कुकर्मिया रा अन्त ओर तर्मिया रा अन्त
दाऊदो रा पजन
1बुरे काम करने वाल़ेया री बजा ते आपू खे परेशान नि करो,
गल़त काम करने वाल़ेया ते ईर्ष्या नि कर!
2कऊँकि सेयो काओ जेड़े चट ई बाडी देणे
ओर अरे काओ जेड़े मुरझाई जाणे।
3प्रभुए पाँदे परोसा राख ओर पले काम कर, देशो रे बसेया रा रओ
ओर सच्चाईया पाँदे मन लगाई की राख।
4तुसे तेड़ा ई करना जेड़ा यहोवा चाओआ,
ओर तेस तेरे मनो री इच्छा पूरी करनी।
5आपणियां बाटा री चिन्ता प्रभुए पाँदे छाड
ओर तेस पाँदे परोसा राख, तेस ई पूरा करना।
6तेरी तार्मिकता त्याड़िया रिया तूपा रे प्रयासे जेड़ी चमकणी
ओर तेरी सच्चाई त्याड़िया रे प्रयासे जेड़ी प्रगट करनी।
7प्रभुए रे सामणे शान्त रओ ओर सब्रो साथे तेसखे न्याल़;
तेस माणूंए रिया बजा ते आपू खे परेशान नि कर जो बुरे काम करने रे जरिये सफल ओआ
ओर से बुरिया साजिशा खे निकयाल़ोआ!
8गुस्से ते दूर रओ ओर जल़ना छाडी देओ!
आपू खे परेशान नि कर, तिजी ते बुराई ई निकल़नी।
9एक दिन यहोवे दुष्ट लोक नाश करने,
पर जो लोक यहोवे पाँदे परोसा राखोए, सेयो ई तरतिया रे अक्कदार ऊणे।
10दुष्ट माणूं चट ई राची जाणे,
ओर तुसा खे सेयो फेर टोल़ी की पनि मिलणे।
11पर नम्र लोक तरतिया रे अक्कदार ऊणे
ओर तिना बड़ी शान्तिया साथे खुशी मनाणी।
12दुष्ट माणूं तर्मिया रे खलाफ षड़यन्त्र रचोए
ओर तेस पाँदे दाँद किरड़ोए।
13पर परमेशर यहोवा दुष्ट लोका पाँदे आसणा,
कऊँकि से देखोआ कि तिना रे आखरी न्याय रे दिन नेड़े आऊणे वाल़े ए।
14दुष्ट लोके तलवारी खींजी राखिया ओर धनुष चढ़ाई राखे,
ताकि दु:खी ओर सीदे लोका खे माट्टिया रे मलाई देओ
ओर सई काम करने वाल़ेया खे काई सको।
15तिना रिया तलवारी साथे तिना रेई दिल छिदणे
ओर तिना रे धनुष तोड़े जाणे।
16तार्मिक माणूंए रा थोड़ा जा तअन
दुष्ट माणूंए रे बऊत सारे धनो ते खरा ए।
17कऊँकि यहोवा दुष्ट माणूंआ री तागत खत्म करोआ,
पर तार्मिक माणूंआ खे सम्बाल़ोआ।
18निर्दोष माणूंआ री देखपाल़ यहोवा आपू करोआ,
ओर तिना री बरासती रा इस्सा हमेशा बणेया रा रणा।
19बिपदा रे बखते तिना री उम्मीद नि टूटणी ओर ना सेयो शर्मिंदा ऊणे
बल्कि अकाल़ो रे बखते सेयो रज्जे रे रणे।
20दुष्ट लोक नाश ऊई जाणे ओर
प्रभुए रे दुश्मण काओ रे फूलो जेड़े नाश ऊई जाणे,
सेयो तुएँ जेड़े लोप ऊई जाणे।
21दुष्ट कर्ज लओआ ओर चुकांदा नि,
पर तार्मिक माणूं दया करी की दान देओआ;
22यहोवे ते आशीष पाए रे लोक तरतिया रे अक्कदार ऊणे,
पर सेयो लोक नाश ऊई जाणे जिना खे यहोवे स्राप देई राखेया।
23जे तुसे सेई करोए जो प्रभु चाओआ,
तो तेस तेरिया बाटा दे तेरी रक्षा करनी।
24चाए से रूड़ो तेबे बी सदा थाले पड़ेया रा नि रणा,
कऊँकि प्रभु तेसरा आथ पकड़ी राखोआ।
25आऊँ बचपनो ते लई की स्याणदे बखतो तक देखदा आई रा;
प्रभुए ना तो कदी कोई तर्मी माणूं छाडेया
ओर ना ई तेसरी ल्वाद पीख मांगदे ऊए देखी।
26तर्मी माणूं तो सदा दया करी की कर्ज देओआ
ओर तेसरा वंश आशीषा रा जरिया बणोआ।
27बुराईया ते दूर रओ ओर पले काम कर;
तेबे तूँ देशो रे सदा शान्तिया साथे बसेया रा रणा।
28कऊँकि प्रभु न्याय साथे प्यार राखोआ ओर तेस आपणे पग्त नि छाडणे।
तिना री रक्षा तो सदा ओई, पर दुष्ट माणूंआ रे बच्चे नाश ऊई जाणे।
29तार्मिक माणूं तरतिया रे अक्कदार ऊणे
ओर तिदे सदा बसे रे रणे।
30तार्मिक माणूं आपणे मुंए ते अक्ला रिया गल्ला करोआ
ओर न्याय रा वचन बोलोआ।
31सेयो हमेशा परमेशरो री बिदिया रे बारे दे सोचदे रओए,
ओर परमेशरो रिया बाटा ते कदी बी दूर नि ऊँदे।
32दुष्ट माणूं तार्मिक माणूंए री ताका रे रओआ
ओर तेसखे काणे री कोशिश करोआ।
33पर यहोवा दुष्ट माणूंए खे सफल नि ऊणे देंदा,
ओर जेबे तार्मिक माणूंए रा न्याय ऊणा, तेबे प्रभुए से दोषी नि ठराणा।
34प्रभुए खे न्याल़दा रओ ओर तेसरी बाटा रे चलदा रओ,
ओर तेस तेरी तरक्की करी की तूँ तरतिया रा अक्कदार बणाई देणा;
तां दुष्ट माणूंए रा सत्यानाश ऊँदे देखणा।
35मैं दुष्ट एड़ा पराक्रमी ओर एड़ा फैलदा ऊआ देखेया,
जेड़ा कोई अरा डाल़ आपणी जमीना दे आपणे-आपू जम्मेया रा फैलोआ।
36पर कुछ बखतो ते बाद मैं देखेया कि से तेथा ते राचीगा रा ए
ओर मैं बी से टोल़ेया, पर तेबे बी से तेती नि मिलेया।
37खरे माणूंए खे त्यानो दे राखो ओर तर्मिये खे देख,
कऊँकि शान्तिया ते रणे वाल़े माणूंए रे अंतो रा फल अच्छा ए।
38पर दुष्ट पापी माणूं पूरी तरआ ते बर्बाद ओए,
तिना रे बाल-बच्चे पनि रणे।
39तार्मिक माणूंए खे यहोवा आपू बचाओआ,
मुसीबता रे बखते से तिना रा मजबूत गढ़ ए।
40प्रभु तिना माणूंआ री मताद करी की तिना खे बचाओआ;
से तिना खे दुष्टा ते छुड़ाई की तिना री रक्षा करोआ,
कऊँकि सेयो तेसरी शरणा रे आई रे।
