Select a Verse
Sa wɔ ààpɛ́ɛ mɔn-nyoog
1Myaalka ɛdi ɛnyɔɛpe nɛ mot di ààlyel tɔ ɛdum ɛ koŋ nɛ Zɛɛb ɔ, sa bi ààlii ɛbiyoɛpe dum nɛ mɛkpa mɛ. 2Yɛ ɛ́ nɛ ghwyil ɛdi náá, mot ɛpemyaal ɛdɛ membi mɛ edee djas. Ye kabela ɛ́ náá, mot di ààlyel ɛnyɔɛpe tɔ ɛdum ɛ koŋ nɛ Zɛɛb ɔ zodɛ yɛ ɛ́ mɛwyee. 3É di'enek, mot di edɛ membi mɛ edee djas ɔ, sa nyɛ ààbyasal mot di etsi edhiiti membi mɛ edee ɔ. Mot di etsi edhiiti membi mɛ edee ɔ, sa nyɛ ààbyasal mot di edɛ membi mɛ edee djas ɔ, etɛɛ náá, Zɛɛb eemyaal nyɛ pe. 4Wɔy ɛ́ yɔ zɛ étɛp ɛpɛ́ɛ mot-mɛsa mɛ mot sis? Yɛ bɛ náá, nyɛ eesa mɛsa mɛ ɛnyɔɛpe nɛghu nyɛ ààpasa ɛnyɔɛpe ɔɔ, ye gwyák ɛ́ kukuma yɛ. Tin, nyɛ aapyet tɔ ɛsa mɛsa mɛ, etɛɛ náá, Ghɛŋ ɛ́ nɛ ghwyil ɛsa náá, nyɛ pyet.
5Mot ɛ́ nɛ ghwyil ɛbee náá, yak ɛlu eedhaa yak. Tin, dhiiti mot kabee ɛ́ náá, mɛlu djas ɛ́ djala. Mot nɛ mot goka ɛ́ ɛdi nɛ ɛmyaal tɔ sa nyɛ di egek ɛ. 6Mot di ewa mbɛk pak mɛlu ɔ, nyɛ sa yɛ ɛ́ étɛp ɛduwal ɛ Ghɛŋ, mot di edɛ membi mɛ edee djas ɔ, nyɛ sa deenek ɛ́ étɛp ɛduwal ɛ Ghɛŋ, etɛɛ náá, nyɛ nɛ bulal bhɔɔ nɛ Zɛɛb kɔ ɛsu ɛ edee. Mot di etsi edhiiti membi mɛ edee ɔ, nyɛ sa deenek ɛ́ étɛp ɛduwal ɛ Ghɛŋ, nyɛy pe baabulal ɛ́ bhɔɔ nɛ Zɛɛb. 7Ye tok nɛ mot pak'ena di nɛ tsik kɔ ɛsu ɛ lɛ met. Ye tok pe nɛ mot di egwyɛ kɔ ɛsu ɛ lɛ met. 8Yɛ bɛ náá, mena ɛ́ nɛ tsik ɔɔ, yɛ ɛ́ kɔ ɛsu ɛ Ghɛŋ, yɛ bɛ náá, mena eegwyɛ ɔɔ, yɛ ɛ́ kɔ ɛsu ɛ Ghɛŋ. É di'enek, ye nakoozodi náá, mena ɛ́ nɛ tsik, nɛghu mena eegwyɛ, menaka ɛ́ bot ɛ Ghɛŋ. 9Etɛɛ náá, Klisto naagwyɛ, gom étɛp ɛdi ɛ́ Ghɛŋ bot ɛ nazegwyɛ ɔ, nɛ bot ɛ di nɛ tsik ɔ. 10Wɔy, étɛp yé wɔ di epɛ́ɛ mɔn-nyoog? Nɛ wɔy pe, étɛp yé wɔ di ebyasal mɔn-nyoog? Bela náá, menabɛlka djas ɛ́ waatyaaka sok bhwoob ɛ Zɛɛb étɛp epɛ́ɛ. 11Ekwyala lɛɛ ɛ́ náá:
«Mam Ghɛŋ, mot di nɛ tsik ɔ, mɛ eemyaal nɛ tsɛɛtsɛ náá:
Bot djas ɛ́ waakwyit mɛboŋ sok bhwoob'am,
bot ɛ membyak djas ɛ́ waaduwal duma ɛ Zɛɛb.»
