Select a Verse
Yuda Mbanasi
1Isasa wandugu zangu, mwe mbui ya kweza kwakwe Zumbe yetu Yesu Klistu na kuikwa kwetu hamwe, tekae nae, tawahembeza muno, 2mntu asekuwazaganya kwa kinyio na wala msekuogoha, kwa mbai ya muye yoyose na wala kwa mbui wala kwa bauwa imamakanywayo ni yetu, igombekayo kuwa msi wa Zumbe ubinda kae kuwaaho. 3Mntu yoyose asekuwatiiya kwa sia yoyose, kwaviya msi uwo khaunauwezee adi uda ubanasi ulawiiye bosi, na yuda mbanasi aoneke, ambae kisikiizi chakwe endaadagamizwe. 4Yee endaahigane na kwetutumua uwanga ya kiya kintu waonacho wantu kuwa ni muungu hambu kukivika, na endaengie na kwekaa mwe Nyumba ya Muungu, aketenda kuwa yee ni Muungu.
5Hambu, khamkumbuka kuwa nekhiwamba aya yose kisingi nekuwaho hamwe na nywie? 6Akini kuna kintu kimkindiacho isasa, nanywi mwakimanya kiya kimkindiacho. Naho, uyo Mbanasi endaaoneke kisingi chakwe chendahokibue. 7Nguvu zekwefisazo za yuda Mbanasi zagosoa ndima adi isasa, akini yuda ambae amkindia endaaendee kumkindia adi endahoausigwe, 8aho nee Mbanasi endahoalawiiye. Mntu uyo Zumbe Yesu endahoeze endaamkome kwa muye wa kanwa chakwe na kumdagamiza kwa ung'azi wa kweza kwakwe. 9Uyo Mbanasi endaeze na udaho wa Ibiisi na kugosoa kiya namna ya vihii na viozo vya uhokho, 10na kutumia kiya mbai ya utiizi kwa wada wekuwao mwe mkumbo wa kwaga. Awo wendawage kwaajii khawekuhokea na kuukundisa uda ukwei ili waoholwe. 11Na kwaajii inu, Muungu kauhusu waongoewe na nguvu za utiizi, ili wazumiie uhokho, 12kwaivyo wose ambao khamwekuzumiiya uda ukwei, iya wawa na nyemi na mavigaviga, wendawaamuiwe.
Msagulwa ili muoholwe
13Takundigwa kumtogoa Muungu misi yose kwaajii yenu nywie wandugu, nywie mkundiswao na Zumbe kwaviya Muungu kawasagua kuvokea aho bosi mdahe kuoholwa kwembokea kwa kusuntwa kwa Muye wa Muungu na kuzumiiya mwe ukwei. 14Muungu kawetangia mbui inu kwembokea Mbui Yedi tekuwabiikieni, kawetangia mdahe kuhokea fungu denu mwe Ukuu wa Zumbe yetu Yesu Klistu. 15Ivyo wandugu gookeni vitana na kutoza yada mahinyo tekuwekhayo kwembokea kwa mabiikizi yetu hambu ni kwa bauwa yetu.
16Tamuombeza Zumbe yetu Yesu Klistu mwenye na Muungu Tati yetu ambae nee katikundisa na kwa wedi wakwe akatihongeza misi yose kwesiho kisiikizi na kauwio denye udaho, 17awagee moyo na kuwatintimaza ili mdahe kugosoa na kutamwiiya yekuwayo yedi.
