सबी खे सुसमाचार
7तेबे, जेड़ा मसीहे बी परमेशरो री महिमा री खातर तुसे अपनाए, तेड़े ई तुसे बी एकी-दूजे खे अपणाओ। 8आऊँ बोलूँआ कि जो वादे बाप-दादेया खे दित्ते थे, तिना खे मजबूत करने खे, मसीह, परमेशरो री सच्चाईया रा सबूत देणे खे खतना कित्ते रे लोका रा सेवक बणेया। 9और दूजी जाति बी परमेशरो री दया पाई कि तेसरी बढ़ाई करो। जेड़ा पवित्र शास्त्रो लिखी राखेया,
“इजी री खातर जातिया-जातिया बीचे मां तेरा धन्यवाद करना
और तेरे नाओं रे पजन गाणे।”
10फेर बोली राखेया,
“ओ दूजिया जातिया रे सब लोको,
परमेशरो री प्रजा साथे खुशी मनाओ।”
11एकी ओरी जगा लिखी राखेया,
“ओ दूजिया जातिया रे सब लोको, प्रभुए री स्तुति करो
और ओ राज्य-राज्य रे सब लोको, तेसखे सराओ।”
12और तेबे यशायाह बोलोआ,
“यिशै रे वंशो ते एक सामणे आऊणा
और दूजी जातिया रा हाकिम ऊणे खे उठणा,
तेस पाँदे दूजी जातिया उम्मीद राखणी।”
13आँऊ परमेशरो ते प्रार्थना करूँआ कि जो उम्मीदा रा दाता ए, तुसा खे विश्वास करने रे सब प्रकारा री खुशी और शान्तिया ते परिपूर्ण करो, ताकि पवित्र आत्मा री सामर्था ते तुसा री उम्मीद बड़दी जाओ।
