Select a Verse
ಪುರ್ವದ್ವಾರನು ಉಪಯೊಗ
1ಪಾಚ಼ಲ್ತೊ ತೆ ಮನಕ್ಹ ಮನೆ ಪವಿತ್ರಾಲಯನಾ ಪುರ್ವ ಭಾರಲ್ಯಾ ಹೆಬ್ಬಾಗಿಲೆ ವರಿ ಬಲೈಲಿನ ಆಯೊ; ತೆ ಜ಼ಕೈಯು. 2ತೆಳಾಮಾ ಯಹೊವಾ ಮನೆ- ಎ ಬಾಕಲ ಝಾಕ್ಯಲ ರ್ಹೌ, ಅನೆ ಕಾಡು ನೈ. ಇನಾಕ್ಹು ಕುನ್ನಜ಼ ಮ್ಹೈ ಜಾ಼ವಾನು ನಕೊ; ಇಸ್ರಾಯೆಲನೊ ಕ್ಹುದಾ ಥಯಲ ಯಹೊವಾ ಅಕ್ಹು ಮ್ಹೈ ಗಯೊಸ್ತೊ; ತೆ ಝಕೈನಜ಼ ರ್ಹೌ. 3ಪ್ರಭುವೊ ಯಹೊವಾನಿ ಸನ್ನಿದಿಮಾ ಹವಿರ್ಬೊಜನ ಕಾರಾನೆ ನ್ಹ್ಯಾ ಪ್ರಭು ಥೈನ ಬೈಟ ಸಕಸ; ತೆ ಹೆಬ್ಬಾಗಿಲ ಕೈಸಾಲೆನಾ ವಾಟನೆ ಮಳಿನ ತೆಜ಼ ವಾಟೆ ಜೌ಼ ಕೈನ ಕದ್ಯೊ.
ಲೆವಿಯೊನು ಕರ್ತವ್ಯ
4ಪಾಚ಼ಲ್ತೊ ತೆ ಮನಕ್ಹ ಉತ್ತರ ದಿಕ್ಕ ಹೆಬ್ಬಾಗಿಲನಾ ವಾಟತೊ ಮನೆ ದೆವಸ್ಥಾನನಾ ಕ್ಹಾಮೊ ಲಾಯೊ; ಆಹಾ, ಮಿ ದೆಕ್ತಾಮಾ ಯಹೊವಾನು ತೆಜಸ್ಸ ಯಹೊವಾನಿ ಆಲಯನೆ ಭರಿಗಯುತು; ತಿನೆ ದೆಕಿನ ಅಡ್ಡ ಪಡ್ಯೊ. 5ತೆಳಾಮಾ ಯಹೊವಾ ಮನೆ ಅಮ್ಮ ಕದ್ಯೊ- ನರನಾ ದಿಕ್ರಾ, ಯಹೊವಾನಿ ಆಲಯ ಕ್ಹಾರಾ ನಿಯಮನಿಷ್ಟೆನಾ ವಿಷಯನಾಹುತಿ ಮಿ ತುನೆ ಕವಾನು ಕ್ಹಾರು ತು ಕಾನೆ ಐಕಿನ ಡೊಳೆ ದೆಕಿನ ಮನದಟ್ಟ ಕರಿಲೆ; ವರಿ ಪವಿತ್ರಾಲಯನಾ ಗಮನಾಗಮನ ವಿಧಿಯೊನೆ ಧ್ಯಾನ ದೆ. 6ಎನೈಸೊ ತು ತೆ ದ್ರೊಹಿಯೊನೆ ಕದ್ಯಾಮ ಇಸ್ರಾಯೆಲ ವಂಶವಾಲಾವೊನೆ ಇಮ್ಮ ಕೆ, ಕರ್ತಾ ಥೈಲ ಯಹೊವಾ ಅಮ್ಮ ಕವಸ. 7ಇಸ್ರಾಯೆಲ ವಂಶವಾಲಾ, ತುಮೆ ಮಾರು ಅನ್ನ ರ್ಹಯಲ ರಗತ ಅರ್ಪಿಸ್ತಾಮಾ ತನಮನಮಾ ಸುನ್ನತಿ ನೈಸೊವಾಲಾ ಥಯಲ ಮ್ಲೆಚ್ಛರನೆ ಮಾರಿ ಪವಿತ್ರ ಆಯಲಮಾ ಬಲೈ ಲೈನ ಮಾರಿ ಮಂದಿರನೆ ಗಲಿಜ಼ ಕರಿನ ಮಾರಿ ಒಡಂಬಡಿಕೆನೆ ಭಂಗ ಕರಿನ ತುಮಾರಾ ಘನ್ನಾ ದುರಾಚಾರೊನಾ ಹಿಸಾಬ ಲಗಾಡ್ಯಾಸ; 8ತುಮೆ ಮಾರಾ ಪರಿಶುದ್ದ ಸಾಮನೊನೆ ಕೈದ್ಯಾನೈ ಕರ್xಯಾ ನೈ; ಎ ಮ್ಲೆಚ್ಛರ ಮಾರಿ ಪವಿತ್ರಾಲಯಮಾ ಮಾರಾ ಸಾಮನೊನಾ ಉಪ್ಪರ ಪಾರುಪತ್ಯ ಕರಾಲಾ ಥೈನ ನೆಮಿಸಿ ಲಿದ್ಯಾಸ; ತುಮಾರಾ ಘನ್ನಾ ದುರಾಚಾರೊ ಹಬ್ದಾ ಬಸ್ಸ. 9ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಇಸ್ರಾಯೆಲೊಮಾ ಮಳಲ ಮ್ಲೆಚ್ಛರಮಾ ತನಮನಮಾ ಸುನ್ನತಿ ಹಿನ ಥಯಲ ಕುನ್ನಬಿ ಮಾರಿ ಪವಿತ್ರಾಲಯನೆ ಪ್ರವೆಶ ಕರು ನೈ'
ಲೆವೆಯೊನೆ ಯಜೊಕೊನಾ ಕಾಮೊಕ್ಹು ಛೊಡಾಯಲ
10ಇಸ್ರಾಯೆಲೊ ಮನೆ ಛೊಡ್ಯಲಪರ ಮಾರಾಕ್ಹು ರ್ಹವಾದೆ ತ್ಯುನಾ ಗೊಂಬಿಯೊಕನ ಫರಿನ ಮನೆ ದುರ ಥೈನ ಗಯಲ ಲೆವಿಯೊ ತ್ಯುನಾ ದೊಷನು ಫಲ ಅನುಬವಿಸಸ. 11ತ್ಯುನೆ ಮಾರಿ ಪವಿತ್ರಾಲಯಮಾ ಪರಿಚಾರಕೊ ಮಂದಿರ ದ್ವಾರ ಪಾಲಕೊ ಥೈನ ಮಂದಿರಮಾ ಸೆವೆ ಕರು; ಮನಕ್ಹೊನಾ ಪಕ್ಷ ಥೈನ ಸರ್ವಾಂಗಹೊಮ ಜಾನವರನೆ ಸಮಾಧಾನ ಯಜ್ಞ ಜಾನವರನೆ ಕತ್ರಿನ ತ್ಯುನೊನೆ ಸೆವೆ ಕರಾನೆ ಸಿದ್ದ ಥೈನ ರ್ಹೌ. 12ತ್ಯುನೆ ಮೊರ್ತಿಯೊನಾ ಕ್ಹಾಮಾ ಮನಕ್ಹೊನಾಹುತಿ ಸೆವೆ ಕರಿನ ಇಸ್ರಾಯೆಲ ವಂಶವಾಲಾವೊನೆ ಪಾಪಕಾರಿ ವಿಘ್ನ ಥಯಲಕ್ಹು ಮಿ ತ್ಯುನಾ ಉಪ್ಪರ ಹತ್ತ ಉಚಾ಼ಯೊಸ, ತ್ಯುನೆ ತ್ಯುನಾ ದೊಷನು ಫಲ ಅನುಭವಿಸಿನಜ಼ ರ್ಹೌ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. 13ತ್ಯುನೆ ಮನೆ ಯಾಜಕ ಸೆವೆ ಕರಾನೆ ಮಾರಾ ಸನ್ನಿದಿನೆ ಔನೈ; ಮಾರಿ ಅತಿಪವಿತ್ರ ಥಯಲ ಪರಶುದ್ದ ಸಾಮನೊಮಾ ಕಿನಾಜ಼ ನಜಿಕ ಜೌ಼ನೈ; ತ್ಯುನೊನೆ ಥಯಲ ಅವಮಾನನೆ ತ್ಯುನೆ ಕರಲ ದುರಾಚಾರನಾ ಫಲ ಅನುಭವಿಸಸ. 14ದೆವಾಲಯನಾ ಕ್ಹಾರಾ ಸೆವೆಮಾಬಿ ತ್ಯಾ ಥಾವಾನಾ ಕ್ಹಾರಾ ಕಾಮೊಮಾಬಿ ಸೆವಕನು ಕಾಮಜ಼ ತ್ಯುನೊನೆ ದ್ಯುಸ.
