Select a Verse
Paulu mu Melita
1Omo tuahetele ku ntunda cakuhona vukalu, tuauanene ngeci nkumani ije nkundu vaitumbuile nguavo Melita. 2Vavenia vaje vakele kuje vakele na ngozi netu. Kalunga uaputukile kunoka, kaha kuakele lisika kujevene, vatuvuekelele tuhia nakututambula muacili tuva voshe. 3Paulu uakunguluile mukuta uavikuni, kaha omo uahakele vije vikuni hacoto, uje linoka akuivua ku yukuma uahumine muje mutuhia na kumushuma nakuniengelela ku livoko liendi. 4Vavenia vaje vakele kuje vamuene uje linoka ali nakuniengela ku livoko lia Paulu, valihandekesele ku umo na mukuavo nguavo, “Cilivene ou yala hamo uapua muka kutsiha, cipue vene novoka ku cisali vuno honi vusunga vua vanjambi kuvua mutavesele ngeci ayoye.” 5Vuno honi Paulu uamiangele uje linoka mu tuhia cakuhona kuvetua. 6Vamutalele hamo a nzimba vuasi cipue kuuila ha mavu na kutsa. Vuno honi omo vavandamenene ntsimbu yakama kuakuhona kumona cuma cimo cacikalu calingiuile kuli ikeye, kaha vatenguluile visinganieka viavo, na kuhandekele nguavo, “Napu njambi.”
7Kaha kuyehi na mutambela uje kuakele mehia a Pambiliase, muene uaije nkundu. Uatutambuile muacili, kaha tuapuile tuvangenzi vendi matangua atatu. 8Kaha ishe ya Pambiliase uakele mu mulili uendi na kuvavala cikuma masika sika na kutuhuka maninga. Kaha Paulu uakovelele mu mulili muje muakele, ualombelele kaha hanima yakulombela uamusalekele mavoko endi kaha uakangukile. 9Omo eci calingiuile, voshe vaje vaka kuvavala vamuje mu nkundu vezile, kaha vakangukile. 10Vatusingimikile cikuma, kaha omo tuasunuine vuato, vatongekelele mu vuato vioshe vije tuatondele ha vungenzi vuetu.
Paulu ahuma ku Melita aya ku Loma
11Omo kuahitile vingonde vitatu tuakovelele mu vuato vuje humine ku Alekizandiliya, vuje vatumbuile nguavo, “Vanjambi va Vampasa,” vuje vuakele kuje ku nkundu cisika coshe. 12Tuahetele mu nganda ya Silakuse, tuakele kuje matangua atatu. 13Kuhuma kuje tuajavukile mu vuato nakuheta mu nganda ya Lendile. Kaha liamukuavo naua mpunzi yaputukile kupekumuka ku mbuela, kaha mu matangua avali tuahetele mu nganda ya Puteoli. 14Kuje tuauanene vaka kutsiliela vamo vaje vatulombele kukala navo matangua atanu na avali. Kaha tuahetele ku Loma. 15Kaha vaka kutsiliela va mu Loma omo vovuile nguavo tuneja, vezile kuhuma ku vinganda viakulahako via kulandesela via Apiyase na Vinjivo Vitatu via vangenzi mukuliuana netu. Omo Paulu uavamuene, kaha uatsantselele kuli Njambi nakulikolesa.
Paulu aya mu Loma
16Omo tuahetele mu Loma, Paulu vamutavesele kukala mua lika liendi lika hamo na lisualale muka kumuniunga.
17Hanima ya matanga atatu Paulu uasanene vakuluntu voshe va Vayunda linga valiuane hamo. Omo valiuanene hamo, uahandekele kuli vakevo nguendi, “Vamuanetu, cipue vene kunjalingile cimo ca kuluisa vantu cipue futisi ije ituatambuile kuli vakukuluila vetu, vuno honi vanjikutile mu Yelusalema nakunjihana ku mavoko a vaka Loma. 18Omo vanjisompele, vaka Loma vatondele kunjecela, muomu kuvauanene cuma cimo cije cinjalingile cije cinjapandele kutsila. 19Vuno honi omo Vayunda vavianene eci, kaha canjilingisile linga njituale cimpande cange kuli Sezale, cipue vene nange kunjauanenene vantu vange mulonga. 20Muomu ha cuma eci mukemuo njamisanene linga njimimone nakuhandeka neni. Yange njili mu malienge aua muomu ya lizina lia uje ivanatsiliela vantu Vaisaleli.”
21Kaha vahandekele kuli ikeye nguavo, “Kutuatambuile mikanda yakuhuma ku Yundeya ya hali yove, cipue kuno kukuezile umo ua vamuanetu kuhuma kuje na muzimbu umo, cipue kuhandeka via vipi hali yove. 22Vuno honi tutonda kuzivuka viyongola viove, muomu tuazivuka nguetu kuoshe vantu valinakuhandeka viakuluisa civunga eci cije mu uli.”
23Omo vahanguile litangua liakuliuana na Paulu, vantu vavengi valikunguluile kuje kuakele Paulu kuhuma ku cimene kuheta ku cinguezi ua valumbunuinine muzimbu uendi ua Vumuene vua Njambi. Kaha naua uesekele kuvalumbunuina vukaleho vua Yesu ha kuvaleka mezi a mu lishiko lia Mosesa na mezi a mu visoneka via tunanguizi va Njambi. 24Vamo vatavele mezi endi, vuno honi veka kuvamutsilielele. 25Nankuma, vayile oku valinakuliviana hakati kavo vavenia, muomu Paulu nahandeka navo cuma eci nguendi, “Cimbembesi Uakulela uahandekele vusunga kuli vakukuluila veni hali kananguizi Isaya! 26Omo uahandekele nguendi,
‘Ya ukahandeke ku vantu ava nguove,
kuivua mukevua, vuno honi kumukevuisisa,
kumona mukamona, vuno honi ku mukamonesesa.
27Muomu mitima ya vantu ava inapu yakuzeya,
vanaziki matuitui avo,
kaha vanalalameka na mesho avo.
Kuteua mesho avo amona,
na matuitui avo akevua,
kaha mana avo akevuisisa,
kaha vakatengulukila kuli yange,
kaha njikavakanguisa.’”
28Kaha Paulu uamanusuile kuhandeka nguendi, “Munapande kuzivuka ngueni muzimbu ua Njambi uakuovoka vanautumu kuli vaje keti Vayunda. Kaha vakauivuilila!” 29Omo Paulu uamanusuile kuhandeka mezi aua, Vayunda vamusezele oku valinakulinga vimpata viakama hakati kavo vavenia.
30Paulu uakele kuje miaka ivali mu njivo yakulifuetela ikeye vavenia, kaha uakele nakutambula voshe vaje vezile kuli ikeye nakumumona. 31Uambuluile via Vumuene vua Njambi nakulongesa via Muene Yesu Kilistu nakusimpa na mutima uakupatuka.
