सुलैमानो रिया ओर बी ज्ञानो रिया गल्ला

1एती सुलैमानो री नसीअत ओर बी ए;

जो यहूदा प्रदेशो रे राजा हिजकिय्याह रे माणूंए नकल कित्ती थी

2परमेशरो रा आदर, गल्ला खे गुप्त राखणे रे जरिये ओई,

पर राजे रा आदर गुप्त गल्ल रा पता लगाणे ते ओई।

3जिंयाँ स्वर्गो री ऊचाई ओर तरतिया री गईराई नापी नि सकदे,

तिंयाँ ई राजे रे मनो खे कोई नि जाणी सकदा कि तेसरे मनो दे क्या ए।

4चाँदिए रा मैल दूर करी की सन्यार तेतेखे शुद्ध चाँदी बणाई देओआ,

ओर से तेसखे कामो री चीज बणी जाओई।

5तिंयाँ ई जे राजे रे सामणे ते तेसरे दुष्ट सलाहकारो खे बारे निकयाल़ी देओ तो तेसरी गद्दी तर्मो रिया बजा ते बणी री रणी।

6जेबे तुसे एकी राजे रे सामणे खड़े ऊई जाओए, तो आपणी तारीफ आपू नि करनी,

ओर जेती बड़ेया लोका खे बैठणे री जगा ए तेती नि बैठणा;

7कऊँकि बड़ेया लोका रे सामणे तेरी बेज्जती नि ओ,

बल्कि ताखे सेयो आपू बोलो कि आगे आओ ओर एती बैठ।

8जो कुछ तैं देखी राखेया, तेतेरे बारे दे चट कचैरिया दे नि जा,

नई तो बादो ते जेबे तेरा पड़ोसी ताखे बोलो की ये तो बेकसूर आ तेबे तूँ कुछ नि करी सकदा।

9आपणे पड़ोसिये साथे बईस कल्ले जे करनी,

ओर बगाने रा पेत नि खोलणा;

10एड़ा नि ओ कि सुणने वाल़ा तेरी बी बेज्जती करो,

ओर तेरिया गल्ला रा पतंगड़ बणाई देओ।

11जिंयाँ चाँदिए री टोकरिया दे सूईने रे सेऊ ओए,

तिंयाँ ई ठीक बखतो पाँदे बोली री गल्ल ओई।

12अक्लमंदो री सई सला खे सुणने रिया तँईं त्यार रणा,

सूईने रे मैंगे गणेया ते जादा मैंगा ओआ।

13एक परोसे वाल़ा दूत आपणे मालको रे मनो खे नवां करोआ,

जिंयाँ फसल बाडणे रे बखते गर्मिया दे ठण्डा पाणी जिऊए खे चट ठण्डा करोआ।

14जो माणूं चूठो-मूठो खे दान देणे री बडयाई करोआ पर दान नि देंदा,

से तेसा अवा ओर बादल़ो जेड़ा ए जो गड़गड़ाओ तो अए पर बरसदे नि।

15सब्र राखणे ते शासक मनाया जाओआ,

ओर अच्छा वचन आड्डिया खे बी तोड़ी देओआ।

16जे ताखे सईत खाणा ऊगा तो तिथणा ई खाया जितणा तूँ खाई सके,

एड़ा नि कि जादा खाई की तिजी खे उगल़ी दे।

17आपणे पड़ोसिये रे कअरे बार-बार नि जाणा,

एड़ा नि ओ कि से तांते परेशान ऊई की नफरत करने लगो।

18जो केसी रे खलाफ चूठी गवाई देओआ,

से मानो थोअड़ा, तलवार ओर पैना तीर ए।

19मुसीबता रे बखते विश्वासघातिये पाँदे परोसा करना,

टूटे रे दाँद या काईल पैरा जेड़ा ए।

20जेस माणूंए रा मन दु:खी आ तेसरे सामणे गाणे गाणा तेड़ा ए,

जिंयाँ ठण्डी रे केसी रे टाल्ले खोलणा या जख़्मा पाँदे सिरका पाणा,

21जे तेरा बैरी पूखा ओ तो तेसखे रोटी खुलाणी;

