Select a Verse
Mɛswosel
1Yɛ ɛ́ mam Pɔl, mot-mɛsa ɛ Yezu Klisto. Zɛɛb ɛ nadjóo mɛ, nyɛy ɛ nasɛ́ɛ mɛ étɛp mɛ needi mot-lwoma, mɛ neegoola bin Mbɛɛ Bhaadal yɛ.
2Zɛɛb naalookɛk Mbɛɛ Bhaadal tak nɛ bɛngoolel ɛ mɛkpa mɛ tɔ Ekwyala na dɛɛ. 3Mbɛɛ Bhaadal tak lii ɛ́ kɔ ɛsu ɛ mɔn'ɛ Yezu Klisto Ghɛŋ'enaka. Nyɛ nabyel kɔ bɔs ɛ́ dáa bot djas di ebyel ɛ, tɔ lɔɔg mɛbyel mɛ bɛdha ɛ mɛkoozi Dhavid. 4Nɛ mɛbwala mɛ Sisim na Dɛɛ, Zɛɛb naalyaal náá, Yezu Klisto Ghɛŋ'enaka ɛ́ Mɔn ɛ Zɛɛb, é sok nyɛ nagomal nyɛ pak bɛmyoŋ ɛ. 5Nyɛy ɛ nasa náá, mɛ bela enɛm nɛ embɛɛ Zɛɛb ee mɛ di mos mot-lwom'aak. Etɛɛ náá, bot ɛ membyak mɛ sis djas needum koŋ nɛ Zɛɛb, nɛ ɛlooba nɛ nɛ, étɛp ɛdjɛ duu nɛ Klisto. 6Biyɔ pe ɛ́ tɔ lɔɔg bot ɛ tak. Biyɔ, bot ɛ Yezu Klisto nasɛ́ɛ étɛp bi needi bot bɛ ɔ.
7Mɛ kwyal mɛkana mak ɛ́ étɛp biyɔ djas, bot ɛ di pɛ ghaada Lɔm ɔ, biyɔ bot ɛ Zɛɛb di ekwyɛl ɔ, biyɔ bot ɛ Zɛɛb nazesɛ́ɛ étɛp bi needi bot ɛ na dɛɛ ɔ. Beta náá, Zɛɛb Sɛɛg'enaka nɛ Ghɛŋ Yezu Klisto djɛ bin enɛm nɛ embɛɛ nɛ egwyem.
Pɔl ɛpekwyɛl ɛtɔ́ kɛbee bot ɛ ezɛɛga mendjaala ghaada Lɔm
8Mɛ pookokan sok ɛ, ɛbulal bhɔɔ nɛ Zɛɛb'am nɛ din ɛ Yezu Klisto kɔ ɛsu ɛ len. Etɛɛ náá, bhwak djas ɛpelii ɛnyɔɛpe kɔ ɛsu ɛ ɛdum ɛ koŋ ɛ len nɛ Zɛɛb. 9Zɛɛb nɛ gu náá, sa mɛ di elɛɛ ɛ, yɛ ɛ́ etɛp etsɛɛtsɛ, nyɛy mot mɛ di esa mɛsa mɛ yii ɛgoola Mbɛɛ Bhaadal kɔ ɛsu ɛ Mɔn'ɛ nɛ lyem wat ɔ. Nyɛ nɛ gu náá, mɛ nɛ djaala étɛp'en ngwyis. 10É mɛwala djas mɛ di edjaala ɛ́, mɛ nɛ waab nɛ Zɛɛb náá, nyɛ djɛ mɛ ze ɛzyɛ pɛ yebɔ, yɛ bɛ náá, yɛ ɛ́ ɛkwosak ɛ lɛ ɔɔ. 11Deenek, mɛ ɛ́ nɛ gwyes ɛboma nɛ nen dhaa tyɛ, étɛp bi neebela ɛkɛɛ ɛ Sisim na Dɛɛ, étɛp bi neebela mɛghaaz. 12Tin, baabela náá, mɛ kwyɛl ɛ́ mɛ di é di wat nɛ nen étɛp bot needjɛelka mɛghaaz tɔ ɛdum ɛ koŋ ɛ lenaka nɛ Zɛɛb mena dika nɛ yɛ sama'aak. 13Bɔn-nyɛɛg bam, mɛ kwyɛl ɛ́ bi gu náá, mɛ nɛ dyeebagek ɛzyɛ pɛ yebɔ. Tin, mɛ dinaa ààpabela ze ɛzyɛ penek dɔɔ nɛ dwoo pan mos'ak. Mɛ kwyɛl ɛ́ náá, mɛsa mam