Select a Verse
दिमाक
1निक्खा नाम मेहगा इतर लग अउ मिरतू कर रोज जनम कर रोज लग बढिहा हबै। 2भोज कर घर जाय लग दुख के घर जाय के बढिहा हबै, काखे सगलू मनसेन के आखरी मिरतू हबै। 3हंसी लग दुख बढिहा हबै, काखे मुंह कर सोक लग मन सुधरथै। 4हुसियारन के मन सोक करै बाले के घर के पल्ला लगे रथै, पय मूरखन के मन मगन करै बालेन के घर लगे रथै। 5मूरख के गाना सुनै लग निक्खा हबै हुसियार के डांट दपट सुनै के निक्खा हबै। 6काखे मूरख कर हंसी हांडी बरतन कर तरी जलथै हर कांटा चरचराहट कर जसना होथै उहो बेकार हबै। 7निस्चय अंधियार लग हुसियार बेकार हुइ जथै अउ घूंस लग दिमाक नस्ट होथै। 8कउनो काम के सुरू लग ओखर अंत निक्खा हबै, अउ धीरज बाले डउका घमंड लग अच्छा हबै। 9अपन मन हे उताबली लग गुस्सा झइ होबे, काखे गुस्सा मूरख कर हिरदय हे रथै। 10हइ न कहबे, गुजरे हर रोज इन लग काखे निक्खा रथै? काखे तै हुसियार लग काखे सबाल नेहको पूंछथस? 11दिमाक मिरास के संग निक्खा होथै, पय जिन्दा रहैबाले के निता लाभकारी हबै। 12दिमाक के आसरा डेरा के आसरा के जसना हबै, ग्यान लग हइ फायदा हबै, कि ऊ अपन दिमाक लग जीवन के सुरक्छित रखथै। 13भगवान के कामन हे बिचार करा, जेही भगवान टेढवा बनाय हबै, उके कउन सिध्धा कर सकथै? 14सुख के रोज खुसी बनाबा, पय दुख के रोज हे बिचार करा, काखे भगवान सुख अउ दुख दुनो के बनाय हबै, ताकि मनसे हइ बात के होय बाले भेद कर नेहको पाय सकिन। 15मै अपन बेकार जीवन हे हइ देखे हव, नेक मनसे अपन धारमिकता हे मरथै, पय दुरजन मनसे बुराई करत दीरघाय होथै। 16अपन के बोहत नेक झइ बना, अउ न अपन के जादा हुसियार बना तै काखे अपन नास के कारन हबस? 17बोहत जादा बेकार झइ बन, अउ न मूरख होय नहिता तै टेम के आगुन काखे मरिहे? 18निक्खा हइ हबै कि तै अक्ठी के पकरे रहा, अउ दूसर के अपन हाथन लग झइ निकरै देया, जउन मनसे भगवान कर डेर मानथै, ऊ हइ सगलू समस्या लग पार हुइ जही। 19दिमाक लग सहर के दसठे हाकिम के अपेक्छा हुसियार के जादा सक्ति मिलथै। 20निस्चित दुनिया हे कउनो असना नेक मनसे नेहको हबै जउन हरमेसा भलाई करथै अउ जेखर लग पाप नेहको हुइस। 21जेतका बात कहे जाय सब हे कान झइ लगाबे, असना झइ होय कि तै सुने कि तोर हरवाह तोके सराप देथै। 22काखे तै खुद जानथस कि तै बोहत बेर दूसर के सराप दय हवस। 23हइ सगलू मै दिमाक लग जांच लय हबै, मै कथो, मै हुसियार हुइ जहुं पय हइ मोर लग दुरिहां रहिस। 24ऊ जउन दुरिहां अउ अंतखोह गहिरा हबै, ओखर भेद कोनहर पाय सकथै? 25मै अपन मन लगायों कि दिमाक के बारे हे जान लयो, कि खोज निकारों अउ ओखर भेद जानो, अउ दुस्टता के मूरख अउ मूरखता जउन निरा पागलपन हबै। 26मै मिरतू लग जादा दुखदाई अक चीज पायों, मतलब ऊ डउकी जेखर मन फन्दा अउ जाला हबै, अउ जेखर हाथ हे हथकडिया हबै, अउ जउन डउका लग भगवान मगन हबै, उहै ओखर लग बची, पय पापी ओखर सिकार होही। 27देख, उपदेसक कथै, मै ग्यान के निता अलगे-अलगे बात मिलायके जांचही, अउ हइ बात निकारिस। 28जेही मोर मन अब खोजथै, पय नेहको पाथै, हजार मसे मै अक्कोठे डउकी नेहको पायों। 29देखा मै सिबाय हइ बात पाय हबै, कि भगवान मनसे के सिध्धा बनाइस, पय उन बोहत युक्ति निकारे हबै।