ओर जे से त्याया ओ तो तेसखे पाणी पल़्याणा;

22ईंयाँ तां तेस साथे आपणे एस बर्ताव ते से शर्मिंदा करी देणा,

ओर यहोवे ताखे इजी रा फल देणा।

23जिंयाँ उत्तरो ते चलणे वाल़ी अवा बर्खा ल्याओई,

तिंयाँ ई चुगली करने ते मुंए पाँदे गुस्सा छाई जाओआ।

24लाम्बे चौड़े कअरो रे चगड़ा करने वाल़ी लाड़िया साथे रणे ते छतो रे कूणे रे रणा खरा ए।

25जिंयाँ थके रे प्राणो खे ठण्डा पाणी ओआ,

तिंयाँ ई दूर देशो ते आया रा शुभ समाचार बी ओआ।

26जो तर्मी माणूं दुष्टो रे कईणे पाँदे आओआ,

से गंदे पाणिए री सूबल़ ओर बिगड़े रे कूँएं जेड़ा ए।

27जादा सयीत खाणा ठीक नि ए, पर कठण गल्ला री पूछताछ महिमा री बजा ओई।

28जेस माणूंए री आत्मा आपणे वशो रे नि ए से एड़े शईरो जेड़ा ए जेतेरी दवाल अमला करी की तोड़ी ती री ओ।

1जिंयाँ तऊँदिया रे बर्फा रा ओर बडाईया रे बखते बर्खा रा पड़ना ओआ,

तिंयाँ ई मूर्खो री महिमा बी ठीक नि ऊँदी।

2जिंयाँ पंछी उडदे-उडदे नि बैठदे,

तो तिंयाँ ई बिना मतलबो ते दित्तेया रा स्राप नि पड़दा।

3जिंयाँ कोड़े खे लगाम, ओर गह्दे खे डण्डा बाणा जरूरी ओआ,

तिंयाँ ई मूर्खा रिया पीठी खे डण्डा ए।

4मूर्खो खे तेसरी मूर्खता रिया गल्ला रा जबाव नि देणा, एड़ा नि ओ कि तूँ बी तेस जेड़ा ठईरे।

5मूर्खो खे तेसरी मूर्खता रे मुताबिक जबाव देणा,

नई तो से आपणियां नजरा दे अक्लमंद बणी जाणा।

6जो मूर्खो रे आथो ते सन्देसा पेजोआ,

से मानो आपणे पैरा पाँदे क्वाड़ी बाओआ ओर जईर पियोआ।

7जिंयाँ एक लंगड़ा माणूं आपणे पैरा रा साअरा नि लई सकदा,

तिंयाँ ई मूर्ख माणूंए खे समजा रिया गल्ला बोलणा बेकार ए।

8जिंयाँ पात्थरा रे टेरा रे मणिया री थैली ओई,

तिंयाँ ई मूर्खो खे बी महिमा देणी ओई।

9जिंयाँ शराबिये रे आथो रे कांडा चूबोआ,

तिंयाँ ई मूर्ख माणूंए रा बोलेया रा समजा री गल्ल दु:ख देणे वाल़ा ओआ।

10जिंयाँ कोई तीर चलाणे वाल़ा तीर बिना मतलबो ते सबी खे बाओआ,

तिंयाँ ई मूर्खा खे या यात्रिया खे मजदूरिया पाँदे लगाणे वाल़ा बी ओआ।

11जिंयाँ कुत्ता आपणी‌ उल्टिया खे चाटोआ,

तिंयाँ ई मूर्ख माणूं आपणी मूर्खता रिया गल्ला खे बार-बार बोलोआ।

12जे तूँ एड़ा माणूं देखे जो आपणी नजरा रे अक्लमंद बणोआ,

तो तेसते जादा उम्मीद मूर्ख माणूंए तेई ए।

13आल़सी माणूं आपणे कअरे ई रओए ओर कुछ नि करदे, ओर बोलोए, “माखे लगोआ की बारे आँगणो दे शेर ए!”

