Tsugbain za va A̱sulazuva ɗa
Ica ya̱ Da̱wuda.
1N ta cuwa wu, A̱sula̱ a̱ va̱ Mogono ma̱ va̱,
n ta ca ala a̱ wu tsugbain hali hali hali.
2N ta cuwa wu urana suru,
n ta ca ala a̱ wu tsugbain hali hali hali.
3A̱sulazuva Zagbain ɗa, za na rawai a cuwa yi lon!
Tsugbain tsa̱ yi za gura cuɗuwa yi shi!
4A ta cuwa linga va̱ wu
diga a mantsa a̱ tyo mantsa mo ro,
a ta cuɗuwa linga gbagbain va̱ wu.
5A ta yuwan adanshi
o ucira u tsugbain tsa̱ wu,
a̱mu waru n ta yuwan majiyan
ma linga va asalama a̱ wu.
6Ama a ta yuwan adanshi,
adama a linga gbagbain wovon va̱ wu,
reve a̱mu n damma a̱bunda̱,
a̱ tsugbain tsa̱ wu.
7O to ɓosho na adanshi a̱ ma̱za̱nga̱,
a̱bunda̱ e isa'ani ya̱ wu,
reve a cana ishipa i ma̱za̱nga̱,
adama a̱ɓula̱ a̱ wu.
8A̱sulazuva za vi isa'ani ɗa,
ni iliyali,
za na tsu yuwan upan go'o shi,
tapu ɗa u ri ni icigi i na i tsu vadala shi.
9A̱sulazuva za vi isa'ani ɗa
a̱ tyo e ekere a vuma suru,
waru u to rocosu
ili i na u yuwain suru iliyali.
10A̱sulazuva, ili i na vu yuwain suru
a̱ ta̱ godyowo wu,
a̱za̱ a̱ɓula̱ a̱ wu suru
a ta cuwa wu.
11A ta yuwan adanshi
a tsugbain tso tsugono tsa̱ wu,
a̱vu a yuwan adanshi o ucira wa̱ wu.
12Adama vaɗilima̱ suru reve,
na̱ linga gbagbain va̱ wu,
na̱ tsugbain tso tsugono tsa̱ wu.
13Tsugono tsa̱ wu, tsugono tsa hali hali ɗa,
waru tsugbain tsa̱ wu,
diga mantsa a̱ tyo mantsa mo ro ɗa.
A̱sulazuva za va̱ a̱ɓula̱ a ɗa
a̱tsuma̱ a nzuwulai ma̱ yi suru,
za vi icigi waru e ekere e ili i na u yuwain biti.
14A̱sulazuva a̱ tsu kamba ta̱,
aza a na a̱ riya̱i suru,
reve u 'ya̱sa̱n,
aza a na suru a̱ ka̱ɗa̱toi.
15Ama suru a zuwa ta̱ okolo e le uba̱ta̱ wa̱ wu,
vu tsu ca le ta̱ ilyalya,
a mantsa ma na wuntsayi.
16Vu tsu ca ta̱ na̱ okolo a̱ ta̱,
a̱vu vu cuwa̱ton ili i na i ri wuma suru,
o una̱ wi ili i na a cigai.
17A̱sulazuva za va̱ a̱ɓula̱ ɗa,
a̱tsuma̱ e re va̱ yi suru,
za vi isa'ani ɗa,
a̱tsuma̱ a linga va̱ yi suru.
18A̱sulazuva a̱ ta̱ zuzu,
na aza a na ee ɗesu ya̱'a̱ yi,
na aza a na ee ɗesu yi a̱tsuma̱ a amayun.
19U tsu shitowon ta̱ aza a na aa uwwusa wovon wa̱ yi
ni ili i na a cigai,
waru u tsu uwwa ta̱ mesun me le,
reve u wawa le.
20A̱sulazuva aa tsu yuwaan ta̱
aza a na a ciga niyi suru mapari,
amma u to kototo a̱za̱ e iwuya suru.
21Una̱ u va̱ u ta yuwan
adanshi e ica ya̱ A̱sulazuva,
aza a wuma suru a ta cuwa
ala a Akiza a̱ yi hali hali hali.
