परमेशरो रा प्यार ओर माणूंए री दुष्टता
बजाणे वाल़े रे परदानो रिया तँईं प्रभुए रे दास दाऊदो रा पजन
1दुष्ट लोक लगातार पाप करने री इच्छा करदे रओए। सेयो सोचोए कि तिना खे परमेशरो रा आदर करने री जरूरत नि ए।
2सेयो आपू खे बऊत जादा पसन्द करोए, इजी री खातर सेयो आपणे पापो खे नि देखदे ओर नफरत पनि करदे।
3तेसरे मुंए रिया गल्ला अनर्थ ओर छलो रिया ए;
तिने बुद्धि ओर पलाईया रे काम करने बंद करीते दे।
4से आपणे बछौणे पाँदे लेटे रे बुरिया गल्ला सोचोआ;
से आपू खे तेसा बाटा रे लई की चलोआ जिदे पलाई नि ए;
बुराई करने ते से पीछे नि अटदा।
5ओ प्रभु, तेरी करूणा स्वर्गो तक महान ए,
तेरी सच्चाई सर्गो तक पऊँची री।
6तेरी तार्मिकता ऊच्चे पाह्ड़ो जेड़ी ए, तेरे नियम समुद्रो जेड़े गईरे ए;
ओ प्रभु, तूँ माणूं ओर डांगर दुँईं री रक्षा करेया।
7ओ परमेशर, तेरी करूणा कितणी कीमती ए!
माणूं तेरे पंखा रिया छाया रे शरण लओए।
8सेयो तेरे मईलो रे चिकणे खाणे ते रजणे,
ओर तां आपणी सुखो री नदिया ते तिना खे पाणी पल़्याणा।
9कऊँकि जिन्दगिया री सूबल़ तांगे ईए;
तेरी जोतिया रे जरिए आसा खे प्रयासा मिलणा।
10जो पग्त ताखे जाणोए तिना पाँदे तूँ आपणी करूणा करदा रओ
ओर सच्चाईया साथे चलणे वाल़ेया पाँदे आपणी तार्मिकता बणाई की राख!
11कमण्डी माणूंआ खे मां पाँदे अमला करने नि दे,
ओर ना ई दुष्ट माणूंआ खे मेरा पीछा करने
12तेती बुरे काम करने वाल़े रूड़ी गे रे;
सेयो तकेली ते रे ओर फेर उठी नि सकणे।
