Select a Verse
1तकोआ गांव मा रोवने वावु आमोस जु गाडरा बुकड़ान गुवायाम गोथु होतु, हेरा ये बुले छे जु तेना योहुदान राजा उज्जियाह क, आरु योआसन पुर्यो इसराएलन राजा यरुब्बामन दाहड़ाम, भुकोम गोथु दुस साल पेहले, इसराएलन वाराम दोरसोन देखिन कोवे: 2योहोवा सियोन सी कुराटो देसे, आरु योरुसालेम गोथु आपसो बुल सोमवाड़से; तोत्यार तोत्यार गुवायान चारवाय कोलेपसे, आरु कार्मेलन चोटी चुयनाय जासे।
इसराएल न पड़ोसी राजन दण्ड
3यहोवा ओसु कोवे : दोमिस्कन ताव तावोन गुनान कोरता हांव हेरो डोन नी छुड़ो; काहकि चे गिलादोन लुहड़ाक होव गेरन्ये कोरीन कुसनी नाखला छे। 4एरकरीन हांव होजाएलन राजान किला मा आगठो लागाड़ीस, आरु हेरेसी बेन्हदोदन राजान बोंगला वी नाश होय जासे। 5हांव दोमिस्कन साकळीयाक तुड़ नाखीस आरु आवेन नावोन घाटिम रोवने वावाक आरु बेतएदेन घोर मा रोवने वावा राजा डोन आपन्या घोरानाक नास कोरीस; आरु अरामन मानसे बान्दवाय होईन कीर जासे, योहोवान योत् बुल छे। 6योहोवा ओसु कोवे: गाजान ताव तावोन गुनान कोरता हांव हेरो डोन नी छुड़ो; काहकि चे आखा मानसे बांदवाय मा कोरीन ली गोया कि हेनुक एदोमोन होकोम कोर देजे। 7एरकरिन हांव गाजान मोटला भितड़ाम आगठो लागाड़ीस आरु हेरेसी हेरा मोटलो किला नास होय जासे। 8हांव ओशदोदोन रोवनेवावाक आरु ओसकोलोनोन राज कोरन्या घोरानाक वी नास कोरीस; हांव आपसो हात एक्रोनोन विरुद् चालाड़ीस, आरु वाचला पोलिस्ती मानसे नास होयसे, परमेश्वर योहोवान यो बुल छे। 9योहोवा ओसु कोवे: सोरोन तिन काय पुन च्यार गुनान कोरता हांव डोन आपनो नी छुड़ो; काहकि चे आखा मानसोक बोन्दी बोनावीन एदोमोन होकोम कोर देदा आरु भाइस्योन वायदाक फोम नी कोर्या: 10एरकरीन हांव सोरोन मोटला भितड़ा पोर आगठो लागाड़ीस, आरु हेरेसी हेरो मोटलो घोर वी नास होय जासे।
एदोम
11योहोवा ओसु कोवे: एदोमन ताव तावोन गुनान कोरता हांव हेनाक डोन आपने नी छुड़ो; काहकि होयु आपसा भाईस्योक तोलवार लिन मार देदु आरु थुड़ीक वी गिन नी कोर्यु, पुन रिसो सी हेनुक एक पोट्यु फाड़तुत् रोयु, आरु आपसी रिस घोना दाहड़ा जुगु बोनाविन राख्यु। 12एरकरिन हांव तेमान मा आगठो लागाड़ीस, आरु हेरेसी बोसरान मोटलो किला वी नास होय जासे।
अम्मोन
13ओम्मोन योहोवा ओसु कोवे ओम्मोनन ताव तावोन गुनान कोरता हांव हेनाक डोन आपने नी छुड़ो काहकी चे आपसी काकोड़ काजे वोदाड़ने जुगु गिलादोन भारपाये बायरान पेट काजे चिर नाख्या। 14एरकरिन हांव रोब्बा न मोटला भितड़ा मा आगठो लागाड़ीस, आरु हेरेसी मोटलो किला वी नास होय जासे। तेनु लोड़ाईन दाहड़ाम हुहड़ु होयसे, चु आंजी पुन भुत्यान दाहड़ु होयसे; 15आरु हेन्दरु राजा आपसा मुख्या भेव गुलामी मा जासे, योहोवान योत् बुल छे।
