Select a Verse
Goŋ mɛdjoŋ ɛ Pɔl pɛ mɛdhik mɛ Masedwan nɛ Ghɛlɛs
1Dáa ɛghuub nasi ɛ, Pɔl eezɛsɛɛg bɛdjekel, nyɛ eezɛni é ɛdjɛ bɛ mɛghaaz mɛ ɛwa zii tɔ ɛdum koŋ nɛ Zɛɛb. Bhii tak, nyɛ eezɛmwana nɛ nɔɔ, deenek, nyɛ eezɛnɔɔ nyel'ɛ tɔ́ pɛ dik Masedwan. 2Nyɛ eezɛkpaa kɔ pes dik tak, tin, nyɛ eebaazɛdjɛ bɔn-nyɛɛg di penek ɔ, ghwyil ɛwa zii tɔ ɛdu ɛ Zɛɛb. Bhii tak, nyɛ eezɛtɔ́ pɛ kyee dik Ghɛlɛs, 3pɛ nyɛ nasa bɛngɔn ɛlɛl ɛ. Nyɛ nawaadi etɔ́ pɛ kyee dik Siili tɔ mɛsuwa, dáa nyɛ nakagwak náá, bot ɛ mbyak eYuda ɛ́ é boob kɔ ɛsu ɛ lɛ ɛ, nyɛ ɛ́ boozɛke náá, ye goka ɛ́, nyɛ sik pɛ ze Masedwan. 4Tin, Sopatɛɛd, mɔɔ Pyiidus mot ghaada Bheede, zokatɔ́ sama wat nɛ nɛ, zɛnɔɔ Aalistaalak nɛ Sɛkundus mot ghaada Tesalonik, Ghayus mot ghaada Dhɛlɛɛb, nɛ Timote, nɛ Tsisik zɛnɔɔ Tolofim mot kyee dik Azi. 5Bɔɔ djas ɛ naleetɔ́ ɛsok, wɔ gwaa, bɛ kɛbwood bis pɛ ghaada Toloas. 6Yɛ kabɛ bis ɔɔ, bis nadus pɛ ghaada Filip ɛ́ tɔ mɛsuwa, bhis ɛbyoŋ ɛ emapa ee di ààbɛ nɛ leviid ɛ. Tin, mɛlu mɛtɛn bhii tak, bis ɛ́ bookɛboma nɛ nɔɔ pɛ Toloas, é di'enek bis naadi yenga wat.
Mɛdjoŋ mɛ mɛsik ɛ Pɔl pɛ ghaada Toloas
7É ɛlu ɛ etɛn nɛ wat e yenga, bis naazɛboma étɛp bis needɛ kɔminyɔŋ. Tin, Pɔl eezɛni nɛ ɛlii nɛ bot ɛ zɛɛga. Dáa ye nabɛ náá, nyɛ waadhaa djɛmɛn tak ɛ, nyɛ ɛ́ boozɛdul ɛlii kɛkum kuku ɛgha ɛ pum. 8Pɛ tɔ dhɛŋ bis nasɛɛga tɔ tak pɛ ɛko ɛ, ye nabɛ ɛ́ nɛ elama ɛbuɛpe. 9Dhiiti mɔɔ ngbaaz nɛ din ɛ Etik nadi ɛ́ ndiindel kɔ ka ɛyen ɛ ndjaa Pɔl nadi tɔ tak ɛ. Wɔ gwaa, nyɛ zɛni é gɔ́ syaaaz, é sok Pɔl nadi elii ɛ. Tin, nyɛy tɔ gɔ́, nyɛ eezɛbek kɔ ɛyen ɛ ndjaa na ghɛl yii elɛl, duma si. Wɔ gwaa, bɛ zokazɛghɛɛ nyɛ, nyɛ nadi ɛ́ nyɛ eezegwyɛ. 10Tin, Pɔl eezɛsul, nyɛ eezɛmalal kɔ lɛ, bhii tak, nyɛ eezɛbɛp nyɛ kɔ mɛmbɔ mɛ, nyɛy náá: «Nàbemka kɛŋ: nyɛ ɛ́ nɛ tsik!» 11Bhii tak, nyɛ eezɛbaabyet, nyɛ eezɛnɔɔ mapa, pyak yɛ, tin nyɛ eezɛnɔɔ yɛ, dɛ. Bhii nyɛ nakabaalii ɛbuɛpe kɛkum ɛlyamla ɛ mɛlem ɛ, nyɛ boozɛnɔɔ nyel tɔ́. 12Tin bɛ eekɛkyeed mɔɔ ngbaaz yenɔk, nyɛy nɛ nyel ɛnyɔɛpe nɛ tsik. Ye nabɛ ɛ́, ye naadjɛ bot djas boo mɛghaaz mɛ ɛdu ɛ Zɛɛb.
