इस्राएलो री प्रार्थना
15ओ यहोवा तू स्वर्गो ते, जो तेरी पवित्र ओर महिमा साथे परी री रणे री जगा ए, देख। तेरी जल़न ओर पराक्रम केई रये? तेरी दया ओर करूणा मां पाँदा ते अटी गी री। 16देख, तूँ ई म्हारा बाओ ए, तेबे बी म्हारा पुर्वज अब्राहम आसा खे नि पछयाणदा ओर म्हारा पुर्वज इस्राएल आसा खे नि मानदा; तेबे बी ओ यहोवा, तूँ म्हारा बाओ ओर म्हारा छुड़ाणे वाल़ा ए; पुराणे बखतो ते येई तेरा नाओं ए। 17ओ यहोवा, तूँ आसा खे म्हारी बाटा ते पटकाई देया ओर म्हारे मन एड़े काठे करेया कि आसे तेरा डर नि मानदे? आपणे दास, आपणे इस्से रे गोत्रो रिया खातर वापस आओ। 18तेरी पवित्र प्रजा तो थोड़े ई बखतो तक तेरी पवित्र जगा री अधिकारी रयी, एबे म्हारे दुश्मणे तुसा री पवित्र जगा केसी ती दी ए। से उजाड़ी ती री। 19कदी-कदी आसे लोक तो एड़े ऊईगे रे, मानो तैं आसा पाँदे कदी राज नि कित्तेया ओर तिना जेड़े जिना खे तेरे नि बोलेया गया।
1ओ यहोवा, “खरा ऊँदा कि तूँ सर्गो खे फाड़ी की तरतिया पाँदे उतरी की आऊँदा ओर पाह्ड़ तां सामणे डरी जांदे। 2जिंयाँ आग कांडा-चीट फूकी देओई या पाणिए खे ब्वाल़ोई, तिंयाँ ई तूँ आपणे दुश्मणा पाँदे आपणी तागत एड़ी प्रगट कर, ताकि जातिया-जातिया रे लोक तेरे प्रतापो ते डरी जाओ! 3जेबे तैं एड़े डराऊणे काम कित्ते जो म्हारी उम्मीदा ते बी बढ़ी की थे, तेबे तूँ उतरी की आया, पाह्ड़ तेरिया मौजुदगिया ते थरथराईगे।” 4कऊँकि पुराणे बखतो ते ई ताखे छाडी की कोई ओर एड़ा परमेशर ना तो कदी देखेया ओर ना कानो साथे तेसरी चर्चा सुणी राखी जो आपणी बाट न्याल़ने वाल़ेया खे काम करो। 5तूँ तो तिना साथे ई मिलेया जो तर्मो रे काम खुशिया साथे करोए ओर तेरी बाटा रे चलदे ऊए ताखे याद करोए। देख, तूँ आसा ते रोषे ऊआ था, कऊँकि आसे पाप कित्तेया था; आसे बऊत बखतो तक पापो री दशा रे रये, क्या म्हारा उद्धार ऊई सकोआ? 6आसे तो सारे के सारे अशुद्ध माणूंए जेड़े ए ओर म्हारे तर्मो रे काम सारे के सारे मैले चिथड़ेया जेड़े ए। आसे सारे के सारे पत्तेया जेड़े मुरझाई जाऊँए ओर म्हारे बुरे कामे आसे अवा जेड़े उडाई ते रे। 7कोई बी आदमी तांते प्रार्थना नि करदा, ना कोई तांते मताद लणे खे चौकस रओआ कि तां साथे जुड़ेया रा रओ; कऊँकि म्हारे बुरे कामो रिया बजा ते तैं आसा ते आपणा मूँ लकोईता रा ओर आसे म्हारी बुराईया रे वशो रे छाडी ते रे। 8तेबे बी, ओ यहोवा, तूँ म्हारा बाओ ए; देख, आसे तो माट्टी ए ओर तूँ म्हारा कुम्हार ए; आसे सारे के सारे तेरे आथो रे काम ए। 9इजी री खातर ओ यहोवा, बऊत रोषे नि ओ, ओर बऊत बखतो तक म्हारे पापो खे याद नि राख। सोची की देख, आसे तांते प्रार्थना करूँए, आसे सब तेरी प्रजा ए। 10देख, तेरे पवित्र शईर यरूशलेमो समेत यहूदा रे शईर उजाड़ ऊईगे, सिय्योन सुनसाण ऊईगा रा, यरूशलेम ऊजड़ी गा रा। 11म्हारा पवित्र ओर सुन्दर मन्दर, जिदे म्हारे बुजुर्ग तेरी स्तुति करो थे, आगी रे फूकी ता रा ओर म्हारिया सेयो सब जगा जो आसे कीमती समजिया नाश ऊई गी रिया। 12ओ यहोवा, क्या यहूदा प्रदेशो री तबाई ऊणे ते बाद बी तूँ आपू खे रोकी सकेया? क्या तां आसे एड़ी बुरी दशा रे रणे देणे?
