Select a Verse
Daudi kowatowa Waamaleki
1Matsuwa madatu hambele, Daudi na iwanu wake tsawoya mna ghumji ghwa Sikilagi. Waameleki tsawaitowa isi ya kusini ya Yuda na ghumji ghwa Sikilagi, na waghulakatsa ghumji aghwo. 2Wawaghogha wapinga na iwanu wose iwang'ali wokala mna ghumji aghwo, wakulu kwa wadodo. Woka nawo iwanu awo iwawaghoghile aku wawagima, kuduhu munu wowose ayula iwamkomile. 3Daudi na iwanu wake hawapfikile mna ghumji ghwa Sikilagi, tsawaghupfika ghumji ghwao ghulakatsighwa, na wapinga wawo, iwana wawo wamale na wapinga tsawasolighwa. 4Baho Daudi na iwanu wangula chililo mbaka wepfa. 5Wehe weli wa Daudi, Ahinoamu kulawa Yezireeli na Abigaili chitsuka wake Nabali, iyolawa Kameli, nawo pfipfila tsawasolighwa.
6Naye Daudi tsakaghanzika ng'ani, kwaapfila iwanu wake wang'ali welongela wamtowe na mabwe, chila munu tsakana usungu mmoyo mwake kwa ukuwaghitsa iwana wake. Lekeni Daudi tsakeghela ngupfu kwa kumhuwila IMNDEWA Imulungu wake.
7Daudi kamlongela mtambika Abiatari mwana wa Ahimeleki, “Ghala ichitsibao cha imtambika ahano.” Naye Abiatari kamghalila. 8Daudi kamlomba IMNDEWA, kamghutsa, “Pfihi niliwinze likingili alino lihile? Angu nitsowaghogha?” IMNDEWA kamwidika, “Liwinze kwaapfila kutsowaghogha na kuwakombola iwanu iwasolighwe.”
9Apfo Daudi koka na iwanu awala miya sita wayakalile nawo, na wose wapfika kuna ichikolongo cha Besori, wamwenga wawo wakala baho. 10Lekeni Daudi kaghendelela kuliwinza likingili alyo aku kelongotsa na iwanu wake miya nne, iwanu wake miya mbili tsawasighala baho hana ichikolongo kwaapfila tsawepfa ng'ani, ng'awadahile baye ukuloka ichikolongo acho. 11Hawang'ali wamzila tsawamwona munu yumwe Mmisiri mmighunda, nawo wamghala kwa Daudi. Imunu ayo tsang'ana yaje baye wala kunwa chinu chochose kwa matsuwa madatu chilo na misi. 12Wamwing'a imunu ayo chijo na ghamatsi. Pfipfila tsawamwing'a chihande cha chighate cha tini na pfikungwi pfili pfa nzabibu tsinyalile. Imunu ayo hayajile, kapata ngupfu. 13Daudi kamghutsa, “Mkulu wako nani? Na ulawile kwani?” Yeye kamwidika, “Nene na Mmisiri, mtumwa wa Muamaleki yumwe. Imkulu wangu kandeka kuchughu tangiya jutsi kwaapfila nene tsa namtamu. 14Twetwe tuitowa imiji ya Wakereti kusini mwa Yuda, hamwe na isi ya kusini ya ghumji ghwa Kalebu, na ghumji ghwa Sikilagi tsatughulakatsa na ghumoto.”
15Daudi kamghutsa, “Apfi kodaha kungala kwa iwanu awo?” Imsongolo ayula kamwidika, “Ona, nodaha, lekeni tanu wilahe kwa taghwa lya Imulungu ka ng'utsonikoma baye wala ng'utsongala baye kwa imkulu wangu, na nene nitsokughala akula kwawali iwanu awo.” 16Imsongolo ayula kamlongotsa Daudi mbaka akula kwawali iwanu awala. Hawapfikile ako tsawawapfika iwanu awo wapwililika chila hanu. Wang'ali wakuja na kunwa na weka lusona kwaapfila wawo tsawaboka pfinu pfingi kulawa mna isi ya Wafilisti na kulawa mna isi ya Yuda. 17Daudi tsakawatowa kwanzila nemitondo mbaka ilupfi yake nemihe. Kuduhu mmale wowose iyatsumile ila iwasongolo miya nne iwadinile ngamiya wawo iwatsumile. 18Daudi tsakoyitsa chila chinu Waamaleki chawabokile, hamwe na wehe wake weli. 19Kuduhu munu wowose iyaghile, yawe mdodo au mbala, yawe mwana mmale, au mwana pinga, au chinu chochose achila ichibokighwe, Daudi koyitsa pfinu pfose. 20Pfipfila Daudi kawoyitsa wang'olo na wamene na wang'ombe, na iwanu wake iwang'ali wowadima wanyama awo akuno wawalongotsa hambele iwanyama awala wamwenga, walonga, “Atsino mali tsa Daudi.”
21Daudi kawoyila iwanu awala miya mbili iwalekighwa kuna ichikolongo cha Besori kwaapfila tsawatsilika, na ng'awadahile baye kumuwinza. Iwanu awala hawamwonile Daudi na iwanu awala iyali nawo, waghenda kumbokela. Daudi hayapfikile habehi na iwanu awo, kawalamsa. 22Lekeni iwanu wehile na iwaghobo mna awala iwaghendile na Daudi, walonga, “Ng'atutsoweng'a baye iwanu awano chinu chochose chatuchikombole, kwaapfila wawo ng'awaghendile baye na twetwe. Wawo wodaha kuwasola wehe wawo na iwana wawo, kuya woke tsawo.”
23Daudi kawalongela, “Baye ndughu tsangu. Ng'amdaha baye ukutenda apfo kwa achila chayatwing'ile IMNDEWA. IMNDEWA katukinga na katutenda tuwahume iwanu awala iwatsile kututowa. 24Angu nani iyatsowahulikitsa kwa achila chamlonga? Ayula iyaghendile kwitowa na ayula iyakalile ahano yabetetse mitsigho yetu, chila imunu katsobokela chichila chayobokela miyaghe.” 25Kulawa litsuwa alyo mbaka leloli aino, Daudi kalitenda alyo liwe laghitso mna isi ya Isiraeli.
26Daudi hayoyile Sikilagi, kawaghalila sale tsake, iwanzehe wa Yuda, ipfinu pfayawabokile, kalonga, “Niwaghalila ipfinu apfino kulawa kuna ipfinu pfaniwabokile maaduwi wa IMNDEWA.” 27Kawaghalila iwanzehe iwali mna ghumji ghwa Beteli, na iwali mna ghumji ghwa Ramoti, ighuli mna isi ya Negebu, na iwali mna ghumji ghwa Yatiri, 28na wanzehe iwali mna ghumji ghwa Aroeri, na iwali mna ghumji ghwa Sifimoti, na iwali mna ghumji ghwa Eshitemoa, 29na wanzehe iwali mna ghumji ghwa Rakali, na iwali mna imiji ya Wayerameeli, na iwali mna ya Wakeni, 30na iwanzehe iwali mna ghumji ghwa Horima na awala iwali Bori Ashani, na iwali mna ghumji ghwa Ataki, 31na iwanzehe iwali mna ghumji ghwa Heburoni. Daudi pfipfila kawaghalila iwanzehe wa isi tsose tsayangilile yeye na iwanu wake.