Mɛdjoŋ dusa pɛ Toloas tɔ́ pɛ Milɛ
13Bis eetɔ́ ɛsok étɛp ɛkɛni tɔ mɛsuwa mɛ natɔ́ pɛ Asɔs pɛ kyee bis nawaakɛnɔɔ Pɔl ɛ, etɛɛ náá, nyɛ nakwyɛl ɛtɔ́ ɛ́ nɛ mɛko. 14Dáa nyɛ nakaboma nɛ nes pɛ Asɔs ɛ, bis eezɛnɔɔ nyɛ tɔ mɛsuwa, étɛp bis neetɔ́ pɛ dɛl Mitilɛn. 15Dusa bis nadus tin ɛ, bis eezɛsik, tin, djɛmɛn tak bis eezɛkum pɛ sok bhwoob Siyo. Bhii djɛmɛn tak, bis eekum pɛ Samɔs, tin, emyɛn tak, bis eezɛkum pɛ Milɛ. 16Pɔl nabɛ ɛ́ ààkwyɛl ɛtyaa pɛ Efɛɛz, ekaab náá, nyɛ zɛkɛbɔya kɔ kyee dik Azi. Nyɛ nadi etɔ́ kaab ɛ́ kaab é ɛsuu náá, dwoo Patekɔt neekɛbela nyɛ, nyɛy pɛ Yeluzalɛm.
Pɔl eezɛmwana nɛ bɛpaa ɛ Efɛɛz
17Pɛ Pɔl nadi pɛ Milɛ ɛ, nyɛ eezɛkyeed mot nɛ bhaadal pɛ Efɛɛz, bɛ kɛdjóo bɛpaa ɛ zɛɛga mendjaala. 18Dáa bɛ nakakum pɛ daa lɛ ɛ, nyɛ eezɛke nɛ nɔɔ náá: «Bi nɛ gu mɛfulu mɛ mɛ nadi egyee nɛ yɛ pak'en kana dwoo mɛ nakum pɛ kyee dik Azi ɛ. 19Mɛ naasa mɛsa ɛ Ghɛŋ ààbɛ nɛ ɛbet, tɔ ghoŋ nɛ mezuk dum nɛ bhoob mbee lyem bot ɛ mbyak eYuda nadi nɛ yɛ nɛ nam ɛ. 20Bi nɛ gu náá, ye tok nɛ dhiiti mbɛɛ tɛp mɛ nasyel ɛlɛɛ bin. Mɛ naazegoola nɛ ɛlyo ɛ́ bin dum nɛ etɛp djas é mɛbɛsɛɛ nɛ tɔ mendjaa men. 21Mɛ naadul bot ɛ mbyak eYuda nɛ bot ɛ mbyak eGhɛlɛk mɛlɔ náá, bɛ liig elyem, da bɛ ɛ́ du Zɛɛb, nɛ ɛbaadum ɛ koŋ nɛ Ghɛŋ'enaka Yezu. 22Nenak, mɛ moo tɔ́ pɛ Yeluzalɛm, dáa Sisim na Dɛɛ lwom mɛ nɛ bhel náá, mɛ sa ɛ. Tin, mɛ ààgu sa di ebwood mɛ pɛ sok ɛ. 23Sa mɛ di egu ɛ́ náá, kɔ eghaada djas, Sisim na Dɛɛ nadi elɛɛ mɛ náá, membok nɛ mezuk ɛpebwood mɛ. 24Bela náá, tsik'am met tok nɛ boo mɛtaŋ é mis mam. Yii di nɛ boo mɛtaŋ ɛ́, yɛ ɛ́ ɛtɔ́ kɛkum pɛ ɛsik ɛ lwomel'am, nɛ ɛsilal ɛ bim mɛsa mɛ Ghɛŋ Yezu nadjɛ mɛ ɛ: Ɛgoola ɛ Mbɛɛ Bhaadal yii enɛm nɛ embɛɛ e Zɛɛb.
