दानिय्येलो रे जरीये दर्शणो रा मतलब बताणा
15तेबे मां दानिय्येलो रा मन बेचैन ऊईगा ओर जो कुछ मैं देखेया था तेस दर्शणो ते आऊँ कबराईगा। 16तेबे तिना सेवका बीचा ते जो सिंहासनो रे नेड़े खड़ी रे थे, एकी गे जाई की मैं तिना सारी गल्ला रा पेत पूछेया, तिने ये बोली की मांगे तिना गल्ला रा पेत दशेया, 17तिने बोलेया, “चार बड़े-बड़े जन्तुआ रा मतलब चार राजेया खे बताओआ।, सेयो राजा तरतिया पाँदे ऊणे। 18पर परमपरदान परमेशरो रे पवित्र लोका खे राज मिलणा ओर युगो-युगो तक तेस राज्य रे अधिकारी बणे दे रणे।” 19तेबे मेरे मनो रे ये इच्छा ऊई कि तेस चौथे जन्तुओ रा पेत बी जाणी लूँ जो बाकी तीऊँ ते लग था। से बऊत खतरनाक ओर डराऊणा था। जेसरे दाँद लोए रे ओर पईने पीतल़ी रे पैर थे। से चीजा खे खाई देयोआ था ओर तिना रे टुकड़े-टुकड़े करी देयो था। ओर जो बची जाओ थे तिना खे पैरा थाले केसी देयो था। 20तेबे चौथे जन्तुए रे सिरो रे दस सींगा रा पेत ओर जेस नवें सींगो रे निकल़ने ते तीन सींग छूटी गे, मतलब जेस सींगो दे आखी ओर जोरे की कमण्डो रिया गल्ला करने वाल़ा मूँ ओर बाकी सबी सींगा ते खतरनाक था। तेसरा पेत जाणने री माखे इच्छा ऊई। 21जेड़ा कि मैं देखेया, कि से सींग परमेशरो रे पवित्र लोका साथे लड़ाई करने लगी रा था ओर तिना खे अराई बी देयो था, 22जदुओ तक कि से सदा रा परमेशर, परमपरदान, आई कि आपणे पवित्र लोका रा न्याय नि करी लो। तेबे पवित्र लोका रिया तँईं राज्य पाँदे राज करने रा बखत आया। 23तिने बोलेया, “तेस चौथे जन्तुए रा मतलब, एक चौथा राजा ए, जो तरतिया पाँदे ऊई की बाकी सबी राजेया ते लग ऊणा, ओर सारी तरतिया रे लोक नाश करने ओर तिना रे शरीर चूर-चूर करी देणे।” 24तिना दस सींगा रा मतलब ए कि तिना दस राजेया तेस राज्य पाँदे राज करना। तिना ते बाद, एक ओर राजे राज करने आऊणा। से ओरी तीऊँ राजेया ते लग ऊणा। तेसखे तीऊँ राजेया पाँदे अक्क मिलणा, 25तेस परमपरदान परमेशरो रे खलाफ गल्ला बोलणिया ओर बखत ओर बिधान बदलणे री कोशिश करनी, परमेशरो रे लोक साढ़े तीऊँ काला तक तेसरे वशो दे ऊणे। 26पर तेबे स्वर्गो दे न्यायी बैठणे ओर तिना तेसरा राज्य छुड़ाई की नाश करी देणा, एथो तक की तेसरा अन्त ई ऊई जाणा। 27तेबे राज ओर सामर्थ ओर तरतिया पाँदले राज री महिमा परमपरदान परमेशरो री प्रजा, मतलब तेसरे पवित्र लोका खे देई देणी, तेसरा राज सदा रा राज ए ओर सब राज करने वाल़े तेसरे वशो दे ऊणे ओर तिना तेसरी आज्ञा मानेया करनी। 28येई सब था जो मैं सुफने दे देखेया था, पर आऊँ दानिय्येल मनो दे बड़ा कबराईगा ओर डरीगा ओर मैं ये गल्ल आपणे मनो देई राखी।
