मतादा रिया तँईं प्रार्थना
दाऊदो री प्रार्थना
1ओ यहोवा, मेरिया बिनतिया खे त्यानो साथे सुण ओर माखे उत्तर दे,
कऊँकि आऊँ दु:खी ओर गरीब ए।
2मेरे प्राणो री रक्षा कर, कऊँकि आऊँ पग्त ए;
तूँ मेरा परमेशर ए, इजी री खातर आपणे दास माखे,
जेसरा परोसा तां पाँदे ए, उद्धार कर।
3ओ यहोवा, मां पाँदे दया कर;
कऊँकि आऊँ ताखे ई लगातार आका पाँदा रऊँआ।
4ओ यहोवा, आपणे दासो रे मनो खे खुश कर,
कऊँकि आऊँ तेरा ई त्यान करूँआ।
5ओ यहोवा, तूँ पला ओर माफ करने वाल़ा ए,
ओर जितणे ताखे पुकारोए तिना सबी पाँदे तूँ बऊत करूणा करने वाल़ा ए।
6ओ प्रभु, मेरिया प्रार्थना पाँदे त्यान दे;
ओर मेरी बिनती त्यानो साथे सुण।
7मुसीबता रे बखते मां ताखे आका पाणिया,
कऊँकि तां मेरी सुणी लणी।
8ओ यहोवा, देवतेया बीचे तां जेड़ा कोई नि ए,
ओर ना ई ओरी रे काम तेरे कामा रे बराबर ए।
9ओ यहोवा, जितणिया जातिया तैं बणाई राखिया,
सबी तां सामणे आई की तांगे माथा टेकणा,
ओर तिना तेरे नाओं री महिमा करनी।
10कऊँकि तूँ महान ए ओर नौखे काम करने वाल़ा ए,
बस तूँई एक परमेशर ए।
11ओ यहोवा, आपणी बाट माखे दखा, ताकि आँऊ सच्चाईया पाँदे चलूँ;
माखे एक चित्त कर, ताकि आऊँ तेरे नाओं रा डर मानूँ।
12ओ यहोवा, ओ मेरे परमेशर, मां आपणे पूरे मनो ते तेरा तन्यवाद करना,
ओर तेरे नाओं री महिमा सदा करदे रणा।
13मेरिया तँईं तेरा लगातार प्यार कितणा महान ए!
तैं आऊँ मरने ते बचाई ला।
14ओ परमेशर, कमण्डी लोक मेरे खलाफ उठी रे,
ओर बुरे लोका रा चूण्ड माखे काणे रा मोका टोल़ेया करोए,
ओर सेयो लोक तेरा कुछ बी आदर नि करदे।
15पर तूँ, ओ प्रभु, दयालु ओर कृपा, देरिया ते गुस्सा करने वाल़ा,
करूणा ओर सच्चाईया ते परेया रा परमेशर ए।
16मेरिया तरफा खे फिरी की मां पाँदे दया कर;
आपणे दासो खे तूँ सामर्थ दे, ओर आपणी दासिया रे पाऊए खे बचा।
17आपणी पलाईया रा कोई चिह्न दखा,
जेतेखे देखी की मेरे बैरी शर्मिंदा ओ, कऊँकि ओ प्रभु,
तैं आपू मेरी मताद कित्ती ओर माखे शान्ति देई राखी।
