Select a Verse
1Deenek, bis nabɛ ɛ́ ààkabɛ nɛ ghwyil ɛmaad, bis naabee náá, ye goka ɛ́ bis lik bisɔ bɛmet kɔ ghaada Atɛn. 2Deenek, ye bɛ ɛ́ bis eekyeed mɔn-nyɛɛg'es Timote, mot bis nɛ bɛnɔɔ di egyee tɔ mɛsa mɛ ɛgoola Mbɛɛ Bhaadal ɛ Klisto ɔ. Nyɛy ɛ́ di egoka nɛ ɛdjɛ bin ghwyil nɛ mɛghaaz tɔ ɛdum ɛ koŋ ɛ len nɛ Zɛɛb. 3Deenek, mot ngɔt tɔ len needi ààkwyit tɔ mɛtiiga mɛ bɛ di etiig bis ɛ. Bi nɛ gu biyɔ bɛmet náá, etɛp djas ee bis di ebee wak ɛ, yɛ ɛ́ Zɛɛb nyɛ ɛmet ɛ di ekwyɛl náá, bis boma nɛ yɛ. 4É ghɛŋ bis nadi pɛ yebɔ ɛ, ye nabɛ ɛ́, bis naalɛɛ bin náá, bis ɛ́ waatiigaa. Yɛ ɛ́ sa bis di eboma nɛ yɛ ɛ, bi nɛ gu yɛ ɛnyɔɛpe. 5Dáa mɛ nadi ààkabɛ nɛ ghwyil ɛmaad ɛ, yɛ ɛ́ étɛp tak ɛ mɛ nalwom Timote, nyɛ neezɛbaŋa bis menduk mɛ ɛdum ɛ koŋ ɛ len nɛ Zɛɛb. Mɛ nadi ɛ́ nɛ bwoo náá, dim mot mɛbhowal ɛzɛkɛwa bin tɔ mɛbhowal, deenek, da mɛsa mɛ bis nasa kɔ ɛsu ɛ len ɛ, gwyɛ toto.
6Tin, dáa Timote nabula pɛ daa len ɛ, nyɛ naabaŋa bis tɛtɛ Bhaadal dum nɛ kwyɛl'en, dɔɔ nɛ ɛdum ɛ koŋ ɛ len nɛ Zɛɛb. Nyɛ eelɛɛ bis náá, bi nɛ taala bis ɛbuɛpe, ɛkwosak ɛ len ɛ́ náá, mena baabomaka dáa bisɔ pe baadi ekwos ɛ. 7É di'enek bɔn-nyɛɛg, tɔ etuŋ nɛ mezuk mes djas, ɛdum ɛ koŋ ɛ len nɛ Zɛɛb naadjɛ bis mɛghaaz. 8Nenak, bis ɛ́ tɔ mɛmyaala nɛ tsik, etɛɛ náá, bi ɛ́ ghiŋ tɔ ɛgwakel nɛ Ghɛŋ. 9Bis bulal bhɔɔ nɛ Zɛɛb kɔ ɛsu ɛ len dáa? Etɛɛ náá, bi ɛpedjɛ bis boo mɛmyaala é mis ɛ Zɛɛb. 10Mwos nɛ pum bis nɛ wa zii é ɛdjaala Zɛɛb étɛp mena neebaabomaka, étɛp bis neebaadjɛ bin sa bi di ààbɛ nɛ yɛ tɔ ɛdum ɛ koŋ ɛ len nɛ Zɛɛb ɛ.
11Beta náá, Zɛɛb Sɛɛg'ena nyɛy ɛmet nɛ Ghɛŋ'enaka Yezu djɛ bis ze, étɛp bis neezyɛ pɛ yebɔ! 12Beta náá, Ghɛŋ sa náá, kwyɛl bi di nɛ yɛ pak'en ɛ, nɛ kwyɛl bi di ekwyɛl bot djas ɛ, gheetetɔ́ sok. Tin, kwyɛl tak goka nɛ ɛdi ɛ́ dáa kwyɛl bis di ekwyɛl bin ɛ. 13Beta náá, Ghɛŋ djɛ bin mɛghaaz étɛp bi needi bot ɛ́ na dɛɛ, ààbɛ nɛ ndjɛ, é mis ɛ Zɛɛb Sɛɛg'enaka, nɛ é sok Ghɛŋ'enaka Yezu aazyɛ nɛ bot bɛ djas ɛ. Amɛn!
