Select a Verse
ಇಸ್ರಾಯೆಲನಾ ಕುರುಬರೊ
1ಯಹೊವಾ ಎ ವಾತ ಮನೆ ದಿದ್ಯೊ. 2ಮನಕ್ಹನಾ ದಿಕ್ರಾ, ಇಸ್ರಾಯೆಲ ಕವಾನಾ ಹಿಂಡನಾ ಕುರಬುರ್xಯೊನೆ ಎ ಕ್ಹುದಾನಿ ವಾತ ಕೆ, ಕೆಜ಼ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಅಯ್ಯೊ, ಸ್ವಂತ ಪೆಟನೆ ಹೊರೆದ ಲಿವಾನಾ ಇಸ್ರಾಯೆಲನಾ ಕುರಬುರ್xಯೊನಿ ಗತಿ ಸು ಕೌ! ಬಕ್ರಾವೊನು ಪೆಟ ದೆಕಾನು ಕುರುಬು ಧರ್ಮ ವ್ಹೈ. 3ತುಮೆ ಕೊಬ್ಬಿನು ಮಾಕ್ಹ ಕ್ಹಾವೊಶಿ, ಬಕ್ರಾನಾ ಬಾಲೊನಿ ಹೊದಕಿ ವರಾಡಿಲಿವೊಶಿ, ಕೊಬ್ಬಲ ಬಕ್ರಾವೊನೆ ಕಾಟೊಶಿ; ತೆನೈಸೊ ಬಕ್ರಾವೊನೆ ಚ಼ರಾತಾ ನೈ. 4ಹಾ, ತುಮೆ ದುರ್ಬಲ ರ್ಹಯಲನೆ ಬಲ ಕರ್ಯಾ ನೈ, ರೊಗೊನೆ ಸ್ವಸ್ಥ ಕರ್ಯಾ ನೈ, ತ್ಯುನು ಸು ಬಗೈತುಬಿ ತುಮೆ ಭಾಂದತಾ ನೈ. ನ್ಹಟಾಡಲನೆ ಹಿಂಡಮಾ ಮಳಾಯಾ ನೈ, ಚು಼ಕೈಲಿದಲನೆ ಹುಡಕ್ಯಾ ನೈ, ತೆ ಕ್ಹಾರಾವೊನೆ ಹಿಂಸೆ ಬಲತ್ಕಾರಕ್ಹು ಆಳತಾ ಆಯಾಸ. 5ಕುರುಬರೊ ನೈ ರ್ಹಯಲಕ್ಹು ತೆ ಚದರಿ ಗಯಾ; ದಿಕ್ಕಾಪಾಲ ಥೈನ ರಾನನಾ ಕ್ಹಾರಾ ಕ್ರುರ ಜಾನವರೊನೆ ಅನ್ನ ಥಯಾ; 6ಮಾರಾ ಬಕ್ರಾ ಕ್ಹಾರಾ ಮಲೆನಾಡನೆ ಉಚ್ಚು ರ್ಹಯಲ ಹರಯಕ್ಕ ಡೊಂಗರನಾ ಉಪ್ಪರ ಫರ್xಯಾ; ಹೊ, ಮಾರಾ ಬಕ್ರಾ ಕ್ಹಾರಾ ಭುಮಂಡಲಪರ ಚದರಿ ಗಯಾ; ಕುನ್ನಜ಼ ತ್ಯುನೊನೆ ಕಾಳಜಿ ಕರ್ಯಾ ನೈ. ಗೈನ ಹುಡಕ್ಯಾ ನೈ. 7ಕುರುಬರೊ, ಯಹೊವಾನಿ ವಾತ ಐಕೊ; 8ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಾರಾ ಕ್ಹಮ್ಮ ಮಾರಾ ಬಕ್ರಾ ಚೊ಼ರಿ ಥಯಾ, ರಾನನಾ ಕ್ಹಾರಾ ಜಾನವರೊನೆ ಅನ್ನ ಥಯಾ, ಕುರುಬರೊ ನ್ಹೊತಾತೊ, ಮಾರಾ ಕುರುಬರೊ ಮರಾ ಬಕ್ರಾವೊನೆ ಹುಡುಕ್ಯಾ ನೈತೊ, ತ್ಯುನೆ ಸ್ವಂತ ಪೆಟೊನೆ ದೆಕಿಲಿದ್ಯಾಸ ನೈಸೊ ಮಾರಾ ಬಕ್ರಾವೊನಾ ಪೆಟನೆ ದೆಕ್ಯಾಜ಼ ನೈ. 9ತಿನಾಹುತಿ, ಕುರುಬರೊ ಯಹೊವಾನಿ ವಾತ ಐಕೊ, 10ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಾರಾ ಜ಼ಲಮನಿ ಕ್ಹಮ್ಮ, ಮಿ ಕುರುಬರೊನೆ ವಿರುದ್ದ ಥಯೊಸ; ತ್ಯುನೆ ಮಾರಾ ಬಕ್ರಾವೊನು ಲೆಕ್ಕೊ ಮನೆ ವಪ್ಸು; ಮಾರಾ ಬಕ್ರಾ ಚ಼ರಾವಾನಾ ಕಾಮಕ್ಹು ತ್ಯುನೊನೆ ಕಾಡಿ ಪಡುಸ. ತೆ ಕುರುಬರೊ ಹಬ್ದಾ ಸ್ವಂತ ಪೆಟೊ ಬರಿಲೆತಾ ನೈ; ಮಾರಾ ಬಕ್ರಾ ಅನ್ನ ಥೈನ ತ್ಯುನಾ ಮ್ಹೊಡಾವೊಮಾ ಪಡ್ಯಾ ಬಗರ ತ್ಯುನೊನೆ ವಚಾ಼ಡುಸ.
