Select a Verse
ዳዊተ ይሁዳን ካተቱሳ
(1:1—4:12)
ዳዊተ ሳኦል ሀይቄዳዋ ስሴዳ
1ሳኦል ሀይቄዳዋፐ ጉይያን፥ ዳዊተ አማሌቃ አሳቱዋ ጾኔዳ ሳፐ ስሜዳ፤ ጽቅላጋ ካታማን ላኡ ጋላሳ ታኬዳ። 2ሄዛን ጋላስ እት ብታኒ ካዮ ባረ ማዩዋ ፔደ፥ ባረ ሁጲያን ባና ላሊደ፥ ሳኦላ ሄራፐ ዬዳ። ዳዊተኮ እ ዬዳ ዎደ፥ ሳኣን ግሲደ ጎይኔዳ። 3ዳዊተ አ፥ “ኔን ሀቃፐ ያድ?” ያጊደ ኦቼዳ።
ሽን እ፥ “ታን እስራኤለቱዋ ሄራፐ ከሳ አካደ ያድ” ያጌዳ።
4ዳዊተ አ፥ “አያይ ከሴደንቶ አነ ታዉ ኦዳ” ያጌዳ።
እ ዳዊታ፥ “ኑ ኦላንቻቱ ኦላፐ ባቃቴድኖ፤ ኑ አሳፐ ዳራቱ ሀይቄድኖ፤ ቃይ ሳኦልነ አ ናአይ ዮናታን ሀይቄድኖ” ያጌዳ።
5ኦዱዋ አሄዳ ዎዳላ ዳዊተ፥ “ሳኦልነ አ ናኣ ዮናታን ሀይቄዳዋ ኔን አያን ኤራይ?” ያጊደ ኦቼዳ።
6ዎዳላይ፥ “ካጫዳን ታን ግልቦአ ደርያን ደእሽን፥ ሳኦል ባረ ቶራ ጉፈቲደ ኤቄዳዋ በኣድ፤ ፓራ ጋረቱነ ፓራ አሳቱ ሳኦላኮ ማታቴድኖ። 7ሄ ዎደ ሳኦል ዩሽ ጼሊደ ታና በኤዳ፤ ታና ጼስና ታን፥ ‘አቤ!’ ያጋድ። 8ሳኦል ታና፥ ‘ኔን ኦኔ?’ ያጊደ ኦቼዳ፤ ታን አዉ፥ ‘አማሌቃ አሳ’ ያጋደ ዛራድ። 9ሄዋፐ ጉይያን ሳኦል ታና፥ ‘ታን ሎይ ማዱንጻደ፥ ሀይቆ ማታ ኡታድ፤ ኔን ታ ቦላ ከሳ ኤቃደ ታና ዎ’ ያጌዳ። 10እ ኩንዴዳዋፐ ጉይያን፥ ሀይቁዋፐ አተናዋ ኤሬዳ ድራዉ፥ ታን አ ቦላ ከሳ ኤቃደ አ ዎድ፤ አ ሁጲያን ደእያ ካላቻነ አ ቀስያን ደእያ ሳጋይያ አካደ ኔኮ ታ ጎዳኮ አሃድ” ያጌዳ።
11ሄዋፐ ጉይያን፥ ዳዊተነ ዳዊታ አሳይ ካዮቲደ፥ ባረንቱ ማዩዋ ዳፊደ ፔድኖ። 12ኡንቱንቱ ሳኦል፥ ዮናታን፥ መና ጎዳ ኦላንቻቱነ እስራኤልያ አሳይ ኦላን ዉሬዳ ድራዉ፥ ኦማርስ ጋካናዉ ካዮቴድኖ፥ ዬኬድኖነ ጾሜድኖ።
13ኦዱዋ አሄዳ ዎዳላ ዳዊተ፥ “ኔን ሀቃ አሴ?” ያጊደ ኦቼዳ።
ሽን እ ዳዊታ፥ “ታን በትያ አማሌቃ ብታንያ ናኣ” ያጌዳ።
