सच्चे न्याय रिया तँईं बिनती
आसापो रा पजन
1परमेशरो रिया सभा दे परमेशर ई खड़ी रा,
से ईश्वरा रे दूता बीचे न्याय करोआ।
2तुसा लोका कदुओ तक अन्याय साथे फैंसला करदे रणा
ओर दुष्ट लोका रा पक्ष लंदे रणा? सेला
3गरीब ओर अनाथा रा न्याय चुकाओ,
जरूरतमंदा ओर बेसहारा खे बेकसूर सिद्ध करो।
4कमजोर ओर बेसहारा लोका खे बचाई लओ;
ताकि बुरे लोक तिना खे काईल नि करी सको।
5ईश्वर ना तो कुछ समजोए ओर ना कुछ जाणोए,
बल्कि सेयो न्हेरे पटकणे लगी रे; तरतिया री पूरी निऊँ ईल्ली जाओई।
6मैं बोलेया, “तुसे ईश्वर ए,
ओर सब के सब परमपरदान परमेशरो रे पाऊ ए;
7तेबे बी तुसे माणूंआ जेड़े मरने,
ओर परदाना जेड़ा तुसा रा बी पतन ऊई जाणा।”
8ओ परमेशर उठ, तरतिया रा न्याय कर;
कऊँकि सारे देशा पाँदे तेरा ई अक्क ए!