baaloo pɛ yebɔ pe, dáa ye naloo pɛ kyee bot ɛ membyak mɛ sis ɛ. 14Ye goka ɛ́, mɛ tɔ́ pɛ daa bot djas, bot ɛ mbyak eGhɛlɛk nɛ bot ɛ di ààbɛ tɔ bot ɛ mbyak eGhɛlɛk ɔ, pɛ daa bot ɛ di egu mɛkana ɔ, nɛ pɛ daa bot ɛ di ààgu mɛkana ɔ. 15Yɛ ɛ́ étɛp tak ɛ mɛ di nɛ gwyes dhaa tyɛ étɛp ɛzɛgoola bin Mbɛɛ Bhaadal, biyɔ bot ɛ di kɔ ghaada Lɔm ɔ.
Mɛbwala mɛ Mbɛɛ Bhaadal
16Mɛ tok nɛ sen nɛ Mbɛɛ Bhaadal, etɛɛ náá, yɛ ɛ́ mɛbwala mɛ Zɛɛb dyeebasa étɛp ɛtsik ɛ́ bot ɛ di edum koŋ nɛ Zɛɛb ɔ. Bot ɛ nyɛ aatsik sok ɔ, yɛ aadi ɛ́ bot ɛ mbyak eYuda, bhii tak, bot ɛ di ààbɛ bot ɛ mbyak eYuda ɔ. 17Tin, Mbɛɛ Bhaadal lyaal ɛ́ dhatyee Zɛɛb di enɛɛg mot piki é mis mɛ ɛ. Yɛ ɛ́ kɔ ɛsu ɛdum ɛ koŋ nɛ Zɛɛb, kana mɛkɛn kɛkum pɛ ɛsik dhatyee Ekwyala di elɛɛ ɛ: «Mot di mot epiki kɔ ɛsu ɛ ɛdum ɛ koŋ nɛ Zɛɛb ɔ, nyɛ waatsak.»
Bot ɛ bɔs djas ɛ́ nɛ mesyem sok bhwoob ɛ Zɛɛb
18Tin, pɛ tɔ gwoo, Zɛɛb ɛpelyaal ɛbuk ɛ lɛ kɔ bot djas di esa mesyem ɔ, bot ɛ di ààkɛ tɔ epiki ɔ. Etɛɛ náá, embee mɛsa mɔɔ ɛpelu bot náá, bɛ nàgu etsɛɛtsɛ dum nɛ Zɛɛb. 19Bela náá, sa di egoka náá, bot gu dum nɛ Zɛɛb ɛ, yɛ ɛ́ popoopwon é mis mɔɔ. Zɛɛb nyɛ ɛmet naatel bɛ yɛ popoopwon. 20Mɛbwala ɛ Zɛɛb nɛ konyel Zɛɛb nyɛy nyɛ ɛmet, yɛ ɛ́ esa ee di náá, bot tok nɛ ghwyil ɛbee yɛ popoopwon ɛ. Tin, kana dwoo Zɛɛb nakus bhwak ɛ, kɛyaka nɛ dwoo pan mos'aak, tsoŋ mot ɛ́ nɛ ghwyil ɛgu yɛ ɛnyɔɛpe, é ghɛŋ nyɛ di ebee esa ee Zɛɛb di esa ɛ. É di'enek, bot ɛ bɔs tok nɛ dhiiti mɛgham mɛ bɛ aasa náá, bɛ nàgu Zɛɛb ɛ. 21Bɛ nɛ gu Zɛɛb, tin, bɛ ààduwal nyɛ, bɛ ààbee nyɛ dáa Zɛɛb, bɛ ààbulal bhɔɔ nɛ Zɛɛb dáa ye di egoka ɛ. Bela náá, egeka bɔɔ moo ɛ́ yii ewo, epila elyem bɔɔ eezedipal bɛ mis. 22Deenek, bɛ dyeebaghɛɛ mɛnyel ɛ́ náá, bɛ ɛ́ bɛtsoŋ ɛ bot, ghuna bɛ ɛpelyet. 23Tin, edi di egoka náá, bɛ duwal duma Zɛɛb mot di náá, nyɛ aanàboogwyɛ ɔ, bɔɔ duwal ɛ́ bɛnaghisɛ di ekpaka tyee bot, tyee enen, tyee bɛtit ɛ di nɛ mɛko mɛná ɔ, nɛ bɛdhiiti nakpakaa tyee edjaadela-djaadela ɔ.