12Deenek, mot nɛ mot ɛ́ waataŋal dum nɛ yɛ mɛsa é mis ɛ Zɛɛb.
Sa wɔ ààkwyesal mɔn-nyoog tɔ mɛbhowal
13Djhookatka ɛwa epɛ́ɛ pak'enaka. Sa bi ààdi nɛ mɛfulu mɛ di epus bɔn-nyɛɛg bin, bot ɛ di ààlyel tɔ ɛdum ɛ koŋ nɛ Zɛɛb ɔ náá, bɛ bema ɛbɛk nɛghu ɛpus bɛ tɔ ɛbiyo. 14Kɔ ɛsu ɛ Ghɛŋ Yezu, mɛ nɛ gu ɛnyɔɛpe náá, ye tok nɛ dhiiti sonok di nɛ edhuud. Tin, mot ɛ bee náá, yak sonok ɛ́ nɛ edhuud ɔɔ, yɛ aakadi ɛ́ nɛ edhuud étɛp'ɛ. 15Wɔ djɛ mɔn-nyoog tuŋ kɔ ɛsu ɛ edee ɔɔ, gua náá, wɔ ààkakɛ tɔ kwyɛl. Deenek, sa wɔ ààgel tsik mɔn-nyoog, mot Klisto nagwyɛ étɛp'ɛ ɔ, kɔ ɛsu ɛ ba mɔɔ tɛp edee. 16Yɛ ààgoka náá, sa di enyɔ nɛ biyɔ ɛ, ye kadi sa di edjɛ bɛdhiiti bot ze ɛlii ɛbiyoɛpe nɛ nen ɛ. 17Étɛp tak ɛ di náá, Ɛyoŋ ɛ Zɛɛb tok étɛp edee nɛghu étɛp edhiiti esa e dek. Tin, yɛ ɛ́ epiki, egwyem, nɛ mɛmyaala yii Sisim na Dɛɛ di edjɛ ɛ. 18Mot di esa mɛsa mɛ Klisto deenek ɔ, nyɛ ɛ́ mbɛɛ mot é mis ɛ Zɛɛb, bot ɛ́ waadjɛ nyɛ gham.
19Djhoosaaka sa di egoka nɛ egwyem ɛ, nɛ sa di egoka nɛ ɛkwyee mena náá, mena tɔ́ka sok tɔ ɛdum ɛ koŋ nɛ Zɛɛb ɛ. 20Sa wɔ ààpul mɛsa mɛ Zɛɛb kɔ ɛsu ɛ edee. Nɛ tsɛɛtsɛ, membi mɛ edee djas ɛ́ dɛɛ, ye goka ɛ́ nɛ ɛdɛel. Tin yɛ àànyɔ náá, bot dɛ sa di nɛ ghwyil ɛpus mɔn-nyɛɛg'ena tɔ ɛdjak ɛ. 21Sa di ɛnyɔɛpe ɛ, yɛ ɛ́ ɛtsi ɛ tit, ɛtsi ɛ mɛnyok, yɛ ɛ́ ɛbyen ɛ sa djas di nɛ ghwyil ɛpus mɔn-nyoog tɔ ɛdjak ɛ. 22Ɛmyaal wɔ di nɛ yɛ dum nɛ tɛp edee ɛ, dia nɛ yɛ étɛp wɔy ɛmet é mis ɛ Zɛɛb. Mɛmyaala nɛ mot di ààdjɛ lyem'ɛ mɛbɛ nɛ sa nyɛ zesɛ́ɛ ɛ. 23Tin, mot ɛ di nɛ mbee esiiza é sok nyɛ di edɛ edee ɔɔ, Zɛɛb waawa nyɛ é feŋ. Etɛɛ náá, ɛmyaal ɛ lɛ ɛ́ zyaala nɛ sa nyɛ sa ɛ. Tin, sa djas di zyaala nɛ ɛmyaal ɛ, yɛ ɛ́ syem.