ಯಾಜಕೊ
15ತೆನೈಸೊ ಇಸ್ರಾಯೆಲೊ ಮನೆ ಛೊಡ್ಯಲ್ಪರ ಲೆವಿಯೊ ಚಾದೊಕನಾ ಸಂತಾನವಾಲಾ ಥಯಲ ಯಾಜಕೊ ಮಾರಿ ಪವಿತ್ರಾಲಯನಾ ಪಾರುಪತ್ಯನೆ ನೆರವೆರಿಸಲಕ್ಹು ತ್ಯುನೆ ಮನೆ ಸೆವಿಸಾನೆ ಮಾರಿ ಸನ್ನಿದಿನೆ ಆವಸ, ಮನೆ ರಗತ ವರಿ ಚರ್ಬಿ ಅರ್ಪಿಸ್ತಾಮಾ ಮಾರಾ ಸಮ್ಮುಖಮಾ ಹುಬ್ರ್ಯವಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. 16ತ್ಯುನೆ ಮಾರಿ ಪವಿತ್ರಾಲಯನೆ ಪ್ರವೆಶ ಕರಿನ ಮಾರಿ ಸೆವೆ ಕರಾನೆ ಮಾರಿ ವೆದಿನೆ ನಜಿಕ ಗೈನ ಮಾರಿ ಆಲಯನಾ ದೆಕ್ರಾಣಕಿ ವಹಿಸಸ. 17ತ್ಯುನೆ ಮ್ಹೈನಾ ಪ್ರಾಕಾರನಾ ಬಾಕಲೊಮಾಬಿ ದೆವಸ್ಥಾನಮಾಬಿ ಸೆವೆ ಕರ್ತಾಮಾ ಕಯುಜ಼ ಉಣ್ಣೆನಾ ವಣ್ಣಾ ತ್ಯುನಾ ಉಪ್ಪರ ರ್ಹೌನೈ. 18ಇವ್ನೆ ಮಾತಾನೆ ಕಿಮ್ಮತನೊ ಫಟ್ಕೊ, ಕಂಬರನೆ ನಾರಿನ ವಣ್ಣಾ ಘಾಲಿಲಿನ ರ್ಹವಾದೆ; ಘಾಮ ಆವಾನು ಕಯಾಜ಼ ವಣ್ಣಾ ಘಾಲ್ಯು ನೈ. 19ತ್ಯುನೆ ಭಾರಲ್ಯಾ ಪ್ರಾಕಾರನೆ ಕದ್ಯಾಮ ತ್ಯಾನಾ ಮನಕ್ಹೊಕನ ಜಾ಼ತಾಮಾ ತ್ಯುನಾ ದಿಕ್ಷಾನಾ ವಣ್ಣಾ ತ್ಯುನೊನೆ ತಗಲಿಸಿನ ತ್ಯುನೊನೆ ಪರಿಶುದ್ದ ನೈ ಥಯೆ ನಿಂಗತ ತಿನೆ ಕಾಡಿನ ಪರಿಶುದ್ದ ರ್ಹಯಲ ಕ್ಹೊಲಿಯೊಮಾ ಮ್ಹೆಲಿನ ಬಿಜಾ಼ ವಣ್ಣಾ ಘಾಲಿ ಲಿವಾದೆ. 20ತ್ಯುನೆ ಮಾತು ಬೊಳ್ಸಿಲ್ಯುನೈ, ಬಾಲೊ ಘನ್ನಾ ಬೆಳಸು ನೈ, ಕಟೈಲಿಲ ರ್ಹೌಬಿ ನೈ. 21ಮ್ಹೈನಾ ಪ್ರಾಕಾರನೆ ಪ್ರವೆಶ ಕರ್ತಾಮಾ ಕಯೊ ಯಾಜಕ ಕಡಕ ದ್ರಾಕ್ಷಾ ರಕ್ಹನೆ ಪಿದ್ಯಲ ರ್ಹೌನೈ. 22ಯಾಜಕೊ ವಿಧವೆನೆ ರ್ಹವಾದೆ ಮಾಟಿ ಛೊಡಲವಾಲಿನೆ ರ್ಹವಾದೆ ಹಿವಾ ಕರಿಲ್ಯು ನೈ; ತೆನೈಸೊ ಇಸ್ರಾಯೆಲ ವಂಶನಾ ಛೊಕ್ರಿಯೊನೆ ರ್ಹವಾದೆ ಯಾಜಕನಿ ವಿಧವೆನೆ ರ್ಹವಾದೆ ಹಿವಾ ಕರಿಲಿವಾದೆ. 23ಮಿಸಲ ರ್ಹಯಲನೆಬಿ ಮಿಸಲ ನೈ ರ್ಹಯಲನೆಬಿ ಭೆದ ಮಾರಾ ಮನಕ್ಹೊನೆ ದೆಕಾಡಿನ ಶುದ್ದಾಶುದ್ದ ವಿವೆಚನೆ ತ್ಯುನೊನೆ ಬೊದನೆ ಕರಾದೆ. 