Select a Verse
Sanduku lya laghano lyakuya Isiraeli
1Sanduku lya IMNDEWA likala mna isi ya Wafilisti kwa miyetsi saba. 2Wafilisti wawakema watambika wawo na iwatowa lamli wawo, wawaghutsa, “Tulitendetse Lisanduku alino lya IMNDEWA? Tulongeleni, tutsodahatse kulyuyitsa hanu hake?”
3Nawo wawedika, “Mng'alyuyitsa lisanduku lya Imulungu, mleke kulyuyitsa hela. Lekeni hamlyuyitsa ghaleni na nambiko ya ukuleghusa matotso, namwe matotso ghenu ghatsoleghusighwa. Mng'atenda apfo mtsohona, namwe mtsomanya heule yang'ali yowadununza.”
4Iwanu waghutsa, “Tutsomghalila nambiko yachi ya ukuleghusa matotso?” Wawo wedika, “Mumghalile pfinyagho pfitano pfa nzahabu ipfili ka mapute, na pfinyagho pfitano ipfili ka mbewa, chila chinyagho chime hanu ha mkulu yumwe wa Wafilisti, kwaapfila utamu wayamghalileni mwemwe, wuwo wayawaghalile iwakulu wenu. 5Apfo mfine pfinyagho ipfikoneka ka mapute, na pfinyagho ipfikoneka ka wambewa iwohinya isi yenu, namwe mumtunye Imulungu wa Isiraeli, songaha katsoleka ukuwadununza mwemwe, na milungu yenu, na isi yenu. 6Heule mwoitenda imimoyo yenu iwe misughu ka awala Wamisiri, na ka ayula Farao? Imulungu hayawadununze Wamisiri, angu ng'awawalekile baye Waisiraeli woke, nawo tsawoka? 7Apfo mtende mtuka ghwa sambi ghwa ukukweghighwa na ng'ombe, na ng'ombe weli iwakong'etsa, ng'ana wohighwe nira baye, muwohe mna ghumtuka aghwo, lekeni iwana wawo muwoyitse mkaweke kuna ichibanda chawo. 8Soleni Lisanduku lya Imulungu na mlike mna ghumtuka aghwo. Mmbalimbali mwa lisanduku alyo mwike ipfinyagho apfila pfa nzahabu pfamumghalila ka nambiko ya ukuleghusa matotso ghenu. Kuya mlileke lighende lyenyegho. 9Apfo mlilolese, ling'alumbilila mbaka kuna isi yake, kughenda Beti Shemeshi, aho tutsomanya ka iyatughalile utamu auno Imulungu wa Isiraeli. Lekeni ka ng'alilumbilila baye ako, aho tutsomanya ka si yeye Imulungu baye iyatudununze, utamu awo ulawila wenyegho.”
10Iwanu awala tsawatenda ka pfawalongelighwe, wawasola ng'ombe weli iwoghwawisa na wawoha mna ghumtuka aghwo, iwana wawo wawoha mna ichibanda chawo. 11Lisanduku alila lya IMNDEWA walika mna ghumtuka aghula hamwe na lisanduku lina ipfinyagho pfa nzahabu na wambewa na apfila pfa ghamapute. 12Ng'ombe awo walumbilila mbaka mna ghumji ghwa Beti Shemeshi, nawo ng'awabaghuke baye kumoso wala kujilo, na wang'ali woghenda aku wolila. Na wafalume watano wa Wafilisti wawawinza mbaka kuna ghumbaka ghwa Beti Shemeshi.
13Iwanu wa Beti Shemeshi wang'ali wopfuna ingano kulwanda. Hawalolile kuchanya na kulyona lisanduku, wadeng'elela ng'ani. 14Ghumtuka aghula ghupfika mna ghumghunda ghwa Yoshua, imunu wa isi ya Beti Shemeshi. Haghupfikile aho ghwima habehi na libambalawe. Iwanu waitula imibiki ya ghumtuka aghula na wawasubutula wang'ombe awala na wamlapfila IMNDEWA, nayo iwa nambiko ya ukulukatsighwa. 15Nawo Walawi walihulumsa lisanduku lya Imulungu hamwe na lisanduku alila lina ipfinyagho pfa nzahabu, na weka mna libambalawe. Kuya iwanu wa isi ya Beti Shemeshi walapfa nambiko tsa ukulakatsigwa, na wamsubutulila IMNDEWA mna litsuwa lilyo. 16Iwakulu awala watano wa Wafilisti hawonile aghala, woya Ekironi mna litsuwa lilyo.
17Apfino pfipfo ipfinyagho pfa nzahabu Wafilisti pfawamghalile IMNDEWA ka nambiko ya ukuleghusa matotso, chila chinyagho chimwe kwa mji ghumwe, chimwe kwa mji ghwa Ashidodi, chimwe kwa mji ghwa Gaza, chimwe kwa mji ghwa Ashikeloni, chimwe kwa mji ghwa Gati, na chimwe kwa mji ghwa Ekironi. 18Pfipfila wamghalila ipfinyagho pfitano pfa nzahabu pfa wambewa kwa imiji yose itawalighwe na wakulu watano wa Wafilisti. Imiji ayo tsaitsungulusighwa ubanda, na pfijiji pfawo tsapfahela ubanda. Libambalawe alila lili mna ghumghunda ghwa Yoshua wa Beti Shemeshi lyabaho mbaka leloli ka chitango kwa achila ichilawile.
19IMNDEWA kawakoma wanu sabini wa Beti Shemeshi, kwaapfila tsawasungulila mghati mwa lisanduku lya lmulungu, iwanu walila kwaapfila IMNDEWA kawakoma wanu wengi ng'ani.
Lisanduku lya laghano ako Kiriati Yearimu
20Kuya iwanu wa isi ya Beti Shemeshi walonga, “Yuhi iyodaha kwima hambele ha IMNDEWA, Imulungu ayuno mwenzeluka? Tutsolighala kuna nani ili lilawe kuna twetwe?” 21Apfo wawatuma wanu waghende kwa iwanu wa Kiriati Yearimu, walonge, “Wafilisti walyuyitsa Lisanduku lya IMNDEWA, mhulumke mtse mlisole.”