14जिंयाँ फल़े आपणियां चूल़ा पाँदे कूमोए,

तिंयाँ ई आल़सी आपणे माँजे पाँदे बदलदा रओआ।

15आल़सी आपणा आथ थाल़िया रे तो पाओआ,

पर आल़सो रिया बजा ते ग्रा मुंए तक नि चकदा।

16समजदारिया ते ज्वाब देणे वाल़े साता माणूंआ बिचा ते बी,

आल़सी आपणे आपू खे अक्लमंद समजोआ।

17जो माणूं बाटा रे चलदे ऊए ओरी लोका रे चगड़ेया रे गट्टी अड़ाओआ,

से तेस माणूंए जेड़ा ए, जो कुत्तेया खे कानो ते पकड़ोआ।

18जेड़ा एक इस्साल माणूं लोका पाँदे बल़े रे लकड़ू ओर मौता रे तीर सेटोआ,

19तेड़ा ई से बी ओआ जो आपणे पड़ोसिये खे तोखा देई की बोलोआ,

“आऊँ तो मजाक करुँ था।”

20जिंयाँ लकड़ू नि ऊणे ते आग बीजी जाओई,

तिंयाँ ई जेती चूगली करने वाल़ा नि ए तेती चगड़ा खत्म ऊई जाओआ।

21जिंयाँ जल़दे फेऊआ पाँदे लकड़ुआ रे कोईले पाई की आग जल़दी रओई,

तिंयाँ ई चगड़ा बढ़ाणे खे चगड़ालू माणूं चगड़ा करदे रओए।

22चूगली करने वाल़े रिया गल्ला, स्वाद खाणे जेड़े पीतरे उतरी जाओईया।

23जिंयाँ कोई चाँदिए रा पाणी चढ़ाए रा माट्टिया रा पांडा ओआ,

तिंयाँ ई बुरे मन वाल़े रिया गल्ला ओईया।

24जो बैरी गल्ला ते तो आपू खे शरीफ बणाओआ,

पर आपणे पीतरे छल राखोआ,

25तेसरी मीठी-मीठी गल्ला पाँदे परोसा नि करना,

कऊँकि तेसरा मन पुरिया तरआ ते कृणा ते परेया रा रओआ।

26चाए तेसरा बैर छलो रिया बजा ते छिपी बी जाओ,

तेबे बी तेसरी बुराई लोका बीचे सामणे आई जाओई।

27जेस खाता खणना से ई तिदे पड़ना ओर जेस पात्थर सेटणा,

से वापस तेस पाँदे ई पड़ना।

28जिने माणूंए कोई दूजा माणूं चूठी गल्ला ते काईल करी राखेया ओ से तेसते बैर राखोआ,

ओर चिकणी चुपड़ी गल्ला बोलणे वाल़ा नाशो री बजा ओआ।

1आऊणे वाल़े दिना रे बारे कमण्ड नि कर,

कऊँकि तूँ नि जाणदा कि पूरे दिनो दे क्या-क्या ऊणा?

2तैं आपणी तारीफ आपू नि करनी; तेरी तारीफ ओर लोक करो तो करो, तैं आपणी सराहना आपू नि करनी;

दूजा ताखे सराओ तो सराओ।

3पात्थर तो पारी ओआ ओर बालूए रे बोज बी ओआ,

पर इना ते बी पारी मूर्खो रा गुस्सा ओआ।

4दूजेया पाँदे गुस्सा करना तो निर्दयिता ए, आसा रा गुस्सा करना कदी-कदी दूजेया खे नाश करी देओआ,

