Select a Verse
Amnoni akumlimba Tamali dada yaki
1Pagenago, Abusalomu mwana mgosi wa Daudi avi na mlumbu mweanyambili neju mweakemewa Tamali. Amnoni mwana yungi wa Daudi, amganili neju Tamali. 2Amnoni ang'ahiki neju ndava ya kumgana Tamali mbaka akavya mtamu, ndava ya Tamali mlumbu waki. Tamali avii mdala mweangammanya mgosi, na yaloliki Amnoni ihotola lepi kukita nayu chindu chochoha. 3Nambu Amnoni avi na mkozi mweakemiwa Yonadabu, mwana wa Shama, mlongo wa Daudi. Yonadabu avi mundu mweavi na umanya. 4Yonadabu akamkota Amnoni, “Veve wa mwana wa nkosi, ndava kyani uganda magono goha? Ndava kyani ugani lepi kunijovela?”
Amnoni akamjovela, “Nikumgana neju Tamali, mlumbu wa mlongo wangu Abusalomu.”
5Yonadabu akamjovela Amnoni, “Veve jigoneka pa chitanda ujikitayi ulwala neju. Dadi waku peibwea kukulola, veve mjovela, ‘Nikuyupa umleka Tamali abwela anitelekela chakulya na aniliha kwa chiwoko chaki kuni nikumlola.’” 6Hinu, Amnoni akayendelela kugona na kujikita ilwala. Nkosi peahambili kumlola, Amnoni akamjovela, “Nikuyupa, umleka Tamali abwela apa anitelekela mabumunda gadebe na aniliha kwa chiwoko chaki kuni nikumlola.”
7Hinu, Daudi apeliki ujumbi kwa Tamali mweavii munyumba ya chinkosi, “Hamba ku nyumba ya Amnoni muhaja waku, ukamtelekela chakulya.” 8Tamali akahamba kwenuko, akamkolela Amnoni agonili. Akatola uhembe, akauhinyanga, akateleka mabumunda palongolo ya Amnoni. 9Mabumunda genago pegapili, Tamali akayokola mu chikalangu. Akampelekela Amnoni, nambu Amnoni akabela kulya, akajova, “Kila mmonga mweavi penapa ahuma kuvala” Vandu voha vakahuma kuvala. 10Kangi Amnoni akamjovela Tamali, “Hinu niletela mabumunda genago ku chumba changu, na uniliha.” Tamali akatola mabumunda geagateliki na kupeleka ku chumba cha Amnoni muhaja waki. 11Bahopo peamliha mabumunda genago, Amnoni akamakamula Tamali na kumjovela, “Bwela ugona na nene!”
12Tamali akamjovela “Lepi muhaja wangu, kotoka kuning'ang'anisa. Lijambu ngati lenili liganikiwa lepi kukitika pa Isilaeli. Kotoka kukita chitendu chenichi cha uhakahu. 13Nene nihotola lepi kusindimala soni ngati iyi. Na veve yati uvya mmonga wa vahakahu na vahimu pa mulima wa Isilaeli. Hinu nikuyupa kalongela na nkosi muni mwene yati akubesa lepi kunigega.” 14Nambu Amnoni agani lepi kumyuwanila na ndava muni avi na makakala neju kuliku mwene, akamng'ang'anisa mbaka akahotola kugonekana nayu.
15Kangi Amnoni amvengi neju Tamali. Amvengili Tamali kuliku cheamganili pakutumbula. Akamjovela Tamali, “Wuka uhamba.”
16Tamali Akamyangula, “Lepi muhaja wangu, uhakau wenuwo wa kunivinga nene yati wivya uvaha neju kuliku chila cheunikitili.” Nambu Amnoni aganili lepi kumuyuwanila.
17Amnoni akamkemela mtumisi waki mweakumuhengela, akamjovela, “Muwusa mdala uyu palongolo yangu. Na mlyangu udinda kwa kabali.” 18Hinu mtumisi yula akamuwusa Tamali kuvala na kudinda mlyangu kwa kabali. Tamali awalili ligawuni litali lelilembiwi bwina, chenicho ndi chevawalayi vasikana va nkosi vevangammanya mgosi lukumbi lwenulo.
