परमेशरो रा न्याय ओर दया
परदान बजाणे वाल़े रिया तँईं मश्किलो पाँदे दाऊदो रा पजन, जेबे एदोम देशो रे दोएगे शाऊलो खे बताया कि दाऊद अहीमेलेको रे कअरे आई रा।
1ओ तागतबर माणूं, कऊँ तूँ आपणे कुकर्मा पाँदे कमण्ड करेया?
परमेशरो री करूणा तो सदा बणी री रओई।
2सारा दिन तुसे दूजेया ते छुटकारा पाणे री योजना बणाओए;
तुसे जो बोलोए से पैने चाकुए रिया तरआ दूजेया खे चोट पऊँचाओए, ओर तुसे हमेशा दूजेया खे तोखा देंदे रओए।
3ताखे पलाईया ते बढ़ी की बुराई
ओर सच्च बोलणे ते अलावा चूठ प्यारा ए। सेला
4तुसे लोका खे तोखा देणे रिया तँईं गल्ला बोलोए, तुसा खे लोका खे चोट देणा अच्छा लगोआ।
5जरूर परमेशरो तूँ सदा खे नाश करी देणी;
तेस तूँ पकड़ी की तेरे रणे री जगा ते निकयाल़ी देणी
ओर जिऊँदेया रे लोको ते तूँ पट्टी की सेटी देणी। सेला
6तेबे तार्मिक लोक एसा घटणा खे देखी की डरी जाणे
ओर ये बोली कि तेस पाँदे आसणे,
7“देखो, ये सेई माणूं ए जिने परमेशर आपणी शरण नि मानेया,
पर तिजी रे बदले तिने आपणी तअन-दौलता पाँदे परोसा राखेया
ओर आपू खे ओरी लोका रा नुकशाण करने रिया तँईं मजबूत करदा रया!”
8पर आऊँ तो परमेशरो रे मन्दरो रे अरे जैतूनो रे डाल़ो जेड़ा ए।
मैं परमेशरो रिया करूणा पाँदे सदा परोसा करूँआ।
9ओ परमेशर, मां तेरा तन्यवाद सदा करदे रणा;
कऊँकि तैंई ये काम करी राखेया।
मां तेरे नाओं रा गुणगाण तेरे पग्ता रे सामणे करना कऊँकि तेरा नाओं खरा ए।