पर केसी साथे जल़न राखणा, तेसते बी जादा निर्दयी ओआ।

5खुली की डांटणा, छिपे रे प्यारो ते खरा ए।

6जो दोस्त तुसा खे सई गल्ला सिखाओआ तेस पाँदे तुसे परोसा करी सकोए,

पर एक दुश्मण तुसा साथे चूठा प्यार दखाओआ।

7रज्जे दे ऊणे ते सयीतो रा छता बी फीका लगोआ,

पर पूखे खे सब कऊड़िया चीजा बी मीठिया लगोईया।

8आपणा कअर छाडी की कूमणे वाल़ा माणूं, तेसा चिड़िया जेड़ा पटकदा रओआ,

जो आपणा कोअला छाडी की उडदी-फिरदी रओई।

9केसी माणूंए रे शरीरो दे तेल ओर खुशबुदार इत्र लगाणे ते तेसखे अच्छा लगोआ,

पर सच्चे दोस्तो री खरी सला तेसा खुशबूआ ते बी जादा बढ़ी की ए।

10जो तेरा ओर तेरे बाओ रा दोस्त बी ओ, से छाडणा नि;

ओर आपणी मुसीबता रे बखते आपणे पाईए रे कअरे नि जाणा।

प्यार करने वाल़ा पड़ोसी, दूर रणे वाल़े पाईए ते केथी अच्छा ए।

11ओ मेरे पाऊ, अक्लमंद ऊई की मेरा मन खुश कर,

तेबे आऊँ तेस माणूंए खे जबाव देई सकूँआ जो तेरिया बजा ते मेरी बेज्जती करोआ।

12अक्लमंद माणूं मुसीबता खे आऊँदा ऊआ देखी की तिजी ते बचणे री कोशिश करोआ,;

पर एक पोल़ा माणूं सिदा तेते ई कनारो खे चलदा जाओआ ओर बादो ते पछताओ आ।

13जे तुसे मूर्खता ते एक परदेशिये ते वादा करोए कि आसे तेरे कर्जे खे टाऊँगे,

जे से तेस कर्जे खे नि टाई सको तो तुसे एते जोगे ए कि तुसा री सम्पति तुसा ते लई लो।

14जो प्यागा उठी की आपणे पड़ोसिये खे जोरे की आशीर्वाद देओआ,

तो से आशीर्वाद तेस पड़ोसिये खे स्रापो जेड़ा ऊणा।

15बरसाती रे बखते पाणिए रा लगातार चुड़ना,

ओर चगड़ा करने वाल़ी लाड़ी दोनो एक जेड़े परेशान करने वाल़े ए।

16एड़िया जवाणसा खे एड़े काम करने ते रोकणा इतना मुश्किल ए जितणा अवा खे रोकणा, ओर आपणे आथो रिया मुठिया दे तेलो रा पकड़ना बी इतना ई मुश्किल आ।

17जिंयाँ लोआ लोए खे चमकाई देओआ,

तिंयाँ ई माणूंए रा मूँ आपणे दोस्तो री संगतिया साथे चमकदार ऊई जाओआ।

18जो दाऊगल़े रे डाल़ो री देख-पाल़ करोआ, से तिजी रा फल खाओआ,

ईंयाँ ई जो आपणे मालको री सेवा करोआ, तेसरी महिमा ओई।

19जिंयाँ पाणिए दे मुंए री परछाई मुंए ते मिलोई,

तिंयाँ ई एकी माणूंए रा मन दूजे माणूंए साथे मिलोआ।

20जिंयाँ अधलोक ओर विनाशलोक माणूंआ रिया लाशा ते नि रज्जदे,

तिंयाँ ई माणूंए रिया आखी बी इच्छा ते नि रज्जदिया।

21जिंयाँ चाँदिए खे परखणे खे पांडे ओर सूईने खे पट्ठी ए,

तिंयाँ ई माणूंए री परख लोका रिया तारीफ करने ते ए।

22चाए तूँ मूर्खो खे नज्जो री ऊखल़िया रे पाई की मूल़ो साथे कूटे,

तेबे बी तेसरी मूर्खता नि जाणी।

23आपणी पेडा-बाकरिया री दशा ठीक टंगो रे मन लगाई की जाणी लो,

ओर आपणे सबी डांगरा रे चूण्डा री देख-पाल़ ठीक-टंगो रे कर।

24कऊँकि कठी कित्ती दी सम्पति ओर राजेया रे राज-पाट सदा बणे रे नि रंदे;

