आकानो रा पाप ओर परमेशरो री सजा
1पर इस्राएली लोके अर्पण कित्ती रिया चीजा रे बारे दे विश्वासघात कित्तेया, मतलब यहूदा रे गोत्रो रा आकान, जो जेरहवंशी जब्दिए रा पोता ओर कर्मीए रा पाऊ था, तिने नाश करने वाल़िया चीजा बीचा ते कुछ लई ला; इजी बजा ते यहोवे रा गुस्सा इस्राएली लोका पाँदे पड़की गा। 2तेबे यहोशूए कुछ पेतिये यरीहो नाओं रे शईरो ते आई नाओं रे शईरो दे पेजे, जो बेतेल शईरो रे पूर्वो रिया तरफा खे बेतावेन शईरो रे नेड़े था, ओर सेयो ये बोली की पेजे कि जाई की देशो रा पेत लई की आओ। तेबे तिने पेतिये जाई की शईरो रा पेत लया। 3ओर तिने पेतिये यहोशूए गे वापस आई की बोलेया, “सबी सैनिका खे तेती जाणे री जरूरत नि ए, कोई 2,000 या 3,000 सैनिक जाई की आई शईरो खे जीती सकोए; सबी लोका खे तेती जाणे रा कष्ट नि दे, कऊँकि सेयो लोक थोड़े ईए।” 4तेबे कोई 3,000 सैनिक तेती आई शईरो पाँदे अमला करने खे गये; पर आई शईरो रे सैनिके सेयो बुरिया तरआ ते अराईते ओर इस्राएली सैनिक तिना रे सामणे ते नठीगे। 5तेबे आई शईरो रे सैनिके तिना बीचा ते कोई छत्ती सैनिक काईते ओर आपणे शईरो रे द्वारो ते पात्थरा रिया खानी तक तिना रा पीछा करी की उतराईया दे तिना खे कांदे गये। तेबे इस्राएलो रे सैनिका री ईम्मत टुटी गी ओर सेयो डरी गे।
6तेबे यहोशू ओर इस्राएली लोका रे स्याणेया दु:खी ऊई की आपणे टाल्ले फाड़े ओर तिने आपणे-आपणे सिरो पाँदे तूड़ पाई ओर यहोवे रे सन्दूको सामणे मुंए रे पारे रूड़ी की जमीना दे साँजा तक पड़े रे रये। 7ओर यहोशूए बोलेया, “हाय, प्रभु यहोवा, तूँ आपणे इना लोका खे यरदन नदिया ते पार कऊँ लई आया? क्या आसा खे एमोरिया रे वशो रे करी की नाश करने खे ली आई रा? पला ऊँदा कि आसे सन्तुष्टि करी की यरदन पार रयी जांदे! 8हाय, प्रभु आऊँ क्या बोलूँ, जेबे इस्राएली युद्धो दे आरी की आपणे दुश्मणा रे सामणे ते नठीगे! 9कऊँकि कनानी लोक, बल्कि एस देशो रे सबी रणे वाल़ेया ये सुणी की आसे केरी लणे ओर म्हारा नाओं तरतिया पाँदा ते मिटाई देणा, तेबे तां आपणे बड़े नाओं रिया तँईं क्या करना?”
