Select a Verse
ኦራ ሳሉዋነ ኦራ ሳኣ
1ሄዋፐ ጉይያን፥ ታን ኦራ ሳሉዋነ ኦራ ሳኣ በኣድ። ኮይሮ ሳሉነ ኮይሮ ሳአይ ዬዳ። አባይካ ዬዳ። 2ጌሻ ካታማታ ኦራ የሩሳላመ፥ ባረ አስናዉ ማያደ ጊጌዳ ገልያ ዎዶሮ ናቲዳን፥ ጊጋ ኡቴዳዉና ሳሉዋፐ ጾሳ ማታፐ ዱገ ዎዉኖ ታን በኣድ።
3ዎልቃማ ኮሻይ አራታፐ ሀዋዳን ያጊደ፥ ሃሳይሽን፥ ታን ስሳድ፤ “ጾሳ ጎሊ አሳና ደኤ፤ ጾሳይ አሳና እትፐ ደአና። ኡንቱንቱ አ አሳ ግዳና፤ ጾሳይ ባረ ሁጰዉ ኡንቱንቱና ደአና። እ ኡንቱንቱ ጾሳ ግዳና። 4ጾሳይ ኡንቱንቱ አይፍያ አፎ ኡባ ቁጫና። ሀዋፐ ስንናዉ ሀይቁነ ካዩ ዎይ ዋሱነ ሳኩ ባዋ። አያዉ ጎፐ፥ ኤጫባይ ዬዳ” ያጌዳ።
5አራታን ኡቴዳዌ፥ “ታን ኡባባ ኦራጽሳይ” ያጌዳ። ቃይካ ጉጂደ ታና፥ “ታን ሃሳይያዌ አማነትያዋነ ቱማ ግድያ ድራዉ ጻፋ” ያጌዳ። 6ቃይካ ታና ሀዋዳን ያጌዳ፤ “ፖለቴዳ። ታን አልፋነ ኦሜጋ፤ ዶመነ ፖሉዋ። ሳመቴዳ ኦናነ ታን ደኡዋ ሃ ፑልቱዋፐ ጮ ኡሻና። 7ጾንያ ኡራይ ኦንነ ሀዋ ኡባ ላታና። ታን አዉ ጾሳ ግዳና፤ እካ ታ ናኣ ግዳና። 8ሽን ያይያዋንቱ፥ አማነናዋንቱ፥ ቱናቱ፥ ሸምፑዋ ዎያዋንቱ፥ ዎሹምያዋንቱ፥ ብትያዋንቱ፥ ኤቃዉ ጎይንያዋንቱነ ዎርዶትያዋንቱ ኡባይ ደእያ ሳአይ ታማይነ ኤጽያ ዲኒ ኤጽያ አባ ግዳናዋ። ሄዌ ላኤን ሀይቁዋ” ያጌዳ።
ኦራ የሩሳላሞ
9ላፑ ዉርሰ ቦሻቱ ኩሜዳ ላፑ ከረቱዋ ኦይቄዳ ላፑ ኪታንቻቱዋፐ እቱ ታኮ ዪደ ታና፥ “ሃያ። ታን ኔና ገለዉኖ ዶርሳ ማቻቶ በሳና” ያጌዳ። 10ኪታንቻይ ታና ዳሮ ቃ ደርያ ሁጲያ አያናን ከሲደ ጌሻ ካታማታ፥ የሩሳላማ ሳሉዋፐ ጾሳ ማታፐ ዱገ ዎዉኖ ታና በሴዳ። 11ሄ ካታማታ ጾሳ ቦንቹዋን ፖአዉ። ሄ ካታማት ፖኡ ያስጲድያ ጌተትያ አልኦ ሹቻ ማላ፤ ብርሊያዳን ጶላዉ። 12ሄ ካታማትዉ ታማነ ላኡ ፐንገቱነ ሄ ፐንገቱዋን ታማነ ላኡ ኪታንቻቱ ናግያ ዎልቃማ አዱሳ ድርሳይ ደኤ። ፐንገቱዋን ታማነ ላኡ እስራኤልያ ዛራቱዋ ሱንይ ጻፈት ኡቴዳ። 13አዋይ ዶልያ ባጋና ሄዙ ፐንገቱ ደኢኖ። ቃይ ህርክ ባጋና ሄዙ ፐንገቱነ ሁጲሳ ባጋና ሄዙ ፐንገቱ ደኢኖ። አዋይ ዉልያ ባጋናካ ሄዙ ፐንገቱ ደኢኖ። 14ካታማት ድርሳይ ዶርሳይ ኪቴዳ ታማነ ላአቱዋ ሱንይ ጻፈቴዳ ታማነ ላኡ ሹቻቱዋ ቦላ ግምበቴዳ።
