Select a Verse
Ẹjaakhi ch'ẹnaanga cha Jẹrusalẹm
1Mada Hezekiya ọbhaang ẹkkaabha nda, ọbọkha ọbọra f'ọfor ọjaakhi, ọn-ọfọra abara-bina, obina ochina k'ọhọhm kw'Ọvaar Ibinọkpaabyi. 2Ọtzọhm adenho p'ade Eliyakim kw'ode ọphaar-idik s'ẹvaar-ttọhmma, ọmaana Shebna kw'ode ọkkẹri, ọmaana ọfọhnẹja kw'otzim bẹ eden. Wa bẹ afọra abara-bina atzima achina k'Isaya kw'ode ọsẹjaakhi kw'ode nnwa kw'Amọs. 3Bẹ agbaakh-ẹ bi, “Ma wọ ode odik kwa Hezekiya ọgbaakhi bi: Mayina wọ ode ewu ch'ọmmamma ọmaana oponga-pyibha ttara ọgbasadik, macha kwanọng kw'ọmaan osi, ẹfa kẹ k'ede ch'otzim ọmaan. 4Asi mẹ, Ọvaar Ibinọkpaabyi kw'ode Ibinọkpaabyi kwọ, ọ́bhaanga atzim ọbhaanga p'odenho kw'arim-egbong p'egbong-dam p'itta kwẹ kw'ode ọvaarnọng kw'Asiriya ọkk'ọtzọhma bi, bẹ atzima alukhi Ibinọkpaabyi kw'orukhi akpen. Kẹ ọ́nang-ẹ ettuma ọnang k'atzim pẹ p'Ọvaar Ibinọkpaabyi kw'ode Ibinọkpaabyi kwọ, ọkk'ọbhaanga. Kọ zi njọhm anang ayok p'atzim am-aruk akpen.”
5Mada akhaan-nọng pa Hezekiya kw'ode ọvaarnọng akwu akhebha Isaya, 6Isaya oben bẹ bi, “Bọng gbaak itta kwabọng bi, ‘Ọvaar Ibinọkpaabyi obeni bi: Oningi bọng ojor k'idik sabọng abhaang, kw'ode atzim p'akhaannọng p'ọvaarnọng kw'Asiriya, atzim alulukh-m. 7Kker e! Mada ọbhaanga ẹkkaabha nda, kaam nsẹ-ẹ osi ochibhi bi, ọkpa nnam k'ẹkhọma chẹ, mẹ kwa kaam ngebh-ẹ ndima ọkkangkkaang mfhẹ-ẹ.’ ”
8Mada oho kw'arim-egbong p'egbong-dam ọbhaang bi, ọvaarnọng kw'Asiriya okk'obina ka Lakish, otza orima anọng pa Libna abẹ, ofona okhebh-ẹ kẹ.
9Iwa Senakerib ọbhaanga ẹkkaabha bi, Tirhaka, kw'ode ọvaarnọng kwa Kush, okk'for ọda s'orimẹ-ẹ abẹ. Mẹ wọ ofon, wa obiro ọtzọhm akkaabh-nkkaabha bi, bẹ atza agbaak Hezekiya bi: 10“Bọng gbaak Hezekiya kw'ode ọvaarnọng kwa Juda bi: Kọ kakhera bi, ọkha f'aphe nnam ọbọr-ọ, k'ogbe kw'oben bi, ‘Ọvaarnọng kw'Asiriya Jẹrusalẹm kokhema.’ 11K'odik-ọkka kọ akk'idik abhaanga s'ọvaarnọng kw'Asiriya okk'idibhon biphyir ọsa, okk'sẹ odimi biphyir-phyir. Kọ achibhi bi, kọ wọ afha anaanga o? 12Wa ikha sa Gozan, ọmaana Haran, ọmaana Rezeph ttara s'anọng p'Eden p'iwa arukhi ka Tẹl-Asar, p'ade idibhon s'avaarnọng p'achi-m eden adabh idimi, ikk'bẹ ifha ikkaana o? 13Ọvaarnọng kwa Hamat ttara kw'Arpad ko o? Avaarnọng p'idedenmon sa Lair, ọmaana Sepharvayim, ọmaana Hena, ttara Ava ko o?”