25Mɛ eedhaa tɔ sama yen é ɛgoola Mbɛɛ Bhaadal Ɛyoŋ ɛ Zɛɛb, tin, mɛ nɛ gu náá, ye tok nɛ mot aakabaabee mɛ tɔ sama yen. 26Yɛ ɛ́ étɛp tak ɛ mɛ di elɛɛ nɛ nen mos náá, mɛ ɛ́ sosoob: mot ngɔt pak'en ɛ kɛwo ze ɔɔ, yenek ààkagwyák mɛ. 27Etɛɛ náá, mɛ eezɛlyaal bin egeka e Zɛɛb djas, ààsyel sa wat. 28Bi ɛ́ konyan mis kɔ biyɔ bɛmet, nɛ kɔ ɛsaa ɛ Sisim na Dɛɛ djɛ bin bi baal ɛ. Bi ɛ́ kobaal zɛɛga mendjaala mɛ Zɛɛb nabɔm nɛ ghiya mɔn'ɛ met ɛ. 29Mɛ nɛ gu náá, bhii mɛ aatɔ́ ɛ, bot ɛ di enɔŋel nɛ eben ɔ waazɛni pak'en, tin, bɛ aanàkwaagek ɛsaa ghoŋ. 30Tin, dɔɔ nɛ tɔ sama yen, bot ɛ́ waani nɛ ɛlɛɛ elɛŋ e etsal, étɛp bɛdhiiti bot ɛ di edum koŋ nɛ Zɛɛb ɔ needu bɛ. 31Bɛɛka mis, da bi ɛ́ taala náá, tɔ membu melɛl mwos nɛ pum, mɛ nabɛ ɛ́ ààkat ɛdul ɛ́ bin mɛlɔ, ye nakoozodi nɛ miŋal é mis.
32Nenak, mɛ ɛpedjɛ bin é mɛmbɔ mɛ Zɛɛb, nɛ bhaadal enɛm nɛ embɛɛ bɛ. Nyɛ ɛ́ nɛ ghwyil ɛsa náá, bi wyee tɔ ɛdum ɛ koŋ nɛ Zɛɛb, nɛ ɛdjɛ bin esesɛɛ djas nyɛ nakwom étɛp bot bɛ ɛ. 33Mɛ nabɛ ɛ́ ààsaa epata, ààsaa elɔɔd, ààsaa ekaad e bot. 34Biyɔ bɛmet nɛ gu náá, mɛ nadi esa mɛsa nɛ mɛmbɔ mam met, étɛp mɛ neebela esa ee bis nɛ bot ɛ di egyee nɛ nam nadi nɛ gwyes tak ɛ. 35Mɛ nabɛ ɛ́, mɛ eelyaal bin náá, ye goka ɛ́ bi sa mɛsa étɛp bi neekwyee bɛdjel ɛ bot. Bi baataala etɛp ee Ghɛŋ Yezu nyɛy ɛmet nake náá: “Ɛgwyena mot sonok eedhaa ɛbela sonok nɛ mɛnyɔ!”»
36Bhis yenek, Pɔl eezɛkwyit mɛboŋ si bɛ nɛ bɛnɔɔ, bɛ eezɛni edjaala. 37Bɔɔ djas moo tin edje, bhii tak, bɛ eezɛbeedal Pɔl tɔ mɛmbɔ mɔɔ, bɛ neemwana nɛ nɛ. 38Bɛ nadi ɛ́ nɛ boo goŋ tɔ elyem, etɛɛ náá, Pɔl naake náá, bɛ aanàkabaaboma nɛ nɛ. Bhii tak, bɛ eezɛtɔ́ kɛmwana nɛ nɛ pɛ mɛsuwa nadi ɛ.
