एलीमेलेको रे परिवारो रा मोआब देशो खे जाणा
1जिना दिना दे न्यायी लोक इस्राएलो पाँदे राज करो थे तिना दिना दे तेस देशो दे अकाल़ पड़ेया, तेबे यहूदा प्रदेशो रे बेतलेहम शईरो रा एक माणूं आपणी लाड़ी ओर दोनो पाऊआ खे साथे लई की मोआब देशो दे परदेशी ऊई की रणे खे चलीगा। 2तेस माणूंए रा नाओं एलीमेलेक था ओर तेसरी लाड़िया रा नाओं नाओमी था। तिना रे दुँईं पाऊआ रे नाओं महलोन ओर किल्योन थे। सेयो यहूदा प्रदेशो रे बेतलेहम शईरो रे एप्राता रे रणे वाल़े थे। ओर जेबे सेयो मोआबो रे देशो दे आए, तो तेथी ई रणे लगे। 3जेबे सेयो तेथी रणे लगी रे थे तेबे नाओमिया रा लाड़ा एलीमेलेक मरी गा ओर नाओमी ओर तेसा रे दोनो पाऊ रयी गे। 4तिने दुँईं जवान माठेया एक-एक मोआबिन बेटिया साथे ब्या करी ला; एकी बेटिया रा नाओं ओर्पा ओर दूजिया रा नाओं रूत था। सेयो तेते जगा दे कोई दस साला तक रये। 5जेबे महलोन ओर किल्योन दोनो मरी गे। तेबे नाओमी आपणे दोनो पाऊआ ओर लाड़े रे मरने ते बाद कल्ली ऊईगी थी।