24Dum nɛ tɛp tak ɛ, Zɛɛb zedhuugal bɛ tɔ embee esesɛɛ e mɛkwosak mɛ elyem bɔɔ. Deenek, bɛ kadi ɛ́ esa mɛsa mɛ sen di eghwyalal mɛnyel mɔɔ met ɛ. 25É di'enek, bɛ ɛpebet etɛp etsɛɛtsɛ e Zɛɛb, étɛp ɛdu etɛp e etsal. Tin, bɛ kaduwal ɛ́ esa ee Zɛɛb nakus ɛ, ààduwal kusel tak nyɛy nyɛ ɛmet, mot di egoka nɛ ɛduwalaa kɔm-kɔm sii nɛ kɔm ɔ! Amɛn.
26Dum nɛ tɛp tak ɛ, Zɛɛb zedhuugal bɛ tɔ mbee mɛzɔ di eghwyalal mɛnyel mɔɔ ɛ. Tin, boa ààkadi mɛba nɛ botom, bɛ kadiel mɛba ɛ́ pak'ɔɔ boa nɛ boa. 27Tyee wat nɛ boa, botom pe ààkadi mɛba nɛ boa. Bɛ kadiel mɛba ɛ́ pak'ɔɔ botom nɛ botom. Yɛ ɛ́ deenek ɛ́ bɛ di ebela efute e embee esesɛɛ di esa náá, bɛ wo ze ɛ.
28Dáa ye di náá, bɛ eebyen ɛdum ɛ koŋ nɛ Zɛɛb ɛ, Zɛɛb eezelum bɛ koŋ nɛ esiiza bɔɔ yii ewo, tin, bɛ ɛpesa esa ee di ààgoka nɛ ɛsael ɛ. 29Deenek, bɛ moo ɛ́ nɛ bɛtɛ nɛ membi mɛ mɛsa mɛ di ààbɛ tɔ epiki ɛ, ɛbiyo, mbee dɔɔb, embee mɛsa, lyem zok, ɛgó ɛ bot, mɛwɔ, mbee mɛpek, mɛkɔŋ. Bɛ ɛpesu etɛp nɛ min mɛ bɛsɔ bɔɔ, 30bɛ ɛ́ bot ɛ mɛbhekel, bɛ ɛ́ bot ɛ mɛbhuka ɛ Zɛɛb, bɛ ààkaab bot, bɛ ɛ́ bot ɛ ɛbet, bot ɛ ɛghɛɛa nyel. Bɛ ɛ́ nɛ mɛpek mɛ ɛsa embee esesɛɛ, bɛ ààkaab bɛsɛɛg bɔɔ nɛ bɛnyɛɛg bɔɔ. 31Bɛ ààtselal, bɛ ààsa sa bɛ di elɛɛ ɛ, bɛ nɛ lyel elyem, ààbɛ nɛ ghoŋ nɛ bɛsɔ bɔɔ. 32Tin, bɛ nɛ gu epɛ́ɛ e Zɛɛb ɛnyɔɛpe. Bot ɛ di ekɛ deenek ɔ, bɛ goka ɛ́ nɛ ɛsyee. É di'enek, bɛ ààzosik é ɛsa esɛsɛɛ binek nɛ esɛsɛɛ binek, bɛ ɛpemyaal bot ɛ di esa embee mɛsa menek ɔ.