24ವ್ಯಾಜ್ಯ ಥಾವಾನಿ ಜ಼ಗಾ ತಿನೆ ತಿರಿಸಾನೆ ಹುಬ್ರೈನ ಮಾರಾ ನ್ಯಾಯವಿಧಿಯೊನೆ ಅನುಸಾರ ಥೈನ ತಿರಿಸಾದೆ; ಮಿ ಕರಲ ಸನ್ನೊಮಾ ಮಾರಾ ನಿಯಮನಿಷ್ಟೆನೆ ಕೈದಿಲಿನ ಮಾರಾ ಸಬ್ಬತ್ತ ಆಚರಣೆ ಕರೆ ನಿಂಗತ ದೆಕಿಲಿವಾದೆ. 25ಮರಲವಾಲಾವೊನಾ ಮುರ್ದಾವೊನಾ ನಜಿಕ ಗೈನ ತ್ಯುನೊನೆ ಅಪವಿತ್ರ ಕರಿಲ್ಯು ನೈ; ತೆನೈಸೊ ಮರಲ ಮಾ, ಬಾಪ, ದಿಕ್ರೊ, ದಿಕ್ರಿ, ಭೈ, ಹಿವಾ ನೈಸೊ ಭೆನ, ಇವ್ನಾಹುತಿ ಯಕ್ಲೊ ತಿನೆ ಅಪವಿತ್ರ ಕರಿಲ್ಯುನೈ; 26ತ್ಯವಾನೆ ಶುದ್ದ ಥಯಲ್ಪರಬಿ ಕ್ಹಾತ ದನ್ನ ಬಿಜಾ಼ ಕರು. 27ತೆ ಸೆವೆ ಕರಾನೆ ಪವಿತ್ರಾಲಯನೆ ಪ್ರವೆಶ ಕರಿನ ಮ್ಹೈನಾ ಪ್ರಾಕಾನ ಜಾ಼ವಾನಾ ದಿನ್ನಮಾ ತಿನಾ ದೊಷಪರಿಹಾರನಾಹುತಿ ಬಲಿ ಅರ್ಪಿಸು; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. 28ಯಾಜಕೊನೆ ಯಕ್ಕ ಸ್ವಸ್ತ್ಯ ಥಾವಸ; ಮಿಜ಼ ತ್ಯುನೊ ಸ್ವಸ್ತ್ಯ ವ್ಹೈ; ಇಸ್ರಾಯೆಲಮಾ ತ್ಯುನೊನೆ ಕಯಿಜ಼ ಆಸ್ತಿ ದ್ಯುನೈ; ಮಿಜ಼ ತ್ಯುನೊನೆ ಆಸ್ತಿ ವ್ಹೈ. 29ತ್ಯುನೆ ಧಾನ್ಯ ನೈವೆದ್ಯನೆ ದೊಷಪರಿಹಾರಕಯಜ್ಞದ್ರವ್ಯನೆ, ಪ್ರಾಯಶ್ಚಿತ್ತಯಜ್ಞದ್ರವ್ಯನೆ, ಅನುಭವಿಸಾದೆ; ಕ್ಹಾಲಿ ಯಹೊವಾನುಜ಼ ರ್ಹವಾದೆ ಕೈನ ಇಸ್ರಾಯೆಲೊ ಹರಕಿ ಕರಿಲಿವಾನು ಕ್ಹಾರು ತ್ಯುನೊನೆ ಸಲ್ಲು. 30ಕ್ಹಾರಾ ಪ್ರಥಮಫಲೊಮಾ ಉತ್ಕ್ರಷ್ಟ ಥಯಲ ತುಮೆ ಮನೆ ಪ್ರತ್ಯೆಕ ಕರಿನ ಸಮರ್ಪಿಸಾನಾ ಕ್ಹಾರಾ ಪದಾರ್ಥೊ ತ್ಯುನೊನೆ ಥೌ; ತುಮಾರು ಘರ ಆಶಿರ್ವಾದನೆ ನೆಲೆ ಥಯೆ ನಿಂಗತ ತುಮೆ ಪಸ್ಟಲ್ಯಾ ಲೊಟನೆ ಯಾಜಕೊನೆ ದ್ಯು. 31ಯಾಜಕೊ ತ್ಯುನೆ ಥೈನ ಮರಿನ ತೆನೈಸೊ ಕಾಡಮೃಗಕ್ಹು ಮರಲ ಪಕ್ಷಿನೆ ರ್ಹವಾದೆ ಜಾನವರನೆ ರ್ಹವಾದೆ ಕ್ಹೌನೈ.