10यहोवे यहोशूए खे बोलेया, “उठ, खड़ा ऊई जा, तूँ कऊँ ईंयाँ मुंए रे पारे जमीना दे पड़ी रा? 11इस्राएलिये पाप करी राखेया ओर जो वादा मैं तिना साथे कित्तेया था से तिने तोड़ी ता रा, तिने अर्पण करने रिया चीजा बीचा ते लई ला बल्कि चोरी बी कित्ती ओर छल करी की से आपणे समानो बीचे राखी ता रा।” 12इजी बजा ते इस्राएली आपणे दुश्मणा रा सामणा नि करी सकणे बल्कि तिना रे सामणे ते नठी जाणे, कऊँकि सेयो आपू अर्पणो री चीज बणी गे रे जो नाश ऊणे खे ए। इजी री खातर तुसे आपू बीचा ते अर्पणो री चीजा खे नाश करो, नई तो मां आगो खे तुसा साथे नि रणा। 13उठ, प्रजा रे लोका खे पवित्र कर, तिना खे बोल कि प्यागा तक आपू-आपू खे पवित्र करी की राखो, कऊँकि इस्राएलो रा परमेशर यहोवा ये बोलोआ, “ओ इस्राएल तां बीचे से अर्पणो री चीज ए जो नाश ऊणे खे ए, इजी री खातर जदुओ तक तूँ इना चीजा खे आपू गे ते दूर नि करी देगा, तदुओ तक तूँ आपणे दुश्मणा रा सामणा नि करी सकणा।” 14इजी री खातर प्यागा खे तुसे गोत्रो-गोत्रो रे मुताबिक यहोवे रे नेड़े खड़े ऊणा ओर जेस गोत्रो खे यहोवा पकड़ो से एक-एक कुल करी की नेड़े आओ ओर जेस कुलो खे यहोवा पकड़ो से कराना-कराना करी की नेड़े आओ, तेबे जेस कराने खे यहोवा पकड़ो से एक-एक मर्द करी की नेड़े आओ। 15तेबे जो मर्द अर्पणो रिया चीजा राखदे ऊए पकड़ेया जाणा, से ओर तेसरा परिवार ओर जो कुछ तेसरा ओ सब आगी दे फूकेया जाओ, कऊँकि तिने यहोवे री आज्ञा तोड़ी राखी ओर इस्राएलो दे बऊत बुरा काम करी राखेया।
16तेबे दूजे दिने प्यागा यहोशू उठी की इस्राएली लोका रे गोत्रो-गोत्रो खे यहोवे रे नेड़े लईगा ओर यहूदा रा गोत्र पकड़ेया गया, 17तेबे यहोशूए यहूदा रा गोत्र यहोवे रे नेड़े ल्याया ओर जेरहवंशिया रा कुल पकड़ेया गया, तेबे जेरहवंशिया रे कुलो रे एक-एक मर्दो खे नेड़े ल्याया ओर जब्दीये रा टब्बर पकड़ेया गया। 18तेबे तिने तेसरे टब्बरो रा एक-एक मर्द नेड़े खड़ा कित्तेया ओर यहूदा गोत्रो रा आकान नाओं रा माणूं पकड़ेया, जो जेरहवंशी जब्दिए रा पोता ओर कर्मीए रा पाऊ था।
19तेबे यहोशू आकानो खे बोलणे लगेया, “ओ मेरे माठे, इस्राएलो रे परमेशर यहोवे रा आदर कर ओर तेस सामणे अंगीकार कर ओर जो कुछ तैं करी राखेया, से मांगे बताई दे ओर मांते कुछ नि लको।” 20आकाने यहोशूए खे ज्वाब दित्तेया, “सच्ची मैं इस्राएलो रे परमेशर यहोवे रे खलाफ पाप करी राखेया ओर मैं ईंयाँ कित्तेया, 21जेबे माखे लूटा दे शिनार देशो रा एक सुन्दर टखण ओर 200 शेकेल चाँदी ओर पंजा शेकेल सूईने री एक ईट दिखी, तेबे मैं तिना रा लाल़च करी की सेयो राखी लये, सेयो मेरे डेरे ते पीतरे जमीना दे दबाई राखे ओर सबी ते थाले चाँदी ए।” 22तेबे यहोशूए कुछ दूत पेजे ओर सेयो तेस डेरे दे दौड़ी की गये ओर क्या देखेया कि सेयो चीजा तेसरे डेरे रे दबाई राखिया ओर सबी ते थाले चाँदी ए। 23तिने सेयो सब चीजा डेरे ते निकयाल़ी की यहोशू ओर सबी इस्राएली लोका गे ल्याई की यहोवे रे सामणे राखी तिया। 24तेबे सबी इस्राएली लोका समेत यहोशूए जेरहवंशी आकानो खे ओर तेस सूईने, चाँदी ओर टखणो खे ओर तेसरे माठे-बेटिया खे, तेसरे बल़द, गह्दे, पेडा-बाकरिया ओर तेसरे डेरे खे, बल्कि जो कुछ तेसरा था तिना सबी खे आकोर नाओं री तराईया दे लईगा। 25तेबे यहोशूए तेसखे बोलेया, “तैं आसा खे कष्ट कऊँ दित्तेया? आजके दिने यहोवे ताखे ई कष्ट देणा।” तेबे सबी इस्राएलिये आकान ओर तेसरे परिवारो रे लोका पाँदे पात्थर बाये जदुए तक कि सेयो मरी नि गये, तेबे सेयो आगी दे पाई की फूकी ते ओर तिना रा सारा समान बी फूकी ता। 26तिने तेस पाँदे पात्थरा रा बड़ा टेर लगाई ता जो आजो तक तेती बणेया राए। तेबे परमेशरो रा पड़केया रा गुस्सा शान्त ऊई गा। इजी बजा ते तेसा जगा रा नाओं आजो तक आकोर तराई पड़ी रा।