ओर क्या राजमुकुट पीढ़िया ते पीढ़िया तक चलदा रओआ।

25एक बार काआ बाडी की डांगरा खे चांगड़ो दे राखी ता दा ए ताकि ठंडी रे बखते से कामे आओ,

तदुए खे से बाडेया दा काआ फेर उगणे लगी जाओआ।

26तेबे तुसे पेडा री ऊना ते आपू खे टाल्ले बणाई सकोए,

ओर कुछ बाकरे-बाकरिया खे बेची की तिना पैसेया ते जमीन खरीदी सकोए।

27ओर बाकरिया रा इतणा दूद ऊणा कि तां आपणे कराने समेत पेट परी की पिया करना,

ओर तिजी की तेरी नौकराणिया री जिन्दगिया रा बी गुजारा ऊँदा रणा।

1दुष्ट लोक जेबे कोई पीछा नि करदा तेबे बी नठदे ई रओए,

पर तर्मी लोक जवान शेरो जेड़े बिना डरे रओए।

2देशो रे पाप ऊणे रिया बजा ते तेथो रे परदान बदलदे जाओए,

पर समजदार ओर ज्ञानी माणूंए रे जरिए अच्छा प्रबन्द कई दिना तक बणेया रा रणा।

3एक परदान जो गरीब माणूंआ साथे कठोरता रा बर्ताओ करोआ,

से एक एड़े पऊण-चुखाने जेड़ा ए जो फसला खे पुरिया तरआ ते बर्बाद करी देओआ।

4जो लोक परमेशरो री बिधानो खे नि मानदे, सेयो दुष्टो री तारीफ करोए,

पर बिदिया पाँदे चलणे वाल़े लोक दुष्टो रा सामणा करोए।

5बुरे लोक नि जाणदे कि न्याय साथे बर्ताव करने रा क्या मतलब ए,

पर जो लोक यहोवे री पग्ति करोए सेओ इजीखे सई रितिया दे समजोए।

6टेडी चाल चलणे वाल़े अमीर माणूंए ते, खराईया साथे चलणे वाल़ा गरीब माणूं खरा ए।

7बिधानो खे मानणे वाल़ा पाऊ समजदार गिणेया जाओआ,

पर उड़ाऊए रा साथी आपणे बाओ रा मूँ काल़ा करोआ।

8जो अमीर माणूं ब्याजो पाँदे पैसा देई की आपणा पैसा बढ़ाओआ,

अन्तो दे तेसरा सारा पैसा तेसगे जाणा, जो गरीबा पाँदे दया करोआ।

9जो परमेशरो रे बिधानो ते नफरत करोआ,

परमेशर तिना री प्रार्थना पसन्द नि करदा।

10जो माणूं सीदे-सादे लोका खे बईकेरी की बुरिया बाटा रिये लई जाओआ,

से आपणे खणे रे खाते रे आपू ई रूड़ी जाओआ;

पर खरेया लोका रा पला ई ओआ।

11अमीर माणूं ये सोचोआ कि आऊँ अक्लमंद ए,

पर समजदार गरीब माणूं तेसरी काबलियत जाणी लओआ कि से अक्लमंद ए कि नि।।

12जेबे तर्मी लोक जीतोए, तेबे बड़ी शोभा ओई,

पर जेबे दुष्ट लोक प्रबल ओए, तेबे माणूं आपणे आपू खे लकोए।

13जो माणूं आपणे पाप लकोआ, तेसरा काम सफल नि ऊँदा,

पर जो तिना खे मानी लओआ ओर छाडी बी देओआ,

तेस पाँदे दया करी जाणी।

14जो माणूं लगातार यहोवे रा डर मानदा रओआ, से तअन्य ए;

पर जो माणूं आपणा मन काठा करी लओआ, से मुसीबता रे पड़ोआ।

15गरीब प्रजा पाँदे राज करने वाल़ा दुष्ट राजा गरजणे वाल़े शेर ओर शकारो रिया तँईं कूमणे वाल़े रीछो जेड़ा ए।

