Select a Verse
Vachiveleku va Sauli vikomiwa
1Lukumbi lwa utalalila wa Daudi kwavili na njala yivaha mu myaka hidatu, hinu Daudi akamyupa Bambu Chapanga, na mwene Bambu Chapanga akamjovela Daudi, “Njala yeniyo yibwelili ndava Sauli na vandu va munyumba yaki vavakomili Vagibioni.” 2Hinu nkosi Daudi akavakemela Vagibioni akalongela navu. Vagibioni vavi lepi Vaizilaeli nambu vavi masigalilu ga Vaamoli. Pamonga kuvya vandu va Izilaeli valapili kuvaleka mumi Vagibioni, nambu Sauli alingili kuvakomakesa voha ndava aganayi vandu va Izilaleli na Yuda vautalalilayi mulima woha. 3Daudi akavakota Vagibioni, “Nivakitila kyani? Yati nikuvalipa wuli ndava ya uhakau wemukitiwi muni muhotola kuumotisa mulima uwu na vandu vaki Bambu Chapanga?”
4Vagibioni vakamjovela, “Luhonda lwitu na Sauli pamonga na vandu va munyumba yaki luhotola lepi kumalika kwa kulipa madini ga feza amala zahabu, amala kwa tete kumkoma Muizilaeli yoyoha.”
Nkosi akavakota kangi, “Wu, mwigana nivakitila kyani?”
5Vene vakamyangula nkosi, “Sauli aganayi kutikomakesa njwee, na akoto kumuleka mumi mundu yoyoha pagati yitu pandu popoha pa Izilaeli. 6Hinu, tipela vachiveleku vaki saba vagosi tivakoma cha kuvakungila palongolo ya Bambu Chapanga ku chitumbi cha Gibea, ku muji wa Sauli mweahaguliwi na Bambu Chapanga kwa kuyitiwa mahuta avya nkosi.”
Nkosi akayangula, “Yati nikuvagotolela.”
7Nambu nkosi avagotolili lepi Mefibosheti mwana wa Yonatani na mjukulu wa Sauli, ndava Daudi na Yonatani mwana wa Sauli vavikili lilaganu palongolo ya Bambu Chapanga. 8Nambu nkosi avatolili Alimoni na Mefibosheti, vana vavili va Lisipa msikana wa Aiya, veamuvelekili Sauli. Mewawa avatolili vana muhanu va Adilieli mwana wa Balizilai mundu kuhuma Mehola. 9Vana venavo saba vagosi, Daudi avagotwili kwa Vagibioni na vene vakavakoma cha kuvakungila ku chitumbi palongolo ya Bambu Chapanga, voha saba vakafwa pamonga. Vana venavo vakomiwi lukumbi lwa kutumbula kubena shayili.
10Kangi, Lisipa msikana wa Aiya akatola lijafafa, akatandika palitalau. Atamili penapo tangiya pelwatumbwili lukumbi lwa kubena mbaka lukumbi lwa fula pelwahikili na kutonyalela mituhi ya vandu venavo vevakomiwi. Lukumbi lwenulo lwoha avingalilayi videge vya kunani na hinyama ya ku dasi kilu na muhi muni hikotoka kuihikila mituhi yila.
11Daudi peayuwini gala geakiti Lisipa msikana wa Aiya, mdala wa kuvala wa Sauli, 12akahamba kutola majege ga Sauli na Yonatani mwana waki kuhuma kwa vandu va Yabeshi Gileadi, vevayivili majege genago ku luvanja lwa kukonganekela vandu voha ku Beti Shani, kula Vafilisiti kwevamuyinjisi Sauli na Yonatani ligono lila pevamkomili Sauli ku chitumbi cha Giliboa. 13Hinu Daudi akawuyisa majege ga Sauli na ga mwana waki Yonatani kuhuma kwenuko, kangi vakayola majege ga vana saba vevayinjikwi. 14Ndi, vandu va Daudi vakagazika majege ga Sauli na ga Yonatani mwana waki ku mulima wa Benjamini, mu litinda la Kishi dadi waki Sauli ku Sela. Vakitili kila chindu chealagizi nkosi. Pagenago, Chapanga akavayuwanila kuyupa kwavi kuvala mulima wavi.
Manjolinjoli va Daudi vitovana ngodo na mivandu ga Vafilisiti
(1 Lus 20:4-8)
15Kangi Vafilisiti vakahamba kutovana ngondo na Vaisilaeli. Mwene Daudi na vandu vaki vakahelela kutovana navu, ligono lenilo Daudi atotokili neju. 16Mmonga wa mivandu mweikemiwa Ishibi Benobu kuhuma mu lukolo lwa Lefai, lavili na mgoha weuvi na utopa wa kilo zidatu na yapinga na ajikungili upanga wamupya mu chiwunu chaki ajovili yati akumkoma Daudi. 17Nambu Abishai mwana wa Seluya akabwela kumtangatila Daudi. Akamzangila Mfilisiti yula mbaka akamkoma. Hinu vandu vakamlapila Daudi na kujova, “Yati wihamba lepi kangi na tete ku ngondo ndava Vaizilaeli voha vakuhuvalila veve.”
18Pegamaliki genago, yahumalili kangi ngondo na Vafilisiti ku Gobu. Kwenuko Sibekai kuhuma lukolo lwa Husha, amkomili Safu mweavili mveleku wa mivandu gegakemiwi Valefai.
19Vaisilaeli vatovini kavili ngondo na Vafilisiti ku Gobu. Na mwene Elihanani mwana wa Yaale Olegimu mwana wa Yaili kuhuma ku Betelehemu, amkomili Goliati kuhuma ku Gati, na chaka cha mgoha waki chavili chivaha ngati mkongo wa litendegu la chitanda.
20Badayi Vaisilaeli vakatovana na Vafilisiti ku Gati, kwavili na limundu litali lelina ngonji sita mu kila chiwoko na ngonji sita mu kila chigendelu, mvalangu wa ngonji zoha zavii ngonji ishilini na mcheche, na mwene mewa ahumalili mu lukolo mivandu gegikemiwa Valefai. 21Limundu lenilo pelavaligili Vaizilaeli, Yonatani mwana wa Shimei, mlongo waki Daudi, akalikoma.
22Venavo mcheche vevavili va chiveleku cha mivandu gegikemiwa Valefai va ku Gati, na vene mewa vakomiwi na Daudi pamonga na manjolinjoli vaki.