15ታናና ሃሳዬዳ ኪታንቻዉ ካታማቶ፥ እዝ ፐንገቱዋነ እዝ ድርሳ ልክያ ዎርቃ ጋትማይ ደኤ። 16ካታማትዉ ኦይዱ ጋጻይ ደኤ፤ ካታማት ጌሳይነ ጎምፓይ እት ማላ። ኪታንቻይ ካታማቶ ባረ ጋትማን ልኬዳ። ካታማታ ላኡ ሻአነ ላኡ ጼቱ ኪሎ ሚትርያ ግዳዱ፤ ካታማት ጌሳይ፥ ጎምፓይነ ቃተይ እት ማላ። 17ኪታንቻይ ቃይ ድርሳካ ልኬዳ። አሳ ኩሽያን እት ጼታነ ኦይታማነ ኦይዱ ዋ ግዴዳ። ሄዌ ኦንነ ልክያ ኦግያን ኪታንቻይ ልክናዳ።
18ካታማት ድርሳይ ያስጲድያ ጌተትያ ሹቻን ድረቴዳ። ካታማታ ብርሊያዳን ጶልያ ጌሻ ዎርቃን መታዱ። 19ካታማት ድርሳዉ ሂጸቴዳ ሹቻይ ቦንቼቴዳ ሹቻ ኡባን አሌቀቴዳ፤ ኮይሮ ሂጸቴዳ ሹቻይ ያስጲድያ፤ ላኤን ሳምፔርያ፤ ሄዘን ከልቀዶንያ፤ ኦይደን ባሉርያ፤ 20እቼሸን ሳርዶንክሳ፤ ኡሱፑን ሳርድዮና፤ ላፑን ክርስትሎባ፤ ሆስፑን ብራል፤ ኡዱፑን ቶጳዝዮንያ፤ ታሙን ክርስጵራሲሳ፤ ታማነ እተን ያክንትያ፤ ታማነ ላኤን አመተስጽኖስያ።
21ታማነ ላኡ ፐንገቱ ታማነ ላኡ እንቁዋ ጌተትያ አልኦ ሹቻ፤ እት እት ፐንጊ እት እንቁዋን ኦሰቴዳ። ካታማት ኦጊ ብርልያ ማላ ጌሻ ዎርቃ።
22ጎዳይ፥ ኡባፐ ዎልቃማ ጾሳይነ ዶርሳይ ካታማት ጌሻ ጎልያ ግድያ ድራዉ፥ ታን ሄ ካታማትን ጌሻ ጎልያ በአበይከ። 23ካታማትዉ ፖእያ አዋይ ዎይ አገናይ ኮሸና። አያዉ ጎፐ፥ ጾሳ ቦንቹ ሄ ካታማትን ፖኤ፤ ዶርሳይካ ሄ ካታማትዉ ጾምፕያ። 24አሳ ዘረይ ካታማት ፖኡዋን ሀመታና። ሳኣ ካታቱካ ባረንቱ ቦንቹዋ ሄ ካታማትኮ አሀና። 25ካታማት ፐንገቱ ኡባ ጋላስካ ዶያ ደአና፤ ኡባካ ጎርደትክኖ። አያዉ ጎፐ፥ ሄዋን ቃማይ ባዋ። 26አሳ ዘረ ግታተይነ ቦንቹ ሄ ካታማትኮ ሺቃና። 27ሽን ቱናባይ ዎይ ካዉሻባ ኦያዌ፥ ዎይ ዎርዶትያዌ ኦንነ ሄ ካታማቶ ገለና። ቃይ ዶርሳ ደኡዋ ማጻፋን ሱንይ ጻፈቴዳዋንቱ ጻላላይ ሄ ካታማቶ ገላና።