16जो परदान समजदार नि ऊँदा, सेई आपणेया लोका पाँदे बऊत अन्देर करोआ,

ओर जो परदान दूजेया खे ठगी कि अमीर नि बणदे तिना री लाम्बी उम्र ओई।

17जो कोई माणूं केसी दूजे माणूंए री अत्या करी की नठी रा ओ से पक्का गड्डे रे पड़ना;

ओर तेसखे नि रोको

18ईमानदारिया साथे चलणे वाल़े माणूंए खे सब कोई बचाओए,

पर जो टेडी चाल चलोआ से अचाणक रूड़ोआ।

19जो आपणी जमीना दे बेजा बाओआ, से पेट परी की रोटी खाओआ,

पर नकम्मे लोक जो बखत बर्बाद करोए, सेओ गरीब ई रओए।

20जो माणूं सच्चाईया साथे चलोआ तेस पाँदे बऊत आशीष रओई,

पर जो माणूं अमीर ऊणे रिया तँईं जल्दबाजी करोआ, से पक्का दोषी ठईरना।

21केसी माणूंए साथे पक्षपात करना अच्छा नि ऊँदा;

ओर ये बी अच्छा नि ए कि माणूं रोटिया रे एकी टुकड़े रिया तँईं पाप करो।

22जो माणूं पैसे रा लाल़च करी की पैसा लणे खे जल्दबाजी करोआ,

पर से ए नि जाणदा कि से कमिया रेई पड़ेया दा रओआ।

23जो कोई माणूं केसी दूजे माणूंए खे तेसरिया गल़तिया रिया बजा ते तेसखे बकोआ,

से अन्तो रे चापलूसी करने वाल़े ते जादा प्यारा ऊई जाओआ।

24जो पाऊ आपणे माया-बाओ री चोरी करी की बोलोआ कि मैं कोई बुरा काम नि करी राखेया,

से कअर जवाड़ने वाल़े रा साथी ठईरोआ।

25लाल़ची माणूं चगड़ा करोआ ओर,

जो यहोवे पाँदे परोसा राखोआ, से तगड़ा ऊई जाओआ।

26मूर्ख माणूं सिर्फ आपू पाँदे ई परोसा राखोआ;

ओर जो अक्लमंदिया साथे चलोआ, से आपणे प्राण बचाओआ।

27जो माणूं गरीबा खे दान देओआ, तेसखे केसी बी चीजा री कमी नि ऊँदी,

पर जो गरीब माणूंए खे देखी की आपणी नजर फेरी लओआ,

तेसखे स्रापो पाँदे स्राप मिलोए।

28जेबे दुष्ट माणूं प्रबल ओआ, तेबे लोक डरो रे मारे लूकी जाओए,

पर जेबे से नाश ऊई जाओआ, तेबे तर्मी तरक्की करोए।

1जो माणूं बार-बार चतौणी देणे ते बाद पनि मानदा,

से एक दिन अचाणक नाश ऊई जाणा।

2जेबे तर्मी माणूं राज करोए, तेबे प्रजा बऊत खुश ओई,

पर बुरे माणूंए रे राज करने रे बखते प्रजा हाय-हाय बोलोई।

3जो माणूं बुद्धिया रिया गल्ला ते प्यार करोआ, से आपणे बाओ खे खुश करोआ,

पर वेश्या री संगति करने वाल़ा पाऊ पैसे खे उडाई देओआ।

4राजे रे न्याय करने रिया बजा ते तेसरा देश बणेया रा रओआ,

पर जो राजा आपणियां प्रजा खे लूटोआ, से आपणे देशो खे पल़टी देओआ।

5जो माणूं केसी ओरी ते चिकणी चुपड़ी गल्ला करोआ, से ओरी खे नि पर सिर्फ आपू खे ई जाल़ लगाओआ।