ಚೊ಼ಕೊ ಕುರುಬುರ್ಯೊ
11ಕರ್ತಾ ಥಯಲ ಯಹೊವಾ ಅಮ್ಮ ಕವಸ, ಮಿಜ಼ ಮಾರಾ ಬಕ್ರಾವೊನೆ ಪಾಚೊ಼ ಲಾಗಿನ ಹುಡಕುಸ. 12ಹಿಂಡನೊ ಕುರುಬ ಸುತ್ತ ಮುತ್ತ ಚದರಿ ಗಯಲ ತಿನಾ ಬಕ್ರಾವೊನೆ ಹುಡಕೆ ನಿಂಗತ ಮಿ ಮಾರಾ ಬಕ್ರಾವೊನೆ ಹುಡಕುಸ; ಕಾರ್ಮುಗಿಲನಾ ದಿನೊಮಾ ಚಲ್ಲಾಪಿಲ್ಲಿ ಥಯಲ ಕ್ಹಾರಾ ಜ಼ಗಾವೊತಾ ತ್ಯುನೊನೆ ಛೊಡೈನ. 13ಜನಾಂಗೊನಾ ವಶತೊ ತಪ್ಸಿನ. ದೆಶ ದೆಶತಾ ಮಳೈನ ಸ್ವಂತ ದೆಶೆ ಆವಾಲಗಾಡಿನ. ಇಸ್ರಾಯೆಲನಾ ಡೊಂಗರೊಮಾಬಿ ತೊರೆನಾ ಬಾಜು಼ಮಾಬಿ ವಕ್ಳಾವೊಕನ, ಕ್ಹಾರಾ ಹಕ್ಕೆಮಾಬಿ ಚ಼ರೌಸ. 14ತ್ಯುನೊನೆ ಚೊ಼ಕೊ ಚಾ಼ರೊ ಚ಼ರೌಸ; ತ್ಯುನು ಹುಲಗಾವಲ ಇಸ್ರಾಯೆಲನಾ ಉಚ್ಚಾ ರ್ಹಯಲ ಡೊಂಗರೊಪರ ರ್ಹವಸ; ತ್ಯಾ ಚೊ಼ಕಾ ಚಾ಼ರಾಮ ಕ್ಹುರವಸ; ಇಸ್ರಾಯೆಲನಾ ಡೊಂಗರೊಮಾ ಕಚ್ಚಾ಼ ಚಾ಼ರಾನೆ ಚ಼ರಸ. 15ಮಿಜ಼ ಮಾರಾ ಬಕ್ರಾವೊನೆ ಚ಼ರೈನ ಅರಾಮ ಕ್ಹುರಯೆ ನಿಂಗತ ಕರುಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. 16ಚು಼ಕೈ ಲಿನ ಗಯಲನೆ ಹುಡಕುಸ, ನ್ಹಟಾಡಲ ಹಿಂಡಮಾ ಮಳೌಸ, ದುರ್ಬಲ ಥಯಲನೆ ತಾಕತವರ ಕರುಸ, ತುಟಲ ಅಂಗನೆ ಭಾಂದುಸ; ಬಲತಲ ಕೊಬ್ಬಲ ಬಕ್ರಾವೊನೆ ನಾಶ ಕರುಸ; ತ್ಯುನೊನೆ ನ್ಯಾಯ ದಂಡನೆ ಕವಾನಾ ಚಾ಼ರಾನೆ ಕ್ಹಲೌಸ.
17ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಮಾರಿ ಹಿಂಡ, ದೆಕೊ, ಮಿ ತುಮಾರಾಮಾನಾ ಬಕ್ರಾ ಬಕ್ರಿಯೊನೆ ಟಗರೊ ಮಧ್ಯವರ್ತಿ ಥೈನ ನ್ಯಾಯ ತಿರಿಸುಸ. 18ಟಗರೊ ಬಕ್ರಾ, ಚೊ಼ಕಾ ಚಾ಼ರಾನೆ ತುಮೆ ಚಾ಼ವಾನು ಛೊಡಿನ ಬಿಜಾ಼ ಚಾ಼ರಾನೆ ಕ್ಹುಂದಿನ ಪಗ್ಗನಿ ಕಸಾ ಕರಲ ನ್ಹಾನು ಕಾಮ ವ್ಹೈ ಸು? ಚೊ಼ಕು ಪಾನಿನೆ ಪಿನ ಉಗ್ರಲನೆ ಪಗ್ಗಕ್ಹು ಬಾಜು಼ ಕರಿನ ನ್ಹಾನು ಕಾಮ ವ್ಹೈಸು? 19ತುಮೆ ಕ್ಹುಂದಿನ ಪಗ್ಗನಿ ಕಸಾ ಕರಲ ಮಾರಾ ಬಕ್ರಾ ಚ಼ರುಲಾಗ್ಯು; ತುಮೆ ಪಗ್ಗಕ್ಹು ಕಲೈನ ಬಾಜು಼ ಕರಲನೆ ತ್ಯುನೆ ಪಿವ ಲಾಗ್ಯು. 20ಇಮ್ಮ ರ್ಹವಾಕ್ಹು ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ದೆಕೊ, ಮಿಜ಼ ಕೊಬ್ಬಲ ಟಗರೊ ಹೊತನೆಬಿ ಗರಿಬ ಬಕ್ರಾವೊನೆ ಮೆಕೆನೆಬಿ ನ್ಯಾಯ ತಿರಿಸುಸ. 21ಟಗರೊ ಬಕ್ರಿಯೊ, ತುಮೆ ಬಕ್ರಾ ಮೆಕೆಯೊನೆ ಪಕ್ಕಿಕ್ಹುಬಿ ಕ್ಹಾಂದಾಕ್ಹುಬಿ ಢಕಲ್ತಾ ದುರ್ಬಲ ಥಯಲನೆ ಶಿಂಗ್ಡಾವೊಕ್ಹು ಗುದ್ದತು ಮಾರಾ ಹಿಂಡನೆ ಚದರಸಿನ ಛೊಡ್ಯಾ; 22ತಿನಾಹುತಿ ಮಾರಿ ಹಿಂಡ ಹಬ್ದಾ ಕೆಳಾಮಾಜ಼಼ ಚೊ಼ರಿ ಥಯಾವಾಚಿ ಮಿ ತಿನೆ ರಕ್ಷಾ ಕರಿನ ಬಕ್ರಾ ಮೆಕೆನೆಬಿ ನ್ಯಾಯ ತಿರಸುಸ.
