Mazuwa mo okolo uba̱ta̱ wa̱ A̱sula̱
Ica ya̱ Da̱wuda. A mantsa ma na u da̱na̱i a̱tsumona a Yahuda.
1A̱sula̱, a̱vu ɗa A̱sula̱ a̱ va̱,
n te izami ya̱ wu babu uro,
okolo a̱ va̱ a ta uwwusa akuli a̱ wu,
waru n ta̱ maluwa ma̱ wu,
tse e iɗa yu u'yewu,
i na i ri babu mini waru babu ili.
2Mee ene wu ta̱ uba̱ta̱ wa akiza,
waru mi idana ta̱ ucira wa̱ wu
na̱ tsugbain tsa̱ wu.
3Adama a na icigi ya̱ wu i na i tsu vadala shi
i la'a ta̱ wuma ulobonu,
una̱ u va̱ u ta yuwaan wu ica.
4N ta cuwa wu a rana wuma u va̱,
waru a̱tsuma̱ a ala a̱ wu a ɗa
ma̱a̱ 'ya̱sa̱n e ekere a̱ va̱.
5Wuma u va̱ u ta̱ cuwa̱n
cine vu revei ilyalya i sa'ani,
una̱ u va̱ u ta cuwa wu ni ishipa i ma̱za̱nga̱.
6A mantsa ma na n ri nven a̱a̱ga̱da̱ a̱ va̱,
n tsu da̱na̱ ta̱ a majiyan ma̱ wu,
ayin ma̱ɓula̱ a cuwusan na̱ a̱vu.
7Adama a na a̱vu ɗa za vi ikambishi i va̱,
n ta canasa ishipa i ma̱za̱nga̱,
za̱la̱ vu ululu ve evelu a̱ wu.
8Wuma u va̱ u suraa wu ta̱,
ukere u sa'ani wa̱ wu u guza̱ mu ta̱.
9Aza a na gba a cigai o kototo mu a̱ ta̱ kuwa̱,
a̱ ta̱ ka̱ra̱ a̱ cipa̱ uba̱ta̱ wa̱ a̱kwa̱kwa̱.
10Oto o una le na̱ matsun me pe'eni,
o to o'wo ilyalya i musa̱n mu una.
11Amma mogono ma ta yuwan ma̱za̱nga̱ na̱ A̱sula̱,
aza a na a kucinai na Aala a̱ A̱sula̱
a ta yuwan ma̱za̱nga̱,
amma A̱sula̱ a̱ ta̱ ɓa̱ru
na̱ va̱ a̱za̱ e epen.