Njọhm sa Hezekiya
14Iwa Hezekiya ọtzọkha ẹkkaabha ch'akkaabh-nkaabha achen-ẹ, oyeri. Mẹ wọ ofon, wa obina ochina k'ọhọhm kw'Ọvaar Ibinọkpaabyi, otzini ẹkkaabha nda oji chẹ m'itzitzikha s'Ọvaar Ibinọkpaabyi. 15Wa Hezekiya ozi njọhm ọnang Ọvaar Ibinọkpaabyi, oben bi: “O Ọvaar Ibinọkpaabyi, kw'ode Ibinọkpaabyi kw'Israẹl, kw'owobh k'ottem kw'achẹrubim, kọ-kọ wọ ade Ibinọkpaabyi kw'idibhon s'ọyagbin biphyir. Kọ wọ iwa asi ẹrọng ọmaana irerek. 16Yonga itzọhng abhaanga, o Ọvaar Ibinọkpaabyi; abira agwonga chen pọ are, o Ọvaar Ibinọkpaabyi; ayonga itzọhng abhaanga atzim pa Senakerib ọgbaakhi otzima olukhi Ibinọkpaabyi kw'orukhi akpen.
17“O Ọvaar Ibinọkpaabyi, kwẹ ode odik-ọkka bi, avaarnọng p'Asiriya akk'idibhon nna abọkha adimi biphyir, bẹ abira akhibhi ngọma sabẹ. 18Bẹ akk'ikha sabẹ atzọkha akwọmi k'ekpon, bẹ abira adimi sẹ. Da iwa pyẹ eni ikha ede, pyẹ ekhingẹ ede nchi ttara atza, py'anọngẹya atzim mbọhk agwa. 19O Ọvaar Ibinọkpaabyi, kw'ode Ibinọkpaabyi kwaman, kkaana arọbha man ka mbọhk sẹ, ifha idibhon s'ọyagbin biphyir ironga bi, kọ Ọvaar Ibinọkpaabyi, kọ-kọ wọ ade Ibinọkpaabyi.”
Isaya osi ẹjaakhi ch'ottotto kwa Senakerib
20Mẹ wọ ofon, wa Isaya kw'ode nnwa kw'Amọs ọtzọhm ẹkkaabha ochena Hezekiya, oben bi, “Ọvaar Ibinọkpaabyi, kw'ode Ibinọkpaabyi kw'Israẹl obeni bi: Kaam nkk'njọhm sọ mmaanga, s'ikhuri Senakerib kw'ode ọvaarnọng kw'Asiriya. 21Ma wọ ode atzim p'Ọvaar Ibinọkpaabyi ọgbaakhi, ọttaanga ọnang-ẹ bi:
“ ‘Odedenmon kwa Jẹrusalẹm kw'ode mach'ominanwa kw'on-ojinọng otzim oronga kwa Ziyọn,
ọkpa nnam ọbọr-ọ, obiro ọmmọ-ọ aha.
Jẹrusalẹm kw'ode mach'ominanwa,
oringi eho chẹ, mada arọbhi.
22Anyi wọ kwa kọ am-alukhi abira akhibhi che o?
Anyi wọ kwa kọ am-anyaana abẹ,
am-abira age for anang o?
Kaam nwuma kwa nwur-owur kw'Israẹl wọ e!
23Kọ akk'k'akhaan-nọng pọ arenga alukhi Ọvaar Ibinọkpaabyi.
Akk'abira abena bi,
“Kaam nkk'akpaar paam pa nnyanyaang mmindọr k'ọhaabh,
ndima mvura mgbegbeho,
mgbegbeho sa ngori ọtzam ka Lebanọn.
Nkk'abhọmi-mancheni p'agori ọtzam mkpaara mmari,
ọmaana nchi sa siprẹs sa njibhi ọtzam.
Kaam nkk'k'obe f'obhir-obhir mpyiri,
k'ọtzam-bina kw'ojibhi ọtzam.
24Kaam nkk'nsipe nnduma ka ngọma s'akhekhennọng
mbiri ngwo asi p'afon mẹ,
nkk'mmokpatzọkhi saam,
ndima nsi ngekha s'Ijip biphyir nkka.”
25“ ‘Kọ atzima abhaanga?
