इस्राएली लोका रा यरदन नदिया ते पार जाणा
1दूजे दिने प्यागा यहोशू उठेया ओर सबी इस्राएली लोका खे साथे लई की शित्तीमो ते चली की यरदन नदिया रे कनारे आया ओर सेयो पार जाणे ते पईले दूई दिना तक आपणे डेरे खड़े करी की तेथी रूकी गे। 2ओर तीऊँ दिना ते बाद इस्राएली लोका रे परदान डेरे दे जाई की बोलणे लगे, 3तिने लोका खे ये आज्ञा दित्ती, “जेबे तुसा खे लेवी पुरोईत आपणे परमेशर यहोवे रे वादे रा सन्दूक चके दे दिशो, तेबे आपणी जगा ते चली की तेस सन्दूको पीछे-पीछे चली पड़ना, 4पर तेस वादे रे सन्दूक ओर तुसा बीचे लगभग एकी किलोमीटरो रा फांसला रओ, तुसे सन्दूको रे नेड़े नि जाणा, ताकि तुसे देखी सको कि तुसा खे कुणजी बाटा रे जाणा ए, कऊँकि एबुए तक तुसे एते बाटा रिये नि आई रे।” 5तेबे यहोशूए लोका खे बोलेया, “तुसे आपू खे पवित्र करो, कऊँकि यहोवे काल के दिन तुसा बीचे अचम्बे रा काम करना।” 6तेबे दूजे दिने प्यागा यहोशूए पुरोईता खे बोलेया, “वादे रा सन्दूक चकी की लोका ते आगे-आगे चलो।” तेबे सेयो वादे रा सन्दूक चकी की आगे-आगे चले। 7तेबे यहोवे यहोशूए खे बोलेया, “आजो ते मां सबी इस्राएली लोका सामणे कुछ एड़ा करना कि सेयो ताखे आपणा अगुवा मानो, जेते कि तिना जाणी लणा कि जेड़ा आऊँ मूसे साथे रऊँ था, तेड़ा ई आऊँ तां साथे बी ए। 8तूँ वादे रा सन्दूक चकणे वाल़े पुरोईता खे ये आज्ञा दे कि जेबे तुसे यरदन नदिया रे कनारे पऊँचो, तेबे यरदन नदिया दे थोड़े जे आगे जाई की खड़े रणा।” 9तेबे यहोशूए इस्राएली लोका खे बोलेया, “नेड़े आई की सुणो कि तुसा रा यहोवा परमेशर क्या बोलोआ।” 10तेबे यहोशू बोलणे लगेया, “इजी ते तुसा जाणी लणा कि जिऊँदा परमेशर तुसा बीचे ए ओर तेस तुसा सामणे ते बिना शक कनानी, हित्ती, हिब्बी, परिज्जी, गिर्गाशी, एमोरी ओर यबूसी देशो रे लोक तिना रे देशो ते निकयाल़ी देणे। 11सुणो, सारी तरतिया रे परमेशरो रे वादे रा सन्दूक तुसा ते आगे-आगे यरदन नदिया दे जाणे वाल़ा ए। 12इजी री खातर इस्राएली लोका रे गोत्रो बीचा ते बारा जणे चूणी लो, सेयो हर गोत्रो बीचा ते एक-एक मर्द ओ।”
13तेबे जेस बखते पूरी तरतिया रे परमेशरो रे वादे रा सन्दूक चकणे वाल़े पुरोईता रे पैर यरदन नदिया रे पाणिए बीचे पड़ने, तेस बखते यरदन नदिया रा बह्ईणे वाल़ा पाणी रूकी जाणा ओर ऊबा ते आऊणे वाल़ा पाणी तेथी ई दवाला जेड़ा रूकेया रा रणा। 14तेबे जेबे लोक आपणे डेरे ते यरदन नदिया ते पार जाणे लगे ओर पुरोईत वादे रा सन्दूक चकी की लोका ते आगे-आगे चलणे लगे। 15यरदन नदिया रा पाणी तो फसला री बडाईया रे बखते सबी दिना दे कनारेया ते बी ऊबे बह्ईंदा रओ था, पर जिंयाँ ई सन्दूको खे चकणे वाल़े पुरोईत यरदन नदिया रे कनारे पऊँचे ओर तिना रे पैर यरदन नदिया रे कनारे पाणिए दे डूबी गे। 16तेबे यरदन नदिया रा जो पाणी ऊबा ते आऊणे लगी रा था से बऊत दूर, मतलब आदाम शईरो रे नेड़े जो सारतान जगा रे नेड़े मैदानो दे ए रूकी की एक टेर ऊई गा ओर दवाला जेड़ा खड़ा रया ओर यरदन नदिया रा जो पाणी अराबा रे सागरो दे, जेतेखे मृत सागर बी बोलोए, तेथो रिया तरफा खे बह्ईणे लगी रा था, से पूरा सूकीगा ओर सेयो लोक नदिया ते चलदे ऊए यरीहो सामणे पार पऊँची गे। 17तेबे पुरोईत यहोवे रे वादे रा सन्दूक चकी की यरदन नदिया दे बीचे चली की सुकी जमीना दे खड़े दे रये ओर सारे इस्राएली लोक पैदल पार उतरदे रये, ईंयाँ सेयो सारे इस्राएली लोक यरदन नदिया ते पार चलीगे जेड़े की सेयो सूकिया जमीना दे चले ओ।
