Select a Verse
Litovelu la kukomiwa kwa vavelekwa va kutumbula.
1Kangi Bambu akamjovela Musa, “Lakona litovelu lingi yati nikumletela nkosi na mulima wa Misili. Peimala litovelu lenilo yati akuvaleka muwuka, mwene yati akuvavinga muwuka nganila. 2Vajovela Vaisilaeli hinu kila mmonga winu asangaluka, mgosi na mdala iganikiwa kumyupa Mmisili wa papipi yaki vindu vya feza na zahabu.” 3Bambu akavakita Vaisilaeli vaganwa na Vamisili, na Musa atopiswi neju na vatangatila va nkosi na vandu voha va mulima wa Misili.
4Ndava yeniyo Musa akamjovela nkosi, “Bambu ijova: ‘Lelu pagati ya kilu, yati nipita kila pandu pamulima woha wa Misili. 5Penipita kila mvelekanu wa kutumbula yati ifwa, kutumbula mvelekanu mtumbula mgosi wa nkosi mweivya mhali wa unkosi waku, hati mvelekanu mtumbula wa mvanda waku mweiyaga mabebenu kwa liganga. Mewa vavelekanu va kutumbula va mifuya ni yene yati yifwa. 6Yati kwiva na chivembu chivaha changahumila pa mulima woha wa Misili, na katu yati chihumila lepi kavili. 7Nambu pagati ya Vaisilaeli hati libwa yati likumuwuwutila lepi Vaisilaeli amala chinyama. Muni umanya nene Bambu nilekenganisa pagati ya Vaisilaeli na Vamisili.’ ” 8Musa akamalakisa kwa kumjovela nkosi, “Vatangatila vaku ava yati vakunibwelela na kugundama palongolo yangu kwa utopesa, na kuniyupa niwuka pa mulima wa Misili, nene pamonga na vandu voha vevakunilanda. Neju ya ago, yati niwuka.” Kangi Musa akawuka kwa nkosi kuni avii na ligoga neju.
9Bambu amjovili Musa, “Nkosi yati akuyuwanila lepi, muni niyendelela kuhenga gachinamtiti neju pamulima wa Misili.” 10Musa na Haloni vakakita gachinamititi palongolo ya nkosi. Nambu Bambu amkitili nkosi kuvya na ndindani, akabela kuvaleka Vaisilaeli kuwuka pamulima waki.