14ዳዊተ አ፥ “መና ጎዳይ ኦኬዳ ካትያ ዎናዉ ነ ኩሽያ ደንደ፥ አያዉ ያያበይኪ?” ያጌዳ። 15ዳዊተ ባረ አሳቱዋፐ እቱዋ ጼሲደ፥ “ባ፤ አ ዎ!” ያጌዳ፤ እ አማሌቅያ ደቺደ ዎዳ። 16ዳዊተ አማሌቅያ፥ “መና ጎዳይ ኦኬዳ ካትያ ታን ዎድ ያጋደ ኔን ነ ዶናን ማርካቴዳ ድራዉ፥ ነ ሱ ጎሚ ኔና ኦይቆ” ያጌዳ።
ዳዊተ ሳኦላዉነ ዮናታናዉ ዝላሌዳ ዝላሳ
17ዳዊተ ሳኦላዉነ አ ናኣ ዮናታናዉ ሀዋዳን ያግ ዝላሌዳ። 18ይሁዳ አሳይካ “ዎንዳፍያ” ጌተትያ ሀ ዝላሳ ታማራና ማላ ዳዊተ አዛዜዳ፤ ሀ ዝላሳይ ያሻራ ማጻፋን ጻፈቴዳ።
19“ኔኖ እስራኤለዉ፥
ነ ካፓቱ ነ ቃ ግሹዋን ሀይቄድኖ።
ዎልቃማቱ ዋን ኩንዴድኖሻ!
20ሀዋ ጋተ ካታማን ኦዶፕተ፤
አስቃሎና ኦገቱዋንካ አዋዮፕተ።
ሄዋ ስሶፐ፥ ፕልስጼማቱዋ ማጫ ናናይ ናሸታና፤
ሻማቱዋ ማጫ ናናይ ‘ሀሹ ጋና!’
21“ህንተንቶ ግልቦአ ደረቶ፥
ህንተንቱ ቦላን እራይ ቡኮፖ፤
ከተርሳይካ ዎፖ።
ሄ ቢታ ጎሻይካ ካ ሞኮፖ፤
አያዉ ጎፐ፥ ያን ዎልቃማ ጎንዳሊ ቱናባ ከሴዳ፤
ሳኦላ ጎንዳሊካ ዛይትያን ቁጨትያዋ አጌዳ።
22ጎራኤቴዳዋንቱ ሱፐነ፥
ዎልቃማቱዋ አሹዋፐ፥
ዮናታና ዎንዳፊ ጉየ ግቤና።
ቃይ ሳኦላ ማሻይ ካለናን ስምቤና።
23“ሳኦልነ ዮናታን
አሳይ ሲቅያዋንታነ ሎእያዋንታ፤
ባረንቱ ሀይቁዋንካ ባረንቱ ፓጻንካ ሻከትበይክኖ።
ኡንቱንቱ አርጋንፐካ አደ ኤሌልያዋንታ፤
ጋሙዋፐካ አደ ምንያዋንታ።
24“እስራኤልያ ማጫ አሳቶ፥
ሳኦላዉ፥ ህንተንታ ዞኦነ አሌቆ ማዩዋ ማይዜዳዋዎነ፥
ዎርቃን ህንተንቱ ማዩዋ አሌቂሴዳዎነ ዬክተ።
25“ዎልቃማቱ ኦላን ዋን ኩንዴድኖሻ!
ዮናታን ነ ቃ ግሹዋን ጎራኤት ግሴዳ።
26ታ እሻ ዮናታና፥
ታን ነዉ ካዮታይ፤
ነ ታዉ ዳሮፐ አልኡዋ።
ኔን ታና ሲቅያ ሲቁ ማላልስያዋ፥
ማጫ አሳ ሲቁዋፐካ አደ ማላልስያዋ።
27“ዎልቃማቱ ዋን ኩንዴድኖሻ!
ኦላ ሚሻይካ ዋን ድፕ ጌደ!”
ያጊደ ዳዊተ ዝላሌዳ።
