ጋይታኮ ከሳና።

17ሽን ሀእ ኢታታ ቦላ ጋክያ ፕርዳይ ነ ቦላ ጋክን፤

ፅሎ ፕርዳን ኦይከታዳሳ።

18ኦንካ ነና ዱረተ በስድ ጭሞና መላ፥

ዎፈ ዳሮይ ባለና መላ ናገታ።

19ነ ዱረተይ

ዎይኮ ነ ዳፈተይ ነና መቶፐ አሻኔ?

20አሳይ ባንታ በሳፈ ይያ ቃማይ፥

ያና መላ አሞቶፋ።

21ሀ መቶ ኡባይ ነና ጋክዳይ ሄሳ ጋሶና፤

ሄሳ ግሾ፥ ኢታ ኦና መላ ናገታ።

22“ፆሳይ ባ ዎልቃን ቁ ቁ ግስ፤

እያ መላ አስታማረይ ኦኔ?

23ፆሳ፥ ‘ሀይሳ ኦ’ ግድ ኪተይ፥

ዎይኮ፥ ‘ኔኒ ኢታ ኦሶ ኦዳሳ’ ያጋናዉ ዳንዳኤይ ኦኔ?

24አሳይ ማዝሙረን ሳቢዳ እያ ኦሱዋ፥

ነካ ማዝሙረን ሳባ።

25አሳ ኮቸ ኡባይ ፆሳ ኦሱዋ በእስ፤

አሳይ ሃሆን ኤቅድ ፄልዶሶና።

26ፆሳይ ግታ! እያ ግታተ ኑ አኬካናዉ ዳንዳኦኮ፤

እያ ላይ ዳሮተስ ዛው ባዋ።

27“ፆሳይ ሃ አባፈ ፑደ ሳሎ ኤፌስ፤

ዱገ ዛሪድ እራ ኦድ ቡክሴስ።

28ሄ እራይ ሻራፐ ከይድ፥

አሳ ቦላ ቡካና መላ ኦስ።

29ፆሲ ሻራ ዋትድ ምጭያኮ፥

ፆሳይ ደእያ ሳሉዋን ዋንድ ጉምያኮ፥

ኦንካ ኤረና።

30እ ባ ዩሾን ዎልአን ፖኡዋ ላሌስ፤

አባ ጪሙዋ ዋትድ ካምያኮ በአ።

31ያትድ ፆሳይ ደርያ አይሴስ፤

ካ ዳርስድ እሜስ።

32እ ዎልአን ባ ኩሸን ኦይኬስ፤

ባ ማልዳ በሳ ጫዳና መላ ኪቴስ።

33ዳድ ቅድ ኡሾይ ያናይሳ በሴስ፤

መሄይካ ኡሾይ ያናይሳ ኤሬስ።

1“እያ ኡሹዋን ታ ዎዛናይ ድርጌስ፤

ባ በሳን ቃፄስ።

2እያ ዶናፐ ከይያ ቃላ ስእተ፤

ዳዳዳ ጉምያ እያ ግርሳ ሀይዝተ።

3እ ሳሎ ጋርሳን ባ ዎልአን ላሌስ፤

ቢታ ጋፃፐ ጋፃ ጋካናዉ ኪቴስ።

4ሄሳፈ ጉየ፥ እያ ጉንይ ስኤቴስ፤

ባ ያሽያ ግርሳ ስሴስ።

እያ ግርሳይ ስኤትያ ዎደ፥

ባ ዎልአን ተቀና።

5ፆሳ ማላልስያ ኦገን ባ ጉን ስሴስ፤

ኑኒ አኬካናዉ ዳንዳኦና ግታባ እ ኦስ።

6እ ሻቻኮ፥ ‘ሳአን ዎ’ ያጌስ፤

ዎልቃማ እራኮ፥ ‘ቡካ’ ያግድ ኪቴስ።

7እ መዳ አሳ ኡባይ እያ ኦሱዋ ኤራና መላ፥

አሳይ ባንታ ኦሱዋ አጋና መላ ኦስ።

8ሄ ዎደ ዶአት ባንታ በሳ ገሎሶና፤

ባንታ ጎንጎሉዋን ቆሰቶሶና።

9ዎልቃማ ጎተይ ዱገሀፐ ደንዴስ፤

እርፃ ጫርኮይ ፑደሀፐ ዬስ።

10ፆሳ ደኦ ሸምፖይ ሻች መስ፤

ዳልጋ ሃታ ሹቻዳ ምንስ።

11ሻር ሃ ቶካና መላ ኦስ፤

ባ ዎልአን ሻራ ግዶን ላሌስ።

12ሻራት እያ ኪታን ቢታ ጋፃ ዩዮሶና፤

እ ኪትያ ኪታ ኡባ ፖሎሶና።

13ፆሳይ እራ ቡክሰይ ቢታ እርፅሳናሳ፥

ዎይኮ አሳ ሴራናሳ፥ ዎይኮ ባ ሲቁዋ በሳናሳ።

14“እዮባ፥ ሄሳ ስአ፤

ፆሳይ ኦያ ማላልስያ ኦሱዋ ታክ ጋዳ አኬካ።

15ፆሳይ ሻራታ ዋትድ ኪትያኮ፥

ባ ዎልአን ዋትድ ዎልአምስያኮ ኤራይ?

16ሻራት ሳሎን ዋንድ ኡትያኮ፥

ኤራን ፖሎ ግድዳ ፆሳይ

ኦያ ማላልስያ ኦሱዋ ኔኒ ኤራይ?

17ዱገሀ ጫርኮይ ጫርክድ ቢታ ምሽስያ ዎደ፥

ኔኒ ዎልቃማ ባዞ ሴላን ትልአና።

18ፆሳይ ሳሉዋ ትልእዳ ማስቶተዳ ምጭያ ዎደ፥

ኔኒ እያ ማዳናዉ ዳንዳአይ?

19ኑኒ ኤራ ፓጫ ግድያ ግሾ፥

ፆሳስ ዎይግድ ኦደታነኮ ነ ኑና ታማርሳ።

20ፆሳራ ኦደታና ጋዳ ታኒ ኦይቻናዉ ኮሺ?

ታና ይሳና መላ ታ አይስ እያ ደንኔ?

21ጫርኮይ ሳሎፐ ሻራ ጌሽያ ዎደ፥

ሳሎን ጶልያ አዋ ኦንካ በአናዉ ዳንዳኤና።

22ፑደሀ ባጋራ ዎርቃ ዳንያ ፖኦይ በንቴስ፤

ፆሳይ ያሽያ ቴማን ቆንጬስ።

23ኡባ ዳንዳእያ ፆሳኮ ሺቃናዉ ዳንዳኦኮ፤

እያ ዎልቃይ ግታ።

እ ባ ቱማ ፕርዳንነ ባ ግታ ፅሎተን

አሰ ቆሄና።

24ሄሳ ግሾ፥ አሳይ እያዉ ያዬስ፤

ባንታና ጭንጫ ገይሳታ እ ካስ” ያግስ።