Bi tzọni kẹ, kaam wọ nsi bi kwẹ ode mando,
bi tzọni kẹ, kaam wọ nsi mphaari nna.
Ma kaam nkk'nna nsa bi, kwẹ ọkhaama ẹjaakhi,
bi akk'idedenmon s'ikhaam abaakha,
atzọkha abhakhi atza-khung.
26Anọng pabẹ pa bẹ akk'ẹfa ana,
an-arukhi k'ojora, ọmaana ka mgbar.
Bẹ an-ade mach'araraari p'owoni,
mach'ekpo py'ẹrami ọmemen,
mach'araraari p'ameni k'ittakhọhnga,
p'ekpikhira ẹmaani yina bẹ an-ameni.
27“ ‘Yina, kaam nnong ibe sa bọng awobh kẹ,
nnonga ogbe kwa bọng ayini k'iyaan ọmaana ogbe kwa bọng akpa nnam,
nnonga odem kw'ettem epyibhi bọng etzima etzor-m.
28Da ettem epyibhi bọng etzima etzor-m,
ọmaana da nkk'odik okhuri for ogege mmaanga,
kaam ńge bọng oger kwaam ka hung,
ḿbiri ḿgbak bọng ọgbọkhọrọ kwaam k'ẹmma,
kaam ḿbiri ńsi bọng árenga,
m'eden nduma cha bọng areng akwu.’
29“Ma wọ óde ẹkhọhkha ọnang kọ Hezekiya:
“Kọ áchi ekpo py'ẹbhọkh-ọbhọk, ma cho nwa,
ka cho kw'ottong afa, ábira áchi ekpo py'efon mẹ.
Yina, ka cho kw'ottong attaan, kọ yaabha abira apha,
ayaabha iwoni s'agrep abira achi achiduk pabẹ.
30Anọng p'ẹkhọma cha Juda p'anaanga,
ákhaama ojibhada macha nchi sa nttim aranga k'irek ẹtzaanga, nwọm achiduk.
31Da Jẹrusalẹm ọ́khaama ọnọng wani kw'orik,
Egbegbeho cha Ziyọn ebire ẹkhaama anọng p'ánaanga.
“Da Ọvaar Ibinọkpaabyi okk'ochibhi ọsa bi, kwẹ ode mando.
32“Ma wọ ode odik kw'Ọvaar Ibinọkpaabyi ọgbaakhi, okhuri ọvaarnọng kw'Asiriya bi:
“ ‘Kẹ m'odedenmon nwa kódim,
oyuk mẹ kóbiro ọtta.
Kẹ ọkhọhnkpa kotzima oyin odedenmon nwa abẹ,
igbo kóbiro ọ́yaabha ọkpẹ-ẹ ọmaana kẹ.
33M'eden nduma ch'oreng okwu, chẹ dọ ch'órenga ọkpa nnam,
kẹ m'odedenmon nwa kódim,
mach'Ọvaar Ibinọkpaabyi osi ẹjaakhi.
34Kaam mbaabha odedenmon nwa, mbiri nkkaan-ẹ,
okhuri che chaam, ọmaana che cha Devid, kw'ode ọtzọhmnọng kwaam.’ ”
35M'erungi nduma, orenga-eden kw'Ọvaar Ibinọkpaabyi ofona ọtza ofhu, anọng nnọhna ẹnọhna obhiri arọbh attaan obhiri attaan, k'ibhingabe s'anọng p'Asiriya. Mada anọng an-aphyọbh k'ekpebha, bẹ an-are abukhi k'ọhaabh p'ayim mẹ. 36Mẹ wọ ofon, Senakerib kw'ode ọvaarnọng kw'Asiriya ọtzọr ọkpa nnam. Ọbhana ọtza owobha ka Ninevẹ.
37Iwa ewu dani, mada om-okpobha ọkha fẹ f'ode Nisrọk k'ọkhapa, va pẹ p'ijinọng p'ade Adramelek ọmaana Shareza atzima ọkkangkkaang afhẹ-ẹ, bẹ arọbh achina k'ẹkhọma ch'Ararat. Wa Esarhadọn kw'ode nnwa kwẹ, otzera awọriba p'otte, ode ọvaarnọng.
