Select a Verse
Inchi jaka Manase ku upambala wa kolijibhi lyobha
1Bhandu bha likabila laka Manase joakabhili mbelakeka wa kutumbula waka Yusufu, bhelabhela bhakapekiwi pandu pabhu kwa kulapula kula. Makili, mbelakeka wa kutumbula waka Manase na tati waki Gileadi, akajomwili kupekewa kwa kulapula kula michi ja Gileadi na Bashani, maghambu akabhili na makili namaa kungondo. 2Bhangi bhabhahighalile bha likabila laka Manase bhakapekiwi pandu pabhu kwa kulapula kula kulengana na lukolu lwabhu. Lukolu yeniheyi yakabhili yela yaka Abiezeli, Heleki, Asilieli, Shekemu, Hefeli na Shemida. Abhabha nde bhabhelakeka bhangi bhaka Manase mwana waka Yusufu. 3Nambu Selofehadi mwana waka Hefeli, mwana waka Gileadi, mwana waka Makili, mwana waka Manase, ngacheakabhili na mwana wa chikambaku, nambu akabhili na bhana akambomba pela, nabhombi bhakabhili Mahila, Noa, Hogila, Milika na Tiliza. 4Bhanihabha bhakunjendili mpenganyambiku Eleazali, na Yoshua mwana waka Nuni, na ihongozi bhangi na kubhapwaghila, “Bambo Chapanga akundaghalaki Musa atupekyaje upwelelu pachilanda ja bhalongu bhitu.” Bhela Yoshua akabhapekihi upwelelu wabhu papamu na bhalongu bha chikambaku bhaka tati wabhu, kulengana na lilaghalakilu laka Bambo Chapanga. 5Ajeji nde ndandi ja likabila laka Manase kujonjukewa pandu komi patali na inchi ja Gileadi na Bashani, jejibhili kwihi ja nkoka Yoludani. 6Maghambu akakamwali abhabha bhaka Selofehadi kuhuma mu likabila laka Manase bhakajopalili upwelelu wabhu pachilanda ja bhana bha chikambaku bha likabila labhu. Inchi ja Gileadi bhakapekiwi bhabhelakeka bhangi bhabhahighalili bha chikambaku bhaka Manase.
7Pandu paka Manase pakajaghanili kutumbula ku Asheli mbaka ku Mikimeta, kujenda ku upambala wa kolipita lyobha wa Shekemu. Kuhuma panihapa ulindakanilu ghonihoghu ukapiti upambala wa kunkachi, na kuhika mbaka pandu pabhakabhi bhatama bhenei bha Eni Tapua. 8Inchi ja Tapua jakabhili jaka Manase, nambu Tapua jeni jejibhili mu malindakanilu gha inchi jaka Manase, jakabhili mali gha bhabhelakeka bhaka Efulaimu. 9Kuhuma panihapa ulindakanilu ghonihoghu ukahelili upambala wa kunkache mbaka ku chikoka cha Kana. Kukabhili na michi jaka Efulaimu jejakabhili pachilanda ja michi jaka Manase, nambu ulindakanilu waka Manase ukabhili ku upambala wa kungonde wa kikoka chenihechi, na kujomukela ku bahali ja Meditelania. 10Inchi ja upambala wa kunkachi jakabhili mali ghaka Efulaimu, na upambala wa kungonde ukabhili mali ghaka Manase, ulindakanilu waki ukabhili bahali ja Meditelania kwa upambala wa kolijibhi lyobha. Likabila laka Asheli lakabhi ku upambala wa kungonde na kolijibhi lyobha, na Isakali akabhili ku upambala wa kungonde na kolipita lyobha. 11Bhelabhela mu inchi ja likabila laka Isakali na Asheli, Manase akabhili na michi ja Beti Shani na ijiji yaki, Ibileamu na ijiji yaki, na bhenei bha Doli na michi jabhu, bhenei bha Endoli na michi jabhu, bhenei bha Taanaki na michi jabhu, bhenei bha Megido na michi jabhu, mbaka selusi ja muchi wa Nafoti. 12Nambu bhabhelakeka bhaka Manase ngachebhaweziki kubhatopola bhenei bha muchi ghonihoghu, kwa kubha Bhakanaani bhakajomalakili nahuli bhajendalyaje kutama mu inchi jeniheji.
13Hata bhela, Bhaizilaeli pabhajendalili kupata makili nakanopi bhakabhahengishi lihengu Bhakanaani, na kubhajomalakela kuhenga lihengu lelinonwipe, nambu ngachebhatopwili bhabhokaje.
Bhabhelakeka bhaka Yusufu bhajonjukewa inchi ku upambala wa kolijibhi lyobha
14Bhabhelakeka bhaka Yusufu bhakundaluki Yoshua, “Bho, maghambu kiki utupekihi tepani pandu pamu pela kubha upwelelu witu? Maghambu tepani tubhili bhandu bhamaheli, na Bambo Chapanga atupengalili na kubha bhamaheli namaa sajenu.”
15Yoshua akayangike, “Ngati mwehapa mbili litaifa likolongwa la bhandu, na kubha inchi ja itombi jaka Efulaimu nde jichoku namaa kwinu, nkwelaje kuchitombi mkakechaje pandu kwa ndandi jinu mabhete ku inchi ja Bhapelizi na Bhalefai.”
16Bhabhelakeka bhaka Yusufu bhakayangike, “Inchi ja itombi heji ngajutujaghanile, hata bhela Bhakanaani bhokapi bhabhatama ku inchi ja uwanda bhabhili na magali gha choma gha ngondo, bhelabhela bhokapi bhabhatama ku Beti Sheani papamu na ijiji yaki, na bhala bhabhatama ku libondi la Yezileeli.”
17Bhela Yoshua akalongili na bhabhelakeka bhaka Yusufu, yani Efulaimu na Manase, akapwaghaje, “Mwehapa mbili litaifa likolongwa la bhandu, nanamu mbili na makili namaa. Ngamwikubhi na pandu pamu pela pa upwelelu, 18nambu bhelabhela na inchi ajeji ja itombi nde jinu. Hata ngati sajenu jibhi chitengu, nkechaje na kujitola jeniheji kutumbula upambala aghoghu mbaka komukaweza kuhika. Hata ngati Bhakanaani bhabhili na magali gha choma gha ngondo, nabhombi bhabhili na makili, mwehapa anamuwezaje kubhatopola bhanihabha.”