6बुरा माणूं पाप करने रिया बजा ते फन्दे दे फसोआ,

पर तर्मी माणूं खुश ऊई की जयजयकार करोआ।

7एक तर्मी माणूं गरीबा रे अधिकारा खे जाणोआ,

पर बुरे माणूं इना गल्ला खे नि समजदे।

8सबी गल्ला दे मजाक करने वाल़े लोक शईरो खे बी फूकी देओए,

पर अक्लमंद लोक आपणियां गल्ला ते गुस्से खे ठण्डा करी देओए।

9जेबे अक्लमंद माणूं मूर्ख माणूंए साथे मकदमा लड़ोआ,

तेबे से मूर्ख मजाक करोआ ओर जोरे की गल़त गल्ला बोली कि बेज्जती करोआ।

10अत्यारे लोक खरे माणूंआ ते नफरत करोए,

पर तर्मी लोक खरेया माणूंआ रे प्राणा खे बचाओए।

11मूर्ख माणूं गुस्से दे सारे मनो री गल्ल खोली देओआ,

पर अक्लमंद माणूं आपणे मनो खे रोकोआ ओर शान्त रओआ।

12जेबे शासक चूठीया गल्ला सुणी की तिना पाँदे परोसा करोआ,

तेबे तेसरे सारे कर्मचारी बी अन्याय करने लगी जाओए।

13गरीब ओर अन्देर करने वाल़ा माणूं दोनो एक जेड़े ए;

ओर यहोवे तिना दुँईं खे देखणे खे आखी देई राखिया।

14जो राजा गरीब लोका रा न्याय सच्चाईया साथे करोआ, तेसरी गद्दी सदा बणी री रओई।

15जेस बच्चे रे माये-बाओ तेसखे डण्डे री बाओए ओर चिड़को ए से ज्ञानी बणी जाओआ,

पर जेस बच्चे खे ईंयाँ ई छाडी देओए, से आपणी माया खे शर्मा री बजा बणोआ।

16जेबे बुरे लोक राज करोए तेबे पाप बी बढ़ोए,

पर अन्तो रे तर्मी लोक तिना रा आरना देखी लओए।

17आपणे बच्चेया खे सुदार, तेबे तुँ तिना पाँदे कमण्ड करी सकेया,

तेबे तिना रिया बजा ते तुँ कदी बी शर्मिंदा नि ऊणा।

18जेते देशो दे लोक परमेशरो रा बिधान नि मानदे, सेयो लोक बर्बाद ऊई जाओए।

पर जो बिधानो खे मानोए तिना खे से आशीष देओआ।

19दास गल्ले की नि सुदारेया जांदा, कऊँकि से तेरिया गल्ला खे समजी की पनि मानदा।

20क्या तूँ गल्ला करने रे जल्दबाजी करने वाल़े माणूंए खे जाणेया?

तेसते जादा तो मूर्खो ते ई उम्मीद ए।

21जो आपणे दासो खे बचपनो तेई आपणे बच्चे जेड़ा पाल़ोआ,

तो से दास बादो ते तेसरिया सम्पत्तिया रा अक्कदार बणी जाणा ओर मालको रा सब कुछ लई लणा।

22जो माणूं जादा गुस्सा करने वाल़ा ओआ,

से लड़ाई-चगड़ा करोआ ओर पापी ओआ।

23जो माणूं पईले कमण्ड करोआ तेसखे बादो ते नीचा ई देखणा पड़ोआ,

पर नम्र सबाओ वाल़े माणूंए रा सब आदर करोए।

24जो चोरो री संगत करोआ, से आपणे प्राणो रा बैरी ओआ,

कसम खाणे ते बाद बी से गल्ल नि बतांदा।

25माणूंए रा डर मानणा फन्दा ऊई जाओआ,

पर जो यहोवे पाँदे परोसा राखोआ, तेस लोका बीचे आदर पाणा।

26परदानो खे आपणा दोस्त तो बऊत लोक बनाणा चाओए,

पर माणूंआ रा सच्चा न्याय यहोवा ई करोआ।

27तर्मी लोक बुरे माणूंआ ते नफरत करोए,

ओर दुष्ट माणूं बी सीदी चाल चलणे वाल़ेया ते नफरत करोआ।