19Hinu Tamali akanyala lyenge kumutu, akapapula ligauni laki lelilembiwi lealiwalili, akavika mawoko gaki kumutu, akawuka kuni ivemba kwa lwami. 20Abusalomu muhaja waki peamuwene mlumbu waki, akamkota, “Wu, Amnoni muhaja waku agoni na veve? Guna mulumbu wangu, mwene ndi muhaja waku, lijambu lenili likoto kukuvina mu mtima.” Hinu Tamali akatama mu nyumba ya Abusalomu kuni iviniswa neju mu mtima.
21Nkosi Daudi peayuwini lijambu lenilo ayomili neju. 22Abusalomu amvengi neju Amnoni na aganili lepi hati kulongela nayu, ndava muni amkolisi soni Tamali kwa kugona nayu chimakakala.
Abusalomu akumkoma Amnoni
23Peyapitili miyaka hivili, vandu va kudumula mangoma ga mambelele ga Abusalomu pevavili ku muji wa Baali Hasoli, papipi na mibaka ya muji wa Efulaimu. Abusalomu akavagongolela vana voha vagosi va nkosi vahamba kwenuko. 24Abusalomu akamuhambila nkosi Daudi akamjovela, “Nkosi wangu, nene mtumisi waku yati nivya nidumula mangoma ga mambelele. Wu, veve nkosi pamonga na vatumisi vaku, muhotola kuhamba pamonga na nene?”
25Nkosi akamyangula, “Lepi wa mwana wangu tikotoka kuhamba tavoha tikavya mzigu kwaku.” Pamonga kuvya Abusalomu amyupili dadi waki ahamba, nkosi akabela kuhamba, akammotisa na kumjovela ahamba katama bwina.
26Kangi Abusalomu akamjovela, “Ngati yati uhamba lepi mleka mlongo wangu Amnoni tihamba naku.”
Nkosi akamyangula, “Ndava kyani ahamba pamonga na veve?”
27Nambu Abusalomu ayendalili kumyupa, na pamwishu nkosi akamleka Amnoni pamonga na vana vaki voha vagosi vahamba.
28Abusalomu akavajovela vatumisi vaki, “Mumyangalila Amnoni peinywa divayi na kugala, nikavajovela, ‘Mumtova Amnoni,’ nyenye mumtova na kumkoma. Mkoto kuyogopa, nene ndi mwanivapeli malagizu genaga. Hinu mkangamala na muvya umanya.” 29Hinu, vatumisi vala vakitili Amnoni ngati chevalagizwi na Abusalomu, ndi vana vangi vagosi va nkosi vakawuka kila mmonga akakwela punda falasi na kutila.
30Pevavi munjila, Daudi ajoviwi kuvya vana vaki voha vakomiwi na Abusalomu, kawaka hati mmonga mweasigali mumi. 31Nkosi Daudi akayima akapapula nyula zaki kwa ungolongondi akagona pahi. Hati vatumisi vaki voha vevayimili papipi nayu mewa vakapapula nyula zavi. 32Penapo akabwela Yonadabu mwana wa Shimea, mlongo waki Daudi, akamjovela, “Mkulu wangu, kotoka kuholale kuvya vana vaku voha vakomiwi. Amnoni mwene ndi mweakomiwi. Lijambu lenili Abusalomu apangili kukita tangiya Amnoni peagoni chi makakala na Tamali mlumbu waki. 33Hinu mkulu wangu, kotoka kuholalela mu mtima waku kuvya vana vaku voha vafwili. Amnoni mwene ndu ndi mweakowi.”
34Nambu Abusalomu amali kutila. Na msongolo mweavili mlonda wa nyumba ya nkosi, akawona msambi uvaha wa vandu vibwela kuhuma ku chitumbi mu njila yeyihuma ku Holonaimu.
35Yonadabu akamjovela Daudi, “Lola nkosi, vana vaku vibwela ngati chenakujovili nene mtumisi waku.” 36Mtumisi yula peamali ndu kujova genago, vana vagosi va nkosi vakayingila, vakatumbula kuvemba kwa lwami. Nkosi na vatumisi vaki voha vavembili kwa mvinisu.
37Nambu Abusalomu atilalili kwa Talimai mwana wa Amihudi, nkosi wa muji wa Geshuli. Nkosi Daudi akamvembenekela mwana waki Amnoni kwa magono gamahele. 38Abusalomu peatilalili ku muji wa Geshuli, akatama kwenuko kwa lukumbi lwa miyaka yidatu. 39Mvinisu wa nkosi Daudi ndava ya lifwa la Amnoni pewamaliki, akatumbula kunogela kumlola mwana waki Abusalomu.