23ಮಾರಿ ಹಿಂಡನೆ ಕೈದಾನೆ ಯಕ್ಕಜ಼ ಕುರುಬನೆ ತಯ್ಯಾರ ಕರುಸ; ಮಾರೊ ಸೆವಕ ಥಯಲ ದಾವಿದ ಕವಾನೊ ತೆ ಕುರುನ ತಿನೆ ಚ಼ರಾವಸ; ಹೊ, ತಿನೊ ಕುರುಬ ಥೈನ ತಿನೆ ಚ಼ರಾತೊ ಆವಸ. 24ಯಹೊವಾ ಥಯಲ ಮಿ ಮಾರಾ ಮನಕ್ಹೊನೊ ಕ್ಹುದಾ ಥೈನ ರ್ಹೌಸ; ಮಾರೊ ಸೆವಕ ಥಯಲ ದಾವಿದ ತ್ಯುನೊನೆ ಆಳಾಲೊ ಪ್ರಭು ಥೈನ ರ್ಹವಸ; ಯಹೊವಾ ಥಯಲ ಮಿಜ಼ ಎ ಕದ್ಯೊಸ. 25ಮಿ ತ್ಯುನಾ ಕ್ಹಾತೆ ಸಮಾಧಾನನು ಒಡಂಬಡಿಕೆ ಕರಿ ಲ್ಯುಸ; ದುಷ್ಟ ಜಾನವರೊ ದೆಶಮಾ ಹಬ್ದಾ ನೈ ರ್ಹಯಲ ನಿಂಗತ ಕರುಸ; ಮಾರಾ ಮನಕ್ಹೊ ರಾನಮಾ ಭೆಂವಾಚಿ ರ್ಹವಸ, ಜಂಗಲಮಾ ಅರಾಮ ನಿಂದರ ಕರಸ. 26ಮಿ ತ್ಯುನೊನೆ ಮಾರಾ ಡೊಂಗರನಾ ಸುತ್ತೆ ರ್ಹಯಲ ಜ಼ಗಾವೊನೆ ಆಶಿರ್ವಾದ ಕರಿನ ಕ್ಹುಷಿ ಕರೌಸ; ಕರೆಟ್ಟ ಟೈಮೆ ಪಾನಿ ಆವಾ ಲಗಾಡುಸ; ಶುಭದಾಯಕ ಆಶಿರ್ವಾದನು ಪಾನಿ. 27ಕ್ಹೆತರನಾ ಝಾಡೊ ಫಲ ಛೊಡಸ; ಕ್ಹೆತರೊ ಚೊ಼ಕಾ ಬೆಳೆ ದಿವಸ; ಮನಕ್ಹು ಸ್ವದೆಶಮಾ ನೆಮ್ಮದಿಕ್ಹು ರ್ಹವಸ; ತ್ಯುನಾ ಉಪ್ಪರ ಘಾಲಲ ನೊಗನಾ ಗುಟೊನೆ ಮಿ ತೊಡಿನ ತ್ಯುನೊನೆ ಅಡಿಯಾಳ ಥೈನ ಕರಿ ಲಿದಲ ಅಧಿನತೊ ಛೊಡಾಯಲಪರ ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ದೃಡ ಥಾವಸ. 28ತೆ ದಿನ್ನತೊ ತ್ಯುನೊನೆ ಬಿಜಾ಼ ಮನಕ್ಹೊ ಸುರೆ ನೈ ಕರ ಸಕ್ತಾ, ಜಂಗಲನಾ ಜಾನವರೊ ನೈ ಕ್ಹಾ ಸಕ್ತಾ; ತ್ಯುನೆ ಕಿನೆಜ಼ ಭುಚ಼ಕ್ಯಾ ವಾಚಿ ನೆಮ್ಮದಿ ಥೈನ ರ್ಹವಸ. 29ಮಿ ತ್ಯುನಾಹುತಿ ಪ್ರಸಿದ್ದ ಫಲನಾ ಝಾಡೊ ಬೆಳಸುಸ, ಬರಗಾಲ ತ್ಯುನಾ ದೆಶನೆ ಹಬ್ದಾ ಹಾಳ ನೈ ಕರ್ತು, ತ್ಯುನೆ ಬಿಜಾ಼ ಮನಕ್ಹೊನಾ ತಿರಸ್ಕಾರನೆ ಗುರಿ ನೈ ಥಾತಾ. 30ತೆಳಾಮಾ ತ್ಯುನೆ ತ್ಯುನೊ ಕ್ಹುದಾ ಥಯಲ ಯಹೊವಾ ಕವಾನಾ ಮನೆ ತ್ಯುನಾ ಕ್ಹಾತೆ ಛೆ ಕೈನಬಿ ಇಸ್ರಾಯೆಲ ವಂಶವಾಲಾ ಥಯಲ ತ್ಯುನೆ ಮಾರಾ ಮನಕ್ಹೊ ಥಯಾಸ ಕೈನಬಿ ಗ್ವತ್ತ ಕರಿಲಿವಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. 31ತುಮೆ ಮಾರಾ ಬಕ್ರಾ ವ್ಹೈ, ಮಾರಾ ಕಾವಲನಾ ಬಕ್ರಾ ವ್ಹೈ; ನರ ಜಾನವರೊ ಥಯಲ ತುಮೊನೆ ಮಿ ಕ್ಹುದಾ ವ್ಹೈ ಕೈನ ಕರ್ತಾ ಥಯಲ ಯಹೊವಾ ಕವಸ